ހިޔާގެ ކުދިންނަށް އަނިޔާކުރި ތުހުމަތަށް ދައުވާކުރަން ފޮނުވި ފުލުހުންގެ އިހުމާލެއް އޮތްތޯ ބަލަނީ

މީގެ ހަތަރު އަހަރު ކުރިން ކުޑަކުދިންގެ ހިޔާގެ ކުދިންތަކެއް ކޭމްޕެއްގައި ގެންގޮސްގެން އަނިޔާކުރި ކަމަށް ތުހުމަތުކޮށް ދައުވާ އުފުލާފައިވާ ފުލުހުންގެ އިހުމާލެއް އޮތްތޯ ނެޝަނަލް އިންޓަގްރިޓީ ކޮމިޝަން (އެންއައިސީ)ން ވެސް ބަލަމުން އަންނަ ކަމަށް އެ ކޮމިޝަނުން ބުނެފި އެވެ.

އެޗްއާރުސީއެމުން ތަހުގީގުކުރި މައްސަލައެއްގައި އެދުނީ ގިނަ އަދަދެއްގެ ފުލުހުންތަކަކާއި ޖެންޑާ މިނިސްޓްރީގެ މުވައްޒަފުންތަކަކަށް ދައުވާކޮށްދިނުމަށެވެ. އެކަމަކު، ޕީޖީ އޮފީހުން ދައުވާކުރީ 13 ފުލުހަކަށެވެ.

އެ އޮފީހުން ބުނެފައިވާ ގޮތުގައި ދައުވާ އުފުލީ ކުށްކުރި ކަމުގެ ހެއްކާއި ގަރީނާ ލިބިފައިވާ މީހުންގެ މައްޗަށެވެ. އެކަމަކު އެޗްއާރުސީއެމްގެ ތަހުގީގުގައި ފާހަގަވި ފަދަ ކުށްތަކެއް ފުލުހުންގެ ފަރާތުން އެ ކޭމްޕްގައި ހިނގައިދިޔަ ކަމަށް ކުރާ ތުހުމަތު ފުލުހުން ދޮގުކުރެ އެވެ.

ދައުވާއާ ގުޅިގެން ފުލުހުންގެ ކަންބޮޑުވުންތަކެއް ވެސް އެބަހުއްޓެވެ.

އެންއައިސީގެ އިންފޮމޭޝަން އޮފިސަރު، އަބްދުލް އަޒީޒް ޔޫސުފް މިއަދު ވިދާޅުވީ ފުލުހުންނަށް އެޗްއާރުސީއެމުން ތުހުމަތުކޮށްފައިވާ މައްސަލަތަކާ ގުޅިގެން އެކަން ބަލަން ބައްދަލުވުންތަކެއް ބާއްވާފައިވާ ކަމަށެވެ. ފުލުހުން އިހުމާލުވިތޯ ބެލުމުގެ އިތުރުން އެ ފުލުހުންނަށް ކުރާ ތުހުމަތާ ގުޅިގެން ހުރި ކަންބޮޑުވުންތައް ވެސް ކޮމިޝަނުން ބަލަން ވަނީ ނިންމައިފަ އެވެ.

ފުލުހުންނަށް ތުހުމަތުކުރާ މި ހާދިސާ ހިނގީ 2017 ގައި ކުޑަކުދިންގެ ހިޔާގައި ހިނގި ހަމަނުޖެހުންތަކަކާ ހެދި އެތަން މަރާމާތުކުރަން 12 އަހަރުން މަތީގެ ކުދިންތަކެއް ކޭމްޕެއް ގެންދިއުމުގެ ތެރޭގަ އެވެ.

މި މައްސަލައިގައި 13 ފުލުހުންގެ މައްޗަށް ދައުވާ އުފުލީ އެންޓި ޓޯޗާ ގާނޫނުގެ ދަށުން ރަހުމްކުޑަ ލާއިންސާނީ އިހާނެތި އަމަލެއް ހިންގުމުގެ ކުށުގެ ދައުވާ އެވެ.

އެނގިފައިވާ ގޮތުގައި އޭގެތެރެއިން ބައެއް ކުދިން ކޭމްޕްގައި ތުލުސްދުއަށް ދާން ބޭނުން ނުވީ އެވެ. އެހެންވެ ކަނޑުމަތީގައި ހިތްހަމަނުޖެހުން ފާޅުކޮށް ދޯނިން ފުންމާލަން އުޅުމުން ކޮންޓްރޯލްކުރަން އެ ކުދިން ބިޑި އެޅުވީ އެވެ. މި ކަމުގައި ހިމެނުނު ބައެއް ފުލުހުން ބުނާ ގޮތުގައި އެ ވަގުތު ބިޑިއެޅުވީ އެ ކުދިންގެ ފުރާނަ ސަލާމަތްކުރުމުގެ ގޮތުންނެވެ.

އެކަމަކު ޕްރޮސިކިއުޓަ ޖެނެރަލް ހުސެއިން ޝަމީމް ވިދާޅުވެފައިވާ ގޮތުގައި ކުދިންގެ ފުރާނަ ސަލާމަތްކުރަން ފުލުހުން އަޅުވަން ޖެހެނީ ލައިފް ޖެކެޓެވެ. ބިޑިއެޅުވުމަކީ ރައްކާތެރިކަމެއް ނޫން ކަަމަށް އޭނާ ވިދާޅުވެފައިވެ އެވެ.

މި މައްސަލަ ތަހުގީގުކޮށް ދައުވާކުރަން އެދުނީ އެޗްއާރުސީއެމުން ބުނާ ގޮތުގައި ކުޑަކުދިންނަށް ކުރާ އަނިޔާގެ މައްސަލަތައް ބަލާ ކޮމިޝަނުން އެ މައްސަލަ ސަމާލުކަމަށް ގެނައުމުންނެވެ.