ހުއްދަ ނެތި ޕޯސްޓްކުރާ މީސްމީހުންގެ ފޮޓޯ/ވީޑިއޯ ޓްވިޓާ އިން ދެން ނަގާނެ

މިހާރު ވެސް މީހުންގެ ޒާތީ މައުލޫމާތުތައް ހާމަ ނުކުރެވޭ ގޮތަށް އުސޫލުތައް އޮންނަ ޓްވިޓާގައި ހުއްދަ ނެތި ޕޯސްޓްކުރާ އާންމު މީސްމީހުންގެ ފޮޓޯތަކާއި ވީޑިއޯތައް ނަގާ ގޮތަށް ނިންމައިފި އެވެ.

މިކަން އިއުލާންކޮށް ޓްވިޓާ އިން ބުނީ މިއީ ރައްކާތެރިކަމުގެ ގޮތުން އަޅާ ފިޔަވަޅެއް ކަމަށާއި ކުރިއަށް އޮތް ތަނުގައި ހުއްދަ ނެތި މީސްމީހުންގެ ފޮޓޯ/ވީޑިއޯ ޕޯސްޓްކުރާ ނަމަ އެ އެއްޗެހި ނަގާނެ ކަމަށެވެ. އެގޮތުން އެފަދަ ކޮންޓެންޓްތައް ރިޕޯޓް ކުރުމުން އެ އެއްޗެހި ޑިލީޓް ކުރާނެ އެވެ.

ޓްވިޓާގެ ރައްކާތެރިކަން މިހާރަށް ވުރެ ބޮޑަށް ކަށަވަރުކޮށް ދޭން އަޅަން ނިންމި ފިޔަވަޅުގެ ސަބަބުން އަންހެނުންނާއި އެކްޓިވިސްޓުންނާއި މައިނޯރިޓީ ގްރޫޕްތަކާއި އަދި ފިކުރީ ގޮތުން ހިޔާލު ތަފާތު މީސްމީހުންނަށް ރައްކާތެރިކަން ލިއްބައިދޭނެ ކަމަށް ޓްވިޓާ އިން ބުންޏެވެ.

އެހެންވެ ޓްވިޓާ އަށް ދެން ޕޯސްޓްކުރާ ފޮޓޯ/ވީޑީއޯއެއްގައި އެ މީހަކު ހުރި ނަމަ އަދި އެއީ އެ މީހެއްގެ ހުއްދަ ނެތި ޕޯސްޓް ކޮށްފައިވާ އެއްޗެއްކަން ރިޕޯޓް ކޮށްފި އެ ކޮންޓެންޓަކަށް ވަގުތުން ފިޔަވަޅު އަޅާނެ ކަމަށް ޓްވިޓާ އިން ބުންޏެވެ.

ޓްވިޓާގެ "ޕްރައިވެޓް އިންފޮމޭޝަން" ޕޮލިސީ" ގެ ދަށުން މީސްމީހުންގެ ގޭގެ އެޑްރެހާއި ގެ ހުރި ތަނާއި އެ މީހަކު ހުރި ތަނާއި އަދި އެ މީހެއްގެ ޒާތީ އެއްވެސް މައުލޫމާތެއް ޓްވިޓާގައި އާާންމު ކުރުމަކީ މަނާ ކަމެކެވެ. އެގޮތުން އައިޑީކާޑް ނަމްބަރާއި އެފަދަ އެ ނޫން ވެސް ލިޔެކިޔުންތަކާއި ފޯނު ނަމްބަރާއި ބޭންކް އެކައުންޓާ ބެހޭ މައުލޫމާތާއި ބޭންކް ކާޑްތަކުގެ މައުލޫމާތާއި މީސްމީހުންގެ ސިއްހީ ރެކޯޑްތަކާއި ބައޯމެޓްރިކް ޑޭޓާތައް ވެސް ޓްވިޓާގައި އާންމު ކުރުމަކީ އުސޫލުތަކާ ހިލާފު ކަންކަމެވެ.

ޓްވިޓާ އަށް ފޮޓޯ/ވީޑިއޯ ޕޯސްޓް ކުރުމާ ގުޅޭ ގޮތުން އަލަށް ހަމަޖެއްސި އުސޫލާ ގުޅިގެން ފާޑުކިޔުންތަކެއް ވެސް އަމާޒުވެފައިވެ އެވެ. އެގޮތުން ބައެއް މީހުން ބުނެފައި ވަނީ މިއީ އަނެއްކާ ވެސް "ހިޔާލު ފާޅުކުރުމުގެ މިނިވަންކަމަށް ހަނިވާ" ފަދަ އުސޫލެއް ކަމަށެވެ. ހާއްސަކޮށް އާންމު ތަންތަން ފޮޓޯ ނަގާ ފޮޓޯގްރާފަރުން އާ އުސޫލާ މެދު ކަންބޮޑުވުން ފާޅުކޮށްފައިވެ އެވެ.