އިންޑިއާ އައުޓް ގޮވަނީ އެހީތަކާ ހެދި ޔާމީންގެ ހިތަށް ކެތްނުވެގެން: އެމްޓީޑީ

އިންޑިއާ ސިފައިން ރާއްޖެއިން ބޭލުމަށް ގޮވާލައި އިދިކޮޅު ޕީޕީއެމް/ޕީއެންސީން ކޯލިޝަނުން "އިންޑިއާ އައުޓް" ކެމްޕޭން ފެށީ އެ ގައުމުން ރާއްޖެއަށް ދޭ އެހީތަކާ ހެދި ކުރީގެ ރައީސް އަބްދުﷲ ޔާމީންގެ ހިތްޕުޅަށް ކެތް ނުވެގެން ކަމަށް މޯލްޑިވްސް ތާޑްވޭ ޑިމޮކްރަޓިކް (އެމްޓީޑީ)ން މިއަދު ބުނެފި އެވެ.

އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އިސްވެ ހުންނަވައި ކުރިއަށް ގެންދަވާ "އިންޑިއާ އައުޓް" ކެމްޕެއިނާ ދެކޮޅަށް ސަރުކާރު ކޯލިޝަންގައި ހިމެނޭ އެމްޑީޕީ އާއި އަދާލަތު ޕާޓީ އަދި ޖުމްހޫރީ ޕާޓީން ވަނީ ތެދުވެފަ އެވެ. ދަނގެތި ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު މުހައްމަދު ނާޒިމް އުފެއްދެވި މޯލްޑިވްސް ނޭޝަނަލް ޕާޓީ (އެމްއެންޕީ)ން ވެސް ގަބޫލުކުރަނީ އެ ކެމްޕެއިނަކީ ވަކި ބޭފުޅަކު ފައިދާ ހޯދުމަށް ގެންދާ ބޮޑު ޖަރީމާއެއްގެ ގޮތުގަ އެވެ.

ކުރީގެ ނައިބު ރައީސް އަހުމަދު އަދީބު އިސްކޮށް ހުންނަވައިގެން އުފެއްދި އެމްޓީޑީން އިންޑިއާ އައުޓް ކެމްޕެއިން ކުށްވެރިކޮށް ނެރުނު ބަޔާނުގައި ބުނީ ޔާމީނަށް ވަރަށް ބޮޑަށް ފާޑުކިޔައި ބުނެފައި ވަނީ އެމަނިކުފާނުގެ މަގްސަދަކީ އިންޑިއާއާ މެދު ނަފްރަތު އުފައްދައި ކޮވިޑްގެ މި ދަތި ހާލުގައި ބޭރުން ލިބޭ އެހީތަކާއި ވިޔަފާރިތަކާއި އިންވެސްޓްމަންޓްތައް ހުއްޓުވާލުން ކަމަށެވެ. އެ ކެމްޕޭނުން ލިބޭނީ ގައުމަށް ގެއްލުން ކަަމަށް އެ ޕާޓީން ބުންޏެވެ.

ބަޔާނުުގައި ބުނީ ރާއްޖެއަކީ ފަތުރުވެރިކަމާއި އިގްތިސޯދީ އެތައް ރޮނގަކުން އަދިވެސް އިތުރަށް ކުރިއަށް ދިއުމުގެ ފުރުސަތު އޮތް ގައުމެއް ކަމަށާއި ރާއްޖެ ފަދަ ކުދި ގައުމުތައް މިހާތަނަށް ކުރިއަރާފައި ހުރީ އެހެން ގައުމުތަކާ އެކު ގުޅުން ބަދަހިކޮށްގެން ކަމަށެވެ.

ރާއްޖެ އާއި އިންޑިއާ އަކީ ޒަމާންވީ ތާރީހީ އެތައް ގުޅުމެއް އޮތް އެކުވެރި ދެ ގައުމުކަން ފާހަގަކޮށް ބަޔާނުގައި ބުނި ގޮތުގައި ސިޔާސީ، އިގްތިސޯދީ، އަދި ހާރިޖީ ގުޅުމާއި ދިފާއީ އެތައް ކަމެއްގައި ޒަމާނުއްސުރެ އިންޑިއާ އާއި ރާއްޖެ އަބަދުވެސް އެކީގައި މަސައްކަތްކޮށް އިންޑިއާ ކަނޑުގެ ސަލާމަތް ވަނީ ދަމަހައްޓައިފަ އެވެ. އަދި ޔާމީންގެ ވެރިކަމުގައި އެމަނިކުފާނު ވެސް އިންޑިއާ އާއެކު އޮންނަ ގުޅުން ވަރުގަދަކުރި ކަމަށް އެމްޓީޑީން ބުންޏެވެ.

"ޔާމީން އިންޑިއާ އެކީ ގުޅުން ބަދަހިކުރުމަށްޓަކައި، އިންޑިއާގައި އެދިގެން ވެރިކަން ލިބުމުގެ ކުރިންނާއި ވެރިކަން ލިބުމުގެ ފަހުން ވެސް އެންމެ ފުރަތަމަ ރަސްމީ ދަތުރުފުޅެއްގައި ވަޑައިގެންނެވީ އިންޑިއާއަށް. އަދި ރައީސް ޔާމީން ސަރުކާރުން ފުރަތަމަ ސޮއިކުރި ޑިފެންސް އެގްރީމަންޓަކީ އެމަނިކުފާނު އެކަމަށް އެދި އެންޑޯސްކޮށްގެން އިންޑިއާ އިން ދެވަނަ ހެލިކޮޕްޓަރު ގެނައުމުގެ އެގްރީމަންޓެވެ. އިތުރު މިލިޓަރީ ޑޯނިއާ މަތިންދާ ބޯޓެއް ގެނައުމަށް ވެސް އިސްވެ އިންޑިއާގައި އެދުނީ ރައީސް ޔާމީންކަން ގިނަ ވަޒީރުން ހެކިވާނެ އެވެ،" އެމްޓީޑީން ނެރުނު ބަޔާނުގައިވެ އެވެ.

އެ ޕާޓީން ބުނީ އިންޑިއާ އާއި ޔޫރަޕިއަން ޔޫނިއަން އާއި އެމެރިކާ އަދި ކޮމަންވެލްތުން ސިޔާސީ ކުށްވެރިން ޖަލަށްލައިގެން އަނިޔާ ނުކުރުމަށާއި އިންސާނީ ހައްގު ހިމާޔަތްކުރަން އޭރު ގޮވާލުމާ އެކު އެ ތަންތަން ޔާމީނަށް ގޯސްވީ ކަމަށެވެ. އެމަނިކުފާނުގެ ވެރިކަން ނިމުނުއިރު ރާއްޖެ އޮތީ މުޅި ދުނިޔެއާ އެކަހެރިވެ ޔޫރަޕިއަން ޔޫނިއަނުން ވެސް ފިޔަވަޅު އަޅާ ހިސާބުގައި ކަމަށާއި މިހާރު އިދިކޮޅު ލީޑަރުގެ ހައިސިއްޔަތުން ވެސް ސަރުކާރު ޖަވާބުދާރީކުރުވާ މަންޒަރު ނުފެންނަ ކަމަށް ބަޔާނުގައިވެ އެވެ.

"މިހާތަނަށް ކޮވިޑްގެ ބަލިމަޑުކަމުގައި 261 މީހަކު ނިޔާވެ، ދުނިޔެއަށާއި ގައުމަށް ދިމާވެފައިވާ އިގްތިސޯދީ ގޮތުން ދަތި އުނދަގޫ ދުވަސްވަރު ވެސް އެއްވެސް ޒިންމާދާރުކަމެއް ނެތި ސަރުކާރަށް އެއްވެސް އެއްބާރުލުމެއް ނުދޭ،" ބަޔާނުގައިވެ އެވެ.

އެމްޓީޑީން ބުނި ގޮތުގައި ކޮވިޑް ފެށުނީއްސުރެ މިއަދާ ހަމައަށް ރާއްޖެ ބަނގުރޫޓު ނުވެ މެނޭޖްކުރެވުނީ އިންޑިއާގެ ބޮޑު އެހީތެރިކަމަކާ އެކު އެވެ. މުޅި ދުނިޔެ ބަންދުކޮށްފައި އޮއްވައި ވެސް ޓްރެވަލް ބަބުލްއެއް ގާއިމުކޮށް އެގައުމުން ރާއްޖެއަށް ފަތުރުވެރިން އާދެވޭނެ ގޮތާއި ބޮޑެތި ބަލިތަކަށް ފަރުވާ ހޯދުމަށް އެގައުމަށް ދެވޭނެ އިންތިޒާމު ހަމަޖެއްސި ކަމަށެވެ. އަދި ކޮވިޑުން ދިފާއުވުމަށް އެންމެ ފުރަތަމަ އެގައުމުން ވެކްސިން ހަދިޔާކުރީ ވެސް ރާއްޖެއަށް ކަމަށާއި ޑްރަގް ބޯޓުތައް ވެސް އެގައުމުގެ އެހީގައި ދިވެހި ފުލުހުން އަތުލައިގަންނަމުންދާ ވެސް ބަޔާނުގައި ބުނެފައިވެ އެވެ.

"ތިލަމާލެ ބްރިޖް ފަދަ އެތައް ތަރައްގީގެ މެގަ ޕްރޮޖެކްޓަކަށް ލުއި ލޯނުތަކާއި ބަޖެޓް ސަޕޯޓް އަދި ހިލޭ އެހީގެ ގޮތަގައި އެތައް ބިލިއަން ޑޮލަރެއް ފާއިތުވި ތިން އަހަރުތެރޭ އިންޑިއަ އިން ރާއްޖެއަށް ވަނީ ދީފައި،" އެމްޓީޑީން ބުންޏެވެ.

އެ ބަޔާނުގައި ބުނީ އެމަނިކުފާނު ތަރައްގީގެ ނަމޫނާއެއްގެ ގޮތުގައި ބަލާ ސިންގަޕޫރަކީ ހަރުދަނާ ފޮރިން ޕޮލިސީއެއް އޮތް ގައުމެއް ކަމަށާއި އެގައުމު ތަރައްގީވެފައި ވަނީ ވަރުގަދަ ޑިފެންސް ޕާޓްނާޝިޕްތަކާ އެކު ކަމަށެވެ. އެެހެންވެ، "އިންޑިއާ އައުޓް" ކެމްޕެއިނަކީ ނާތަހުޒީބު ހަރަކާތެއް ކަމަށާއި ގައުމަށް ހެޔޮއެދޭ ލީޑަރަކު ކުރައްވާނެ މަސަައްކަތެއް ނޫން ކަމަށް އެމްޓީޑީގެ ބަޔާނުގައިވެ އެވެ.