އާ ރަންވޭ ނުހުޅުވާ މައްސަލަ މަޖިލީހުން ބަލަނީ

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ހަދާފައިވާ އާ ރަންވޭ ނުހުޅުވާ ލަސްވާ މައްސަލަ ރައްޔިތުންގެ މަޖިލީހުގެ އެސްއޯއީ ކޮމިޓީން ބަލަން ނިންމައިފި އެވެ.

އެ ކޮމިޓީން މިއަދު ބޭއްވި ބައްދަލުވުމުގައި، ދިއްދޫ ދާއިރާގެ އެމްޑީޕީގެ މެމްބަރު އަބްދުﷲ ވަހީދު ވިދާޅުވީ، އާ ރަންވޭ ހުޅުވުން ލަސްވެ، އާންމުންގެ ޝަކުވާ އިތުރުވެފައި ވާތީ އެ މައްސަލަ ކޮމިޓީން ބެލުން މުހިއްމު ކަމަށެވެ. މިކަމާ ގުޅިގެން ކޮމިޓީން ނިންމީ ވީއައިއޭ ހިންގާ ކުންފުނި، އެމްއޭސީއެލަށް ސިޓީއެއް ފޮނުވައި، ރަންވޭ ހުޅުވުމުގެ އެންމެ ފަހުގެ މައުލޫމާތު ހޯދުމަށެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ހެދި އާ ރަންވޭ ހުޅުވުން ލަސްވެފައިވަނީ ކޮވިޑާ ގުޅިގެން ކުރިމަތިވި ޑިލޭ އާއި ސީ ޕްލޭން ޓާމިނަލް އެހެން ސަރަހައްދަކަށް ބަދަލުކުރުމުގެ ތެރޭގައި އޭރު ޖެހުނު މައްސަލަތަކާ ހެދި ކަމަށް އެމްއޭސީއެލުން ބުނެފައިވެ އެވެ.

އާ ރަންވޭގެ މަސައްކަތް ނިންމައިލީ ޔާމީންގެ ފަސް އަހަރުގެ ދައުރު ނިމެން ކައިރިވެފައި ވަނިކޮށް 2018 ގަ އެވެ. އޭގެ ފަހުން ތިން އަހަރު ވީއިރު ވެސް މި ސަރުކާރަކަށް އެ ރަންވޭ ބޭނުންކުރަން ފެށޭވަރެއް ނުވި އެވެ.

އާ ރަންވޭ ބޭނުންކުރަން ލަސްވެ، އެތައް ބައެއްގެ ފާޑުކިޔުން ސަރުކާރާއި އެމްއޭސީއެލަށް އަމާޒުވިޔަސް މިދިޔަ މަހު ވަނީ އެ ރަންވޭ ޓެކްސީވޭއަކަށް ބަދަލުކޮށްފަ އެވެ. އެ ގޮތަށް ނިންމީ އާ ރަންވޭ މި ވަގުތަށް ބޭނުން ކުރެވެން ނެތުމުންނެވެ.

ކުރީގެ ސީ ޕްލެން ޓާމިނަލް ހުންނަނީ އާ ރަންވޭއާ ކައިރީގައި ކަމަށް ވާތީ، އެ ރަންވޭ އަށް ފްލައިޓްތައް ޖެއްސުމަކީ ބައިނަލްއަގްވާމީ މިންގަނޑުތަކާ ހިލާފު ކަމެކެވެ. އާ ރަންވޭ އަށް ފްލައިޓުތައް ޖެއްސެން ފެށޭނީ އާ ސީޕްލޭން ޓާމިނަލަށް ހުރިހާ ހިދުމަތެއް ބަދަލުކޮށް، ކުރީގެ އިމާރާތް ތަޅައިލުމަށް ފަހު އެވެ.

އާ ސީ ޕްލޭން ޓާމިނަލަށް ހިދުމަތްތައް ބަދަލުކުރަން އެމްއޭސީއެލުން ނިންމާފައި ވަނީ އަންނަ އޭޕްރިލް މަހުގެ އެއްވަނަ ދުވަހުގެ ނިޔަލަށެވެ.

އެމްއޭސީއެލްގެ ޕްލޭނަކީ މި އަހަރުގެ ފަހު ކޮޅު އާ ރަންވޭ ހުޅުވައިލުމެވެ. އޭރުން އާ ރަންވޭގައި ފްލައިޓުތައް ޖައްސަން ފެށުމުން މިހާރު ބޭނުންކުރާ ރަންވޭ، ޓެކްސީވޭއަކަށް ދާއިމަށް ބަދަލުވާނެ އެވެ.