ޓްވިޓާގައި ފުރައްސާރަކުރާ އެކައުންޓްތައް އޮޓޮމެޓިކުން ބްލޮކްވާ ފީޗާއެއް

ޓްވިޓާގައި ރައްކާތެރިކަން ބޮޑުކުރުމުގެ ގޮތުން "ސޭފްޓީ މޯޑް" ޓެސްޓްކުރަން ފަށައިފި އެވެ.

މި ފީޗާ އަކީ ޓްވިޓާގައި ޕޯސްޓްކުރާ އެއްޗިއްސާއި ދެކެވޭ ވާހަކަތަކާ ގުޅިގެން ކުރިމަތިވިދާނެ ފުރައްސާރަތަކުން ރައްކާތެރިކަން ހޯދައިދޭނެ ފީޗާއެކެވެ. ޓްވިޓާގެ ޕްރައިވެސީ އެންޑް ސޭފްޓީ ސެޓިން އިން "ސޭފްޓީ މޯޑް" އެނޭބަލްކުރުމުން އެ މީހެއްގެ ޓްވިޓާ އެކައުންޓާއި ފުރައްސާރައިގެ ބަހުރުވަ އެކުލެވޭ އެއްޗެހި ރައްދުކުރާ އެކައުންޓްތައް ދެނެގަނެ އެފަދަ އެކައުންޓްތައް ހަފުތާއެއްގެ މުއްދަތަށް އޮޓޯ އިން ބްލޮކްކުރާނެ އެވެ.

މި ފީޗާއާ ބެހޭ ގޮތުން ޓްވިޓާގެ ޕްރޮޑަކްޓް މެނޭޖަރު ޖެރަޑް ޑޮހާޓީ ވިދާޅުވީ "ސޭފްޓީ މޯޑް" ފީޗާ އަކީ މައިގަނޑު ގޮތެއްގައި އާންމުކޮށް އެ މީހަކު އިންޓަރެކްޓްނުކުރާ މީހުންގެ ފަރާތުން ކުރިމަތިވެދާނެ ފުރައްސާރަތަކުން ރައްކާތެރިކަން ހޯދައިދޭނެ ފީޗާއެއް ކަމަށެވެ.

"އާންމުކޮށް އެ މީހަކާ އިންޓަރެކްޓްކުރާ މީހުންގެ އެކައުންޓްތައް މި ފީޗާ އިން ބްލޮކެއް ނުކުރާނެ. މި ފީޗާ މަސައްކަތްކުރާނީ އެކައުންޓެއް ގެންގުޅޭ މީހަކާއި އެ މީހަކަށް ރައްދުދޭ މީހުންނާ އޮންނަ ގުޅުން ދެނެގަނެގެން."

"ސޭފްޓީ މޯޑް" މި ވަގުތު ބީޓާގައި މަދު ބައެއްގެ މެދުގައި ޓެސްޓްކުރަމުން ދިޔަ ނަމަވެސް އެކަން ކުރިއަށް އޮތް ދުވަސްތަކުގައި ފުޅާކުރާނެ އެވެ. އަދި ފީޗާ އާންމުކޮށް ދޫކޮށްލަނީ ފުޅާ ޓެސްޓިންއަކަށް ފަހު އެވެ.

ޖެކް ޑޯޒީގެ ޓްވިޓާ އަކީ ސޯޝަލް މީޑިއާ އެޕްތަކުގެ ތެރެއިން އެންމެ މަގުބޫލު އެކައްޗެވެ.