2023 ކާމިޔާބު ކުރުމުގެ އިތުބާރު އުފެއްދޭނީ އަޅުގަނޑަށް: އިންތި

އެމްޑީޕީއަށް އަންނަ އަހަރުގެ ރިޔާސީ އިންތިހާބު ކާމިޔާބު ކުރެވޭ ވަރުގެ އިތުބާރެއް ޕާޓީއަށް އުފެއްދޭނީ ޗެއާޕާސަން ކަމަށް އޭނާ އިންތިހާބުކޮށްގެން ކަމަަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެ އެވެ.

އިންތިހާބާ ގުޅޭ ގޮތުން މިދިޔަ އަންގާރަދުވަހު "މިހާރު"އަށް ދެއްވި ހާއްސަ އިންޓަވިއުގައި އިންތި ވިދާޅުވީ ވާދަވެރިޔާ، އިކޮނޮމިކް މިނިސްޓަރު ފައްޔާޒް އިސްމާއިލް (ފަޔާ) އާއި އޭނާގެ ޓީމު އެމްޑީޕީގެ ފިކުރާ ދުރު ކަމަށެވެ. އެއާއެކު ބޮޑެތި ތުހުމަތުތަކެއް އަމާޒުކުރައްވައި ވިދާޅުވީ އެއީ އެމްޑީޕީ އުފެއްދި އަސްލާ ގުޅޭ ސިފަތަކެއް ނޫން ކަމަށެވެ.

"އަޅުގަނޑުމެންގެ މި ފިކުރާ ދުރަށް ދާ ތަން ހަމައެކަނި މި އިންތިހާބަށް ބަލާލިއަސް ވާދަވެރި ކެންޑިޑޭޓުންގެ ފަރާތުން އެބަ ފެނޭ. ކެމްޕޭނުގައި އެބަ ފެނޭ. އެބަ ވިދާޅުވޭ ރަށްތަކަށް ވަޑައިގެން ވަޒީރަށް ވޯޓު ނުދީފިއްޔާ ރަށް ފަޅުވާނެއޭ. މިއީކީ ހަމަ ގައިމު ވެސް އެމްޑީޕީގެ ފިކުރެއް ނޫން،" އިންތި ވިދާޅުވި އެވެ.

ވައްކަމާއި ހިޔާނާތާއި ނުފޫޒު ތުހުމަތު ތަކުރާރުކޮށް އިންތި ކުރެއްވިޔަސް، ފަޔާ ވަނީ އެކަން ދޮގުކުރައްވައިފަ އެވެ.

އިންތި ވިދާޅުވި ގޮތުގައި އެމްޑީޕީއަށް އިންތިހާބު ކާމިޔާބުވާން އޮތީ ތިލަފަތުގެ ރަމްޒުކަމަށްވާ އިންސާފާއި ހަމަހަމަކަމާއި އަދުލު އިންސާފު ގާއިމްކޮށް، ޕާޓީގެ އާއްމު މެމްބަރުންގެ އިތުބާރު އުފައްދައިގެންނެވެ. އެކަން ކުރެއްވޭނީ އެމްޑީޕީގެ ފިކުރަށް ލޮޅުން ނާރުވައި ހުންނެވި އޭނާއަށް ކަމަށް ވިދާޅުވި އެވެ.

"އެމްޑީޕީގެ އުސޫލްތައް ހިފަހައްޓައި އަމުދުން ވައްކަމާއި ހިޔާނާތާއި ދުރު ޕާޓީއަކަށް ހަދަން ޖެހޭ. އެމްއެމްޕީއާރުސީގެ މައްސަލަތައް ބަލަން ޖެހޭ. މާލޭގެ ރައްޔިތުންނަށް ބޯހިޔާވަހިކަން ކަށަވަރުވާން ޖެހޭ އިތުބާރެއް ނުއުފުއްދޭނެ އެ ނޫން ގޮތަކަށް. އަސާސްތައް ނަގަހައްޓަން ޖެހޭނެ. ވަޒީފާގެ ބިރު ދެއްކިގެންދާނެ. ވަޒީރުންނާ ގުޅިފައިވާ ކުންފުނިތަކުން ކޮރަޕްޝަންތައް ހިންގި ކަމުގެ ތުހުމަތު ނުބެލޭ ގޮތަށް އޮވެގެން ނުވާނެ. މިއީ ކުދިކުދި ކަންކަން މި ދެންނެވީ، އިތުބާރު އުފައްދައިގެން ނޫން ގޮތަށް 2023 ނުލިބޭނެ،" އޭނާ ވިދާޅުވި އެވެ.

"ބަރުލަމާނީއަކީ ވަރަށް ސަޅި، ހެޔޮ ނިޒާމެއް"

އިންތި އާއި އޭނާގެ ފެކްޝަންގެ އަމާޒަކީ 2023 އެމްޑީޕީއަށް ގެއްލުވާލުން ކަމުގެ ތުހުމަތު ދޮގުކުރެއްވި އެވެ.

"ރައީސް ނަޝީދުގެ ވިސްނުންފުޅެއް ނޫން، އަޅުގަނޑު ވެސް އަދި ރާއްޖޭގައި އެމްޑީޕީއަށް ތާއީދުކުރާ އެކަކު ވެސް ވިސްނުމެއް ނޫން އަޅުގަނޑުމެންނަށް 2023 ގެއްލުވާލުމަކީ. އެންމެން މި ބާރުއަޅަނީ 2023 ކަށަވަރުވާނީ އަޅުގަނޑުމެން ރައްޔިތުންނަށް ވީ ވައުދުތައް ފުއްދައިގެންނޭ. މި ދެންނެވި އެމްޑީޕީ ނޫން ސިފަތަކުން ސަލާމަތްވެގެންވާ ޕާޓީއަކަށް ވެގެންނޭ. ވައްކަން ހިޔާނާތް ބޮޑު ވައުދެއް. ބެލިއްޖެތޯ. ނުބެލޭ،" އިންތި ވިދާޅުވި އެވެ.

އެމްޑީޕީގެ ރިޔާސީ ޕްރައިމަރީގައި ތާއީދުކުރައްވާނެ ބޭފުޅެއް ސާފުކޮށް، ނަޝީދާ އަރިސް އަދި މި އިންތިހާބުގައި އެމަނިކުފާނުގެ ތާއީދު އޮތް އިންތި ވިދާޅެއް ނުވެ އެވެ.

އިންތި ވިދާޅުވީ އޭނާ ގަބޫލުކުރައްވަނީ ނަޝީދާއި ރައީސް އިބްރާހިމް މުހައްމަދު ސޯލިހާ ދެ ބޭފުޅުން ވެސް އިންތިހާބަށް ނުކުންނަވާނެ ކަމަށެވެ. އެކަމަކު އޭގެ ކުރިން ޕާޓީން ކުރަން ޖެހޭ ކަންކަން ގަރާރެއްގެ ސިފައިގައި ޕާޓީއަށް ހުށަހަޅާފައިވާ ކަމަށް ވިދާޅުވެ ނިޒާމަށް ބަދަލު ގެނައުމުގެ ވާހަކަ އިން މިސާލު ޖެއްސެވި އެވެ.

"ޕާޓީން ވަކާލާތުކުރާ ކަމެއް ވެރިކަމުގެ ނިޒާމާ ގުޅޭ ގޮތުން ރައްޔިތުން ދެކޭ ގޮތެއް ބެލުން. އެއީ ވެސް ކުރެއްވިދާނެ ކަމެއް،" އިންތި ވިދާޅުވި އެވެ.

އެމްޑީޕީ ކޯލިޝަނަކުން 2023 ގައި ވާދަކުރާކަށް ނަޝީދެކޭ އެއްގޮތަށް އިންތި ވެސް ތާއީދެއް ނުކުރެއްވަ އެވެ. އޭނާގެ ތާއީދު ބަރުލަމާނީ ނިޒާމަކަށް ފުރިހަމައަށް އޮތް ކަމަށް ވިދާޅުވި އެވެ.

"ބަރުލަމާނީ ނިޒާމަކީ އެމްޑީޕީން މާ ކުރިއްސުރެން ޕާޓީންް އެންމެން ކަހަލަ ގޮތަކަށް ތާއީދުކުރަމުން އައި ނިޒާމަކަށް. ގައުމީ މަޖިލީހަށް ވެސް އެކަން ހުށަހެޅިފައިވޭ. ނަމަވެސް މިއީ އާއްމު ވޯޓަކާއި ރައްޔިތުން ބަސްބުނާ ގޮތަކާއި އެންމެންނަށް އެއްބަސްވެވޭ ގޮތަށް އޮތް ކަމެއް. ބަރުލަމާނީ ނިޒާމަކީ އޭގެ ޒާތުގައި ވަރަށް ސަޅި، ހެޔޮ ނިޒާމެއް،" އިންތި ވިދާޅުވި އެވެ.

"ރިޔާސީ އިންތިހާބުގެ ކުރިން ވެސް މިސާލަކަށް، އަޅުގަނޑުމެން ވިސްނާފައި މިއޮތީ ކޯލިޝަނަކާ އެކުގައޭ ވެރިކަމަށް އަންނަން ގަސްތުކުރަނީ ވިސްނާކަން އެނގޭ ނަމަ ނުވަތަ ވިސްނާފައި އޮތް ކަން އެނގޭ ނަމަ ވަރަށް ނުބައި ނަތީޖާއެއް އެބަ ނުކުމޭ. މިހާރުއްސުރެން އެހެން ޕާޓީތަކުގެ ޑިމާންތައް އެބަ މައްޗަށް އެބަދޭ. އެއީ ވަޒީފާ އާއި އެ ނޫން ވެސް ފައިދާކުރާނެ ޑިމާންޑްތައް. ޕާޓީގެ ވަރަށް ގިނަ ކަންކަން މިކަމާ ހެދި ކޮމްޕްރޮމައިޒްވެގެންދާނެ،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި ސިޔާސީ ޕާޓީތަކުގެ ކޯލިޝަނަކުން އުފެދުނު މި ވެރިކަމުގައި އެމްޑީޕީ އަށް 40 ޕަސެންޓް، އެހެން ޕާޓީތަކަށް 60 ޕަސެންޓް ދިނުމަކީ ހިތްފަޅައިގެންދާ ވަރުގެ ކަމެކެވެ. ޕާޓީގެ އާއްމު މެމްބަރުންނަށް ގަބޫލު ކުރެއްވޭ ކަމެއް ނޫން ކަމަށް ވިދާޅުވި އެވެ.

"މިއީތޯ އަޅުގަނޑުމެން އަދިވެސް މި ޕާޓީ ކުރިއަށްދާން ވިސްނާފައި އޮތް ގޮތަކީ،" އިންތި ވިދާޅުވި އެވެ.