ދިވެހިން ތުރުކީއަށް ދާން ވިސާ ނަގަން ނުޖެހޭ ގޮތް ހަދަނީ

ކުރިން ވިސާ ނެގުމަކާނުލައި ދިވެހިންނަށް ތުރުކީ އަށް ދެވޭ އެއްބަސްވުމެއް ހަދަން ނިންމާފައިވާ ކަމަށް ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެ އެވެ.

ޝާހިދުގެ ދައުވަތަކަށް ކުރައްވާ ރަސްމީ ދަތުރެއްގައި، ތުރުކީގެ ފޮރިން މިނިސްޓަރު މެވްލުތު ޗަވްޝޯލް މިވަގުތު ހުންނެވީ ރާއްޖޭގަ އެވެ.

މި ދަތުރުގެ ތެރެއިން ތުރުކީ ސަރުކާރާ އެކު، އެކި ދާއިރާތަކުން ފަސް އެއްބަސްވުމެއްގައި ސޮއިކުރުމަށް ފޮރިން މިނިސްޓްރީގައި މިއަދު ބޭއްވި ރަސްމިއްޔާތުގައި ޝާހިދު ވިދާޅުވީ މިހާރު ވެސް ދިވެހިން ތުރުކީ އަށް ދަތުރުކުރުމަށް އީ-ވިސާ ނެގޭނެ ކަމަށާއި އެކަމަކު އޭގެ ބަދަލުގައި ވިސާ ފްރީ އެއްބަސްވުމެއް އެކުލަވާލުމަށް ހުށަހަޅާފައިވާ ކަމަށެވެ.

"އެކަމަށް ތުރުކީގެ ސަރުކާރުން އެއްބަސްވެ، ވިސާ ނެތި ދިވެހިންނަށް ތުރުކީ އަށް ދަތުރުކުރެވޭނެ އިންތިޒާމް ހަމަޖެހިގެންދާނެ،" ޝާހިދު ވިދާޅުވި އެވެ.

ވިޔަފާރި އާއި ދަނޑުވެރިކަމާއި ތިމާވެއްޓާއި ފޮރިން ސާވިސް އަދި ތަރިކައިގެ ދާއިރާއިން ތުރުކީއާ އެކު އެއްބަސްވުންތަކުގައި މިއަދު ވަނީ ސޮއިކޮށްފަ އެވެ.

ތުރުކީ އާއި ރާއްޖެއާ ދެމެދު ވިޔަފާރީގެ ދާއިރާއިން ގުޅުން ބަދަހިވަމުން އަންނައިރު ތުރުކީ އަކީ މިހާރު ވަރަށް ގިނަ ދިވެހިން ޗުއްޓީއަށް ވެސް ދާ ގައުމެކެވެ.

ޝާހިދުގެ ދައުވަތަކަށް ތުރުކީގެ ފޮރިން މިނިސްޓަރު ރާއްޖެ ވަޑައިގަތީ މިދިޔަ ހުކުރު ދުވަހު އެވެ. މިއީ ތުރުކީއާ އެކު ރާއްޖެއިން ސިޔާސީ ގުޅުން ގާއިމްކުރި ފަހުން، އެ ގައުމުގެ ފޮރިން މިނިސްޓަރަކު ރާއްޖެ އަށް ކުރެއްވި ފުރަތަމަ ދަތުރެވެ.