ރޭރު ކުރިޔަސް އަޅުގަނޑު ދީލާލަކަށް ނެތިން: އީވާ

އަންހެނުންގެ ހައްގުގައި ގަރާރެއް ހުށަހެޅުމުން އެމްޑީޕީގެ ފިރިހެން މެމްބަރުން ވަށްބަހުން އެއްޗެހި ކިޔަސް މަޖިލީހުގައި ރޭރު ނުކުރެވޭނެ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެ އެވެ.

މަޖިލީހުގައި މިއަދު ބަހުސް ކުރީ އަންހެން ކައުންސިލަރުންނާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ މެމްބަރުގެ މަސްއޫލިއްޔަތުތައް އަދާ ކުރުމުގައި ދިމާވާ ދަތިތަކަށް ހައްލެއް ގެނައުމަށް ގޮވާލައި އީވާ ހުށަހެޅުއްވި ގަރާރަކަށެވެ.

މިދިޔަ ދެ ދުވަހު ވެސް މަޖިލީހުގައި މެމްބަރުން ބަހުސް ކުރެއްވި މި މައްސަލަ އާ ގުޅޭ ގޮތުން މަޑުއްވަރީ ދާއިރާގެ މެމްބަރު އާދަމް ޝަރީފް މިއަދު ވިދާޅުވީ އީވާ މި މައްސަލަ ހުށަހެޅުއްވުމުން ބައެއް މެމްބަރުންގެ ވާހަކައިގައި ބުލީކޮށް ޖެއްސުން ކުރާ ކަމަށެވެ. އަދި މަޖިލީހުގައި އެކަންކަން އެގޮތަށް ދާނަމަ ރާއްޖެ އަށް ކުރިއެރުމެއް ނުލިބޭނެ ކަމަށް އާދަމް ޝަރީފް ވިދާޅުވި އެވެ.

އެ ވާހަކަ އަށް އިޝާރާތް ކުރައްވައި އީވާ ވިދާޅުވީ މަޖިލީހުގައި އޭނާ ރޭރު ނުކުރެވޭނެ ކަމަށެވެ.

"އަޅުގަނޑު ކިތަންމެ ރޭރު ކުރަންވެގެން އަމިއްލަ ޕާޓީގެ ފިރިހެނުން ވެސް ވައްބަހުން ނަމަވެސް އެއްޗެހި ގޮވިޔަސް ފިރިހެނެއްގެ ރޭރު ކުރުމަކަށް ދެނެއް އަޅުގަނޑެއް ދީލާލާކަށް ނެތިން،" އީވާ ވިދާޅުވި އެވެ.

އީވާ ވިދާޅުވީ މަޖިލީހުގައި އަންހެނުންގެ ހައްގުގައި ކުރާ މަސައްކަތަށް މެމްބަރުންނާއި އެހެނިހެން ގޮތް ގޮތުން އުނދަގޫތަކެއް ކުރިމަތި ކުރުވި ނަމަވެސް ފަހަތަށް ފިޔަވަޅެއް ނާޅުއްވާނެ ކަމަށެވެ. އަދި މެމްބަރުން ކުރާ މަލާމާތަކަށް ނުބައްލަވައި މަސައްކަތް ކުރައްވާނެ ކަމަށް އީވާ ވިދާޅުވި އެވެ.

"އަޅުގަނޑުގެ އުމުރުން 44 އަހަރުވެއްޖެ، ސިޔާސީ މަސައްކަތުގައި އުޅޭތާ ވިއްސަކަށް އަހަރު މި ވަނީ. އެހެންވެ އަންހެނުންނަށް ވަކާލާތު ކުރަން އަދި ބާރުވެރި ކުރުވަން ގަރާރެއް ލީމާ ކިތަންމެ މަލާމާތެއް ކުރިޔަސް ބޯލަނބާކަށް ނެތިން. ފަހަތަށް ޖެހޭކަން ނެތިން،" އީވާ ވިދާޅުވި އެވެ.

އަންހެން ކައުންސިލަރުންނާއި އަންހެނުންގެ ކޮމިޓީ އާ ގުޅޭ މައްސަލައެއް މަޖިލީހުގެ ސަމާލު ކަމަށް ގެނައުމުން އަނެއްކާ ވެސް ވަރަށް ގިނަ ވާހަަކަތަކެއް ލިބިފައިވާ ކަމަށް އީވާ ވިދާޅުވި އެވެ. އެ ގަރާރު ހުށަހެޅީ "ޖެއްސުން ކުރަން ކަމަށް" ބައެއް ކައުންސިލަރުންނަށް ހީވެއްޖެ ކަމަށް އީވާ ވިދާޅުވި އެވެ.

ނަމަވެސް މިއީ ނިޒާމް ފުރިހަމަ ކުރުމަށް ކުރާ މަސައްކަތެއް ކަމަށާއި އިންތިހާބުކޮށްފައިވާ އަންހެން ބޭފުޅުންނަށް އެ ފަރާތްތަކުގެ ޒިންމާ އަދާ ކުރުމަށް ފުރުސަތު ދިނުމުގެ ގޮތުން ކުރާ މަސައްކަތެއް ކަމަށް އީވާ ވިދާޅުވި އެވެ.

މިއަދު އަންހެން ކައުންސިލަރުންތަކެއް އިންތިހާބުކޮށްފައި އެ މީހުންނާ ފުރައްސާރަ ކުރަންށާ އެ މީހުން ކުޑަ ކުރަންށާ އެ މީހުން އޮއްބާލަން މަސައްކަތް ކޮށްފިއްޔާ އެތަން ބަލަން ތިބި އަންހެން ކުދިން އެ މީހުންގެ މުސްތަގުބަލުގައި ނިކުންނަން ޖެހިލުން ވާނެ،" އީވާ ވިދާޅުވި އެވެ.

އީވާ ހުށަހެޅުއްވި އެ ގަރާރަށް ބަހުސް ކުރެއްވި ހުރިހާ މެމްބަރުން ވަނީ އެކަމަށް ތާއީދު ކޮށްފަ އެވެ. އަދި ލާމަރުކަޒީ ކޮމިޓީ އަށް އެ މައްސަލަ ފޮނުވައިގެން އިތުރަށް ދިރާސާކޮށް ގާނޫނުތަކަށް ގެންނަން ޖެހޭ ބަދަލުތައް ގެންނަން ވެސް ވަނީ ނިންމައިފަ އެވެ.