ރާއްޖެ އެތެރެކުރި ހަތަރު ކިލޯގެ މަސްތުވާތަކެތި އަތުލައިގެންފި

ތުރުކީ މީހަކު ރާއްޖެ އަށް އެތެރެކުރި ހަތަރު ކިލޯގެ މަސްތުވާތަކެތި އަތުލައިގެންފި އެވެ.

ކަސްޓަމްސް އިން މިއަދު ބުނީ ރާއްޖެ އައި ތުރުކީ ފިރިހެނެއްގެ ލަގެޖު ބަލައި ފާސްކުރިއިރު 4.2 ކިލޯގެ މަސްތުވާތަކެތި ފެނިފައިވާ ކަމަށެވެ. އަދި އެ ތަކެތި ތަހްލީލު ކުރުމުން މަސްތުވާތަކެތީގެ ބާވަތެއް ކަމަށްވާ ކޮކެއިން އަށް ޕޮޒިޓިވްވެފައިވާ ކަމަށް ވެސް ކަސްޓަމްސް އިން ބުންޏެވެ.

ތުރުކީގެ ސުއަޓް އިސިކްލީ, 56, ގެ ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން ކޯޓުގައި އޭނާ ބުނީ އޭނާ ރާއްޖެ އައީ މަސައްކަތް ކުރަން ކަމަށާއި އޭނާގެ ފޮށީގައި ހުރި މަސްތުވާތަކެއްޗާ އޭނާއާ ގުޅުމެއް ނެތް ކަމަށެވެ. އަދި ހަނު ހުުރުމުގެ ބަދަލުގައި ފުލުހުންނަށް އެއްބާރުލުން ދީފައިވާ ކަމަށާއި އޭނާއަކީ ތުރުކީގައި ވެސް އެއްވެސް ކޯޓަކަށް ހާޒިރުކޮށް ނުވަތަ މައްސަލައެއް ހުށަހެޅިފައިވާ މީހެއް ނޫން ކަމަށް ވެސް އޭނާ ބުންޏެވެ.

ފުލުހުން އެދުނީ ޝަރީއަތް ނިމެންދެން އޭނާ ބަންދުގައި ބަހައްޓައިދިނުމަށެވެ.

ނަމަވެސް އޭނާ ވަކީލެއްގެ ފުރުސަތަށް އެދިފައިވާތީ އާއި މައްސަލައަކީ ދައުވާކުރުމަށް ހުށަހެޅިފައިވާ މައްސަލައަކަށް ނުވާތީ އާއި ޝަރީއަތް ނިމެންދެން ބަންދުގައި ބެހެއްޓުމާ މެދު ގޮތެއް ނިންމަވާނީ މައްސަލަ މައުލޫއީ ގޮތުން ބައްލަވާ ފަނޑިޔާރު ކަމަށް އިއްޔެ ބޭއްވި މުއްދަތު ޖެހުމުގެ މަޖިލީހުގައި ގާޒީ ދީބާނާޒް ފަހުމީ ވިދާޅުވި އެވެ. އެހެންވެ އޭނާގެ ބަންދަށް ދިނީ 15 ދުވަހެވެ.