އޭދަފުށީގައި 40 ދުވަހު ޖަމާއަތުގައި ފަތިސްނަމާދު ކުރުމުން ފައިސާގެ އިނާމެއް

މެދުނުކެނޑި 40 ދުވަސް ވަންދެން ޖަމާއަތުގައި ފަތިސް ނަމާދުކުރާ ކުދިންނަށް ފައިސާގެ އިނާމެއްދޭ ޕްރޮގްރާމެއް ހިންގަން ބ. އޭދަފުށީ އަތޮޅު ހޮސްޕިޓަލުގެ މުވައްޒަފުންގެ ރިކްރިއޭޝަން ކްލަބުން ނިންމައިފި އެވެ.

އެ ކްލަބުގެ ރައީސް އަލީ އަޝްރަފް "މިހާރު" އަށް ވިދާޅުވީ "40 ރޭ ފަތިސް ނަމާދު ޖަމާއަތުގައި" ގެ ނަމުގައި ކުރިއަށް ގެންދާ މި ޕްރޮގްރާމަކީ ކުދިންގެ ހިތްތަކުގައި ދީނަށް ލޯބި ޖެއްސުމާއި ނަމާދަށް އަހުލުވެރި ކުރުމަށް ކުރިއަށް ގެންދާ ޕްރޮގްރާމެއް ކަމަށެވެ.

އަޝްރަފް ވިދާޅުވީ ރަށުގައި ފަތިސް ނަމާދަށް މިސްކިތަށް ދާ ކުދިންގެ އަދަދު ވަރަށް މަދު ކަމަށެވެ. އެހެންވެ، އިނާމެއް ދީގެން އެ ކުދިން ނަމާދަށް ފަރިތަކުރުވަން މި މަހުގެ 21 ވަނަ ދުވަހު ޕްރޮގްރާމް ފަށާނެ ކަމަށް އޭނާ ވިދާޅުވި އެވެ.

މި ޕްރޮގްރާމުގައި ބައިވެރިވެވޭނީ 10-15 އަހަރާ ދެމެދުގެ ކުދިންނަށް އެކަންޏެވެ.

"މިމަހުގެ 21 ގައި ފަށައިގެން 40 ދުވަސް ހަމަވާނީ ރޯދަ މަހުގެ ފުރަތަމަ ދުވަހަށް. އެ ދުވަހު އަޅުގަނޑުމެން ބަލާނީ ކޮން ކުދިންނެއްތޯ ފަތިސް ނަމާދަށް މިސްކިތަށް އެންމެ ގިނައިން ދިޔައީ،" އަޝްރަފް ވިދާޅުވި އެވެ.

އޭނާ ވިދާޅުވީ އެންމެ ގިނައިން ފަތިސް ނަމާދަށް މިސްކިތަށް ދިޔައީ ކޮން ކުދިންނެއްތޯ ބަލާނީ އެ ކުދިންގެ މައިންބަފައިން މެދުވެރިކޮށް ކަމަށެވެ.

"އަހަރީ ދުވަސް އަންނާތީ ދީނީ ޕްރޮގްރާމެއް ފެށުމުގެ ގޮތުން އަޅުގަނޑުމެން މި ހަރަކާތް ކުރިއަށް ގެންދަނީ."

މީގެ ތިން އަހަރު ކުރިން އުފެއްދި އެ ކްލަބުން ފުރަތަމަ ފަހަރަށް ކުރިއަށް ގެންދާ މި ޕްރޮގްރާމުގައި އެއް ވަނައަށްދާ ކުއްޖަކަށް ދޭނީ 3،000ރ. އެވެ. އަދި ދެވަނައަށް ހޮވޭ ކުއްޖަކަށް 1،500ރ. ދޭން ނިންމާފައިވާއިރު ތިން ވަނައަށް 1،000ރ. ދޭނެ އެވެ.

މި ޕްރޮގްރާމުގައި ބައިވެރިވާން ބޭނުން ނަމަ، 7738033 އަށް ގުޅައިގެން މި މަހުގެ 17 ވަނަ ދުވަހު 12:00 ގެ ކުރިން ނަން ނޯޓްކުރަން ޖެހޭނެ އެވެ.