މިސްކިތަކަށް ގެއްލުންދީ، ބޮޑުކަމުދިިޔަ މީހަކު ހައްޔަރުކޮށްފި

އައްޑޫ، ފޭދޫގެ މިސްކިތަކަށް ބޮޑުކަމުގޮސް ހުރުމަތް ކެނޑި މައްސަލައެއްގައި މީހަކު ހައްޔަރުކޮށްފި އެވެ.

ފުލުހުން ބުނީ ފޭދޫގެ މިސްކިތަކަށް ބޮޑުކަމުގޮސް އެ ރަށުގެ އެހެން ދެ މިސްކިތެއްގެ ތަކެއްޗަށް ގެއްލުން ދިން މައްސަލައެއް މިއަދު 5:45 ގައި ރިޕޯޓް ކޮށްފައިވާ ކަމަށެވެ.

އެ މައްސަލާގައި 47 އަހަރުގެ ދިވެހި ފިރިހެނަކު ބެލުމުގެ ދަށަށް ގެނެސްފައިވާ ކަމަށް ފުލުހުން ބުންޏެވެ.

ފޭދޫ މިސްކިތަށް ވަދެ އެ މީހާ ބޮޑުކަމުގޮސްފައި ވަނީ އިމާމް މީހާ ހުންނަ ތަނަށެވެ. އެތަނުގައި ނަޖިސް ހުރި ފޮޓޯތައް ސޯޝަލް މީޑިއާގައި ދައުރުވެ ގިނަ ބަޔަކު އަންނަނީ އެކަމާ ހިތްހަމަނުޖެހުން ފާޅު ކުރަމުންނެވެ.

އޭގެ އިތުރުން އޭނާ ގެއްލުން ދިނީ ފޭދޫގެ އަލް އަމާނީ މިސްކިތާއި އަން ނަސްރު މިސްކިތުގައި ހުރި ބައެއް ތަކެއްޗަށެވެ.

މިސްކިތުގެ ހުރުމަތް ކަނޑާ މައްސަލަތައް މިފަހަކަށް އައިސް ވަރަށް ގިނައިން ފެންމަތިވެ އެވެ.

މާލޭގެ ހުކުރު މިސްކިތާއި އެހެން ބައެއް މިސްކިތަށް ވެސް މިފަދަ ގޮތަކަށް ހުރުމަތް ކެނޑޭ ފަދަ އަމަލު ހިންގި މައްސަލަތަކެއް ވެސް ފުލުހުން އަންނަނީ ބަލަމުންނެވެ.