ކުއްޖަކު މި ހޯދަނީ އެންމެ ބޭނުންވި ވަގުތު: ސޯނަމް

ކައިވެނީގެ ކުރީކޮޅު ކުއްޖަކު ހޯދުމުގެ ބަދަލުގައި، ދެ ވަރަކަށް އަހަރު ފަހުން ކުއްޖަކު ހޯދަން ނިންމީ ދެމަފިރިން އެކުގައި ވަގުތު ހޭދަކުރަން ބޭނުންވާތީ ކަމަށް ސޯނަމް ކަޕޫރް އަހޫޖާ ބުނެފި އެވެ.

މިދިޔަ މަހު ބަލިވެއިން ޚަބަރު ހިއްސާކުރި ސޯނަމް ބަނޑުބޮޑުވި ފަހުން ވޯގް އިންޑިއާ އަށް ދިން ފުރަތަމަ އިންޓަވިއުގައި ބުނީ މާބަނޑުވުމުގެ ސަބަބުން ވަރަށް އުނދަގޫތަކާ ވެސް ކުރިމަތިލާން ޖެހޭ ކަމަށެވެ. އެއީ އެއްވެސް މީހަކު މިކަމުގައި ހުރި އުނދަގޫތަކުގެ ވާހަކަ މީގެ ކުރިން ކިޔައިދީފައި ނުވާތީ ކަމަށެވެ.

ސޯނަމް ބުނީ ކުއްޖަކު ހޯދަން އެ ދެމަފިރިން ނިންމީ ވަރަށް ބޮޑަށް ޕްލޭންކުރުމަށް ފަހުގައި ކަމަށެވެ. ކައިވެނީގެ ފުރަތަމަ ދެ އަހަރު ކުއްޖަކު ނުހޯދަން ކުރިން ވެސް ތިބީ ނިންމައިގެން ކަމަށް ބުންޏެވެ. އެއީ ކުއްޖަކު ލިބުމުން އެކަކު އަނެކަކަށް ދެވޭނެ ވަގުތު ކުޑަވެދާނެތީ ކަމަށެވެ. އަދި ކުއްޖަކު މި ހޯދަނީ އެންމެ ބޭނުންވި ވަގުތުގައި ކަމަށެވެ.

އެ ދެމަފިރިންގެ ކައިވެންޏަށް މި އަހަރު ހަތަރު އަހަރުވާނެ އެވެ. ކުއްޖަކު ހޯދަން މަސައްކަތް ކުރަނިކޮށް، އެ ނަސީބު ލިބުމަކީ ވަރަށް ބޮޑު ނިއުމަތެއް ކަމަށް ވެސް ސޯނަމް ބުންޏެވެ.

ސޯނަމް އާއި އަނަންދު އަހޫޖާ ކައިވެނިކުރީ މެއި 8، 2018 ގަ އެވެ. އަދި އޭގެ ފަހުން ފިލްމީ މަސައްކަތްތަކާ ވަރަށް ބޮޑަށް ދުރަށް ގޮސްފައިވާ ސޯނަމް، ދިރިއުޅެމުން އައީ ވެސް ފިރިމީހާއާ އެކު ލަންޑަނުގަ އެވެ.