ވީއައިއޭގެ އާ ރަންވޭ، ޓެކްސީވޭއެއްގެ ގޮތުގައި މާދަމާއިން ފެށިގެން ބޭނުންކުރަން ފަށަނީ

ވެލާނާ އިންޓަނޭޝަނަލް އެއާޕޯޓުގެ އާ ރަންވޭ، ޓެކްސީވޭއެއްގެ ގޮތުގައި މާދަމާއިން ފެށިގެން ބޭނުން ކުރަން ފަށާނެ ކަމަށް އެމްއޭސީއެލުން މިއަދު ބުނެފި އެވެ.

އެމްއޭސީއެލްގެ ކޯޕަރޭޓް ކޮމިއުނިކޭޝަންސް މެނޭޖަރު ޝަމްއާން ޝާކިރު "މިހާރު" އަށް ވިދާޅުވީ އާ ރަންވޭ، ޓެކްސީވޭއަކަށް ހަދަން ނިންމީ އަދި އެތަން ރަންވޭއެއްގެ ގޮތުގައި ބޭނުންކުރެވެން ނެތުމުން ކަމަށެވެ. ކުރީގެ ސީޕްލެން ޓާމިނަލް ހުންނަނީ އާ ރަންވޭއާ ކައިރީގައި ކަމަށް ވާތީ އެ ރަންވޭއަށް ފްލައިޓުތައް ޖެއްސުމަކީ ބައިނަލްއަގުވާމީ މިންގަނޑުތަކާ ވެސް ހިލާފު ކަމެކެވެ. އާ ރަންވޭއަށް ފްލައިޓުތައް ޖެއްސެން ފެށޭނީ އާ ސީޕްލޭން ޓާމިނަލަށް ހުރިހާ ހިދުމަތެއް ބަދަލުކޮށް ކުރީގެ އިމާރާތް ތަޅާލުމަށް ފަހު ކަމަށް ޝަމްއާން ވިދާޅުވި އެވެ.

"މިހާރު ސީޕްލޭން ޓާމިނަލް އެ ހުންނަނީ އާ ރަންވޭއާ ވަރަށް ކައިރި ޑޭންޖާ ޒޯންގައި. އެތަނުން އަދިވެސް ސީޕްލޭންތަކަށް ހިދުމަތް ދޭތީ އާ ރަންވޭއަށް ފްލައިޓުތައް ނުޖެއްސޭނެ،" ޝަމްއާން ވިދާޅުވި އެވެ.

އާ ސީޕްލޭން ޓާމިނަލަށް ހުރިހާ ހިދުމަތެއް ބަދަލުކުރަން އެމްއޭސީއެލުން ވަނީ އަންނަ އޭޕްރިލް މަހުގެ އެއްވަނަ ދުވަހުގެ ނިޔަލަށް ފުރުސަތު ދީފަ އެވެ.

ޓެކްސީވޭ އަކީ މަތިންދާބޯޓު ޖެއްސުމަށް ފަހު ރަންވޭ އަށް އިން ނުކުމެ ޕާކު ކުރަން ދާ މަގަށް ކިޔާ ނަމެވެ. މިހާރު ވެސް ޓެކްސީވޭގެ ގޮތުގައި ބޭނުން ކުރަނީ ރަންވޭ އެވެ. މީގެ ސަބަބުން ފްލައިޓުތަކަށް ރަންވޭ ކްލައިއާ ކުރަން ގިނަ ވަގުތު ނަގަ އެވެ. ނަމަވެސް މާދަމާއިން ފެށިގެން ޓެކްސީވޭއެއްގެ ގޮތުގައި އާ ރަންވޭ ބޭނުން ކުރަން ފެށުމުން އެއާލައިންތަކާއި ފަސިންޖަރުންނަށް ވަރަށް ބޮޑު ލުޔެއް ލިބޭނެ ކަމަށް ޝަމްއާން ވިދާޅުވި އެވެ.

"ކުރިން ވައިޑް ބޮޑި އެއާކްރާފްޓެއް ވިއްޔާ އެބަނަގާ 15ވަރަކަށް މިނެޓު ރަންވޭ ކްލިއާ ކުރަން. ކުޑަ އެއްޗެއް ވިއްޔާ ހަތްވަރަކަށް މިނެޓް. އެކަމަކު މި ރަންވޭ ޓެކްސީވޭއެއްގެ ގޮތުގައި ބޭނުން ކުރަން ފެށީމަ މިނެޓެއްގެ ތެރޭގައި ރަންވޭ ކްލިއާ އެބަކުރެވޭ. މިއާއެކު މަތީގައި ހޮލްޑުކޮށްގެން ތިބެން ޖެހޭ ވަގުތު މަދުވާނެ،" ޝަމްއާން ވިދާޅުވި އެވެ.

"ކުރިން ގަޑިއިރެއްގެ ތެރޭގައި އަށް އެއާކްރާފްޓަށް ޓޭކްއޮފް ލޭންޑިން ހިދުމަތް ރަންވޭއިން ލިބޭއިރު މި ބަދަލާއެކު ގަޑައިރަކު 16 އެއާކްރާފްޓަށް ހިދުމަތް ދެވޭނެ،"

މިދިޔަ މަހު ރާއްޖެއަށް ގިނަ އަދަދެއްގެ ޕްރައިވެޓް ޖެޓުތައް އައުމުން ބައެއް ޖެޓުތައް ޕާކު ކުރުމަށް ވެސް އާ ރަންވޭ ބޭނުން ކުރި އެވެ.

އެމްއޭސީއެލުން ރާވާފައިވާ ގޮތުގައި އާ ރަންވޭގައި ފްލައިޓުތައް ޖައްސަން ފެށުމުން މިހާރު ބޭނުން ކުރާ ރަންވޭ، ޓެކްސީވޭއަކަށް ބަދަލުވާނެ އެވެ.