މިފްކޯ އިން ފުނައްޑޫ ގަނެފި

މެދުހެންވޭރު ދާއިރާގެ މެމްބަރު އަލީ އާޒިމާއި ކިނބިދޫ ދާއިރާގެ މެމްބަރު މުހައްމަދު ނާޝިޒްގެ ހިއްސާވާ ކުންފުންޏަކުން ބޭންކް އޮފް މޯލްޑިވްސް އިން ނެގި ލޯނެއް ނުދައްކައިގެން ވިއްކާލަން ނިންމި ތ. ފުނައްޑޫ، މިފްކޯ އަށް ގަނެފައިވާ ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން މިއަދު ވިދާޅުވެއްޖެ އެވެ.

ނަމަވެސް އެ މުއާމަލާތުގެ އަގެއް ސަރުކާރުން ހާމައެއް ނުކުރެ އެވެ.

މަސްވެރިކަމުގެ ސިނާއަތަށް ދޫކޮށްފައިވާ ފުނައްޑޫގައި މަސްގަނެ އެކްސްޕޯޓް ކުރަން ތަރައްގީ ކުރަން ފެށީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި 2004 ވަނަ އަހަރު އެވެ.

އޭގެ ފަހުން މަސްގަނެ ޕްރޮސެސް ކުރުމުގެ އެއްވެސް މަސައްކަތެއް ނުހިނގާ އެތައް އަހަރެއް ވެފައިވާ ފުނައްޑުއާ ގުޅޭ ގޮތުން ސަރުކާރުގެ ވިސްނުމަކީ ކޮބައިތޯ ބެލުމަށް ތިމަރަފުށި ދާއިރާގެ މެމްބަރު އަބްދުﷲ ރިޔާޒް ރައްޔިތުންގެ މަޖިލިހުގައި ކުރެއްވި ސުވާލަކަށް ލިޔުމުން ދެއްވި ޖަވާބުގައި މަސްވެރިކަމާ ބެހޭ ވަޒީރު ވިދާޅުވީ، މިފްކޯ އަށް ފުނައްޑޫ ހިންގިދާނެތޯ ބަލަން ފީޒިބިލިޓީއެއް ހަދައި އިކޮނޮމިކް ކައުންސިލަށް ހުށަހެޅުމަށް ރައީސް އޮފީހުން އެންގި ކަމަށެވެ.

އެ މަސައްކަތާ ގުޅޭ ފީޒިބިލިޓީ ސްޓަޑީއާ މެދު މިދިޔަ އަހަރުގެ ޑިސެމްބަރު 15 އާއި 27 ގައި މަޝްވަރާ ކޮށްފައިވާ ކަމަށާއި އެ އަށް ފަހު ނިންމީ ބީއެމްއެލުން ވިއްކުމުގެ މަރުހަލާގައިވާ ފުނައްޑޫ ކާރުހާނާ ސަރުކާރުގެ ފަރާތުން މިފްކޯ އަށް ގަތުމަށް ކަމަށް މިނިސްޓަރު ވިދާޅުވި އެވެ.

އޭނާ ވިދާޅުވިގޮތުގައި، ސަރުކާރުގެ އެ ނިންމުމާ ގުޅިގެން ބީއެމްއެލާއި މިފްކޯއާ ދެމެދު ވި އެއްބަސްވުމުގެ ދަށުން ފުނައްޑޫ ކާރުހާނާ އާއި މަސް ވިއްކުމާ ބެހޭ އެންމެހައި ކަންކަން މިފްކޯ އަށް ވަނީ ގަނެފަ އެވެ. އެ ރަށުގައި ހުރި ހުރިހާ މުދަލެއް މިފްކޯ އަށް ބަދަލު ކޮށްފައިވާ ކަމަށް ވެސް ޑރ. ހުސައިން ވިދާޅުވި އެވެ.

"...ފުނައްޑޫއާ މެދު ސަރުކާރުން ގެންގުޅޭ ވިސްނުމަކީ އެ ރަށުގައި ގާއިމް ކޮށްފައިވާ މަސް ފެސިލިޓީ އިތުރަށް ތަރައްގީކޮށް، ބަނދަރު ވެސް އިތުރަށް ތަރައްގީކޮށް، ހިންގާ ކާރުހާނާގެ ސަބަބުން ފަސޭހަކަމާއި ތަނަވަސްކަމާއި ނަފާ ލިބިގެން ދިއުން،" މިނިސްޓަރު ވިދާޅުވި އެވެ.