ވޮޑަމުލާގެ ފައިސާ އެސްއޯއެފަށް ލިބުނުކަމާ މެދު ޝައްކު: ފަނޑިޔާރު މަހާޒް

ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑަރިންގެ ކުށް ސާބިތުވެ ފަސް އަހަރަށް ޖަލަށް ލާން ކޮށްފައިވާ ހުކުމްކުރުމުގައި އަސްލަކަށް ބެލި، ވޮޑަމުލާގެ ފައިސާ އެސްއޯއެފަށް ޖަމާވިކަމާ މެދު ޝައްކު އުފެދޭ ކަމަށް ޔާމީންގެ އިސްތިއުނާފު ހުކުމުގައި ފަނޑިޔާރު މަހާޒް އަލީ ޒާހިރު ވިދާޅުވެއްޖެ އެވެ.

ޔާމީނަށް ލިބުނު ފައިސާ އަކީ ދައުލަތަށް ލިބެންޖެހޭ ފައިސާކަން ސާބިތުކޮށްދިނުމަކީ ޔާމީނަށް މަނީ ލޯންޑަރިންގެ ކުށް ސާބިތުކުރުމުގައި މުހިންމު ކަމެކެވެ. މިކަން ޝަރީއަތުގައި ސާބިތުކޮށްނުދެވޭ ކަމަށް ފަނޑިޔާރުންނަށް ގަބޫލުކުރެވޭ ނަމަ ޔާމީން ސަލާމަތްވުމުގެ ފުރުސަތު ބޮޑެވެ.

މައްސަލަ ދިރާސާކުރި އިރު، އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔާތުގެ މައްޗަށް ޚިޔާނާތުގެ ކުށް ސާބިތުވެފައި ވަނީ އެސްއޯއެފަށް ޖަމާވި ވޮޑަމުލާގެ ޗެކް ޝަރީއަތަށް ހުށަހަޅައިިގެންކަން އެނގޭ ކަމަށް ފަނޑިޔާރު ވިދާޅުވި އެވެ. ޒިޔާތަށް ދައުވާކުރީ ޔާމީނަށް ދައުވާކުރުމުގެ ކުރިން ކަމަށް ވިޔަސް ޒިޔާތުގެ މައްސަލާގައި ހުރި، މި މުއާމަލާތާ ގުޅޭ ލިޔުންތައް ޔާމީންގެ މައްސަލާގައި ހުށަހަޅައިފައެއް ނުވެ އެވެ.

ޔާމީން ލޯންޑާކުރެއްވީ ވޮޑަމުލާގެ ފައިސާ ކަމަށް ދައުވާގައި ބުނި ނަމަވެސް ޔާމީނަށް ދައުވާކުރި އިރު މި ޗެކް ހުށަހަޅައިފައެއް ނުވެ އެވެ.

ލިބޭ ފައިސާ އަކީ ކުށް ކޮށްގެން ހޯދި ފައިސާކަން ސާބިތު ނުވިޔަސް ޝައްކު އުފެދޭ ހާލަތުގައި ވެސް ކުށް ސާބިތުވާނެ ކަމަށް ބަލައިފި ނަމަ، ހުކުމް ތަންފީޒުކުރާ ފަހުން އެއީ ރަނގަޅު ފައިސާ އެނގިއްޖެ ނަމަ ކުރިމަތިވެދާނެ މައްސަލަތައް މަހާޒްގެ ރައުޔުގައި ވިދާޅުވި އެވެ.

ޔާމީން ޖަލަށް ލުމަށް ހުކުމްކުރި މައްސަލައިގެ އިސްތިއުނާފް ހައި ކޯޓުން ނިމުނު ފަހުން އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތުގެ މައްޗަށް މި މައްސަލަތަކުގައި ޚިޔާނާތުގެ ދައުވާކޮށް ހުކުމްކުރި ގަޒިއްޔާގެ ލިޔުންތަކުގައި، ވޮޑަމުލާގެ ފައިސާ ލިބުނު ޗެކްގެ ނަންބަރު އޮތްކަން ވަނީ ހާމަވެފަ އެވެ. އެކަން ވަނީ ޔާމީންގެ ފަރާތުން ސުޕްރީމް ކޯޓަށް ހުށަހަޅައި އެކަމާ ބެހޭ ގޮތުން ވާހަކަ ދައްކައިފަ އެވެ.

ޔާމީންގެ ފަރާތުން ހުށަހެޅުއްވި ގިނަ އިސްތިއުނާފީ ނުކުތާތަކުގައި ސުޕްރީމް ކޯޓުން ނިންމީ ޔާމީނާ ދެކޮޅަށެވެ. ނަމަވެސް ޖޫރިމަނާ ކަނޑައެޅި ގޮތް ގޯސް ކަމަށް ފަނޑިޔާރު މަހާޒް އަލީ ޒާހިރުގެ ރައުޔުގައި ވިދާޅުވި އެވެ.

ޔާމީން ފަސް އަހަރަށް ޖަލަށް ލައި ފަސް މިލިއަން ޑޮލަރުން ޖޫރިމަނާކުރުމަށް ހުކުމްކުރީ އެމްއެމްޕީއާރްސީ މެދުވެރިކޮށް ގއ. ވޮޑަމުލާ ކުއްޔަށް ދިން މުއާމަލާތުގައި ދައުލަތަށް ލިބެންޖެހޭ އެއް މިލިއަން ޑޮލަރު އެސްއޯއެފް ކުންފުންޏަށް ޖަމާކޮށް އެ ފައިސާ ޔާމީންގެ އެކައުންޓަކަށް ޖަމާކޮށް ލޯންޑާކުރި ކަމުގެ ކުށުގަ އެވެ.