އިންޑިއާ ސަރުކާރުން އަޅައިދޭ ކެންސަރު ހޮސްޕިޓަލުގެ މަސައްކަތް ފަށަން އަންނަ ހަފުތާގައި ޓީމެއް އަންނަނީ

އިންޑިއާގެ އެހީގައި ލ. ގަމުގައި އިމާރާތްކުރަން ނިންމާފައިވާ ކެންސަރު ހޮސްޕިޓަލްގެ މަސައްކަތް ފެށުމަށް އަންނަ ހަފުތާގައި ރާއްޖެ އަށް ޓީމެއް އަންނާނެ ކަމަށް ރައީސް އޮފީހުން ބުނެފި އެވެ.

ސަރުކާރުން ކުރަމުން އަންނަ މަސައްކަތްތަކާ ގުޅޭ އެންމެފަހުގެ ތަފުސީލު ނޫސްވެރިންނަށް ދިނުމަށް މިއަދު ރައީސް އޮފީހުގައި ބޭއްވި ޕްރެސްގައި އެ އޮފީހުގެ ތަރުޖަމާން މަބްރޫކް އަޒީޒް ވިދާޅުވީ މި ޓީމު އަންނަނީ ގަމުގައި ކެންސަރު ހޮސްޕިޓަލް އިމާރާތްކުރުމަށްޓަކައި ޑީޓެއިލް ފްރޮޖެކްޓް ރިވިއުއެއް ހެދުމުގެ މަސައްކަތަށް ކަމަށެވެ.

އޭގެ އިތުރު ތަފުސީލެއް ނުދެއްވަ އެވެ.

ކުރިން މި ހޮސްޕިޓަލު އަޅަން ނިންމީ ހުޅުމާލޭގަ އެވެ. ނަމަވެސް، ރާއްޖޭގެ ސިއްހީ ހިދުމަތްތައް ލާމަރުކަޒީ ކުރުމަށް ސަރުކާރުން ވިސްނާފައި ވާތީ މި ހޮސްޕިޓަލު ގަމަށް ބަދަލުކުރަން އިންޑީއާ ސަރުކާރާ އެކު މަޝްވަރާކޮށް އެ ގޮތަށް ވަނީ ނިންމައިފަ އެވެ.

ރާއްޖޭގައި ކެންސަރު ހޮސްޕިޓަލެއް އަޅައިދޭނެ ކަމަށް އިންޑިއާގެ ބޮޑު ވަޒީރު ނަރެންދުރަ މޯދީ ވިދާޅުވީ، ރާއްޖެ އަށް ބޮޑެތި އެހީތަކެއް ދިނުމަށް ޑިސެމްބަރު 4، 2019 ގައި ވާޗުއަލްކޮށް ބޭއްވި ރަސްމިއްޔާތެއްގަ އެވެ.

މި ވަގުތު ރާއްޖޭގައި މި ބައްޔަށް ފަރުވާ ލިބެނީ ހުޅުމާލެ ހޮސްޕިޓަލާއި އައިޖީއެމްއެޗާއި އޭޑީކޭ އަދި ޓްރީޓޮޕް ހޮސްޕިޓަލުން އެކަންޏެވެ.