ފީގެ ގޮތުގައި ވެމްކޯ އަށް 42 މިލިއަނަށް ވުރެ ގިނަ ރުފިޔާ ނުލިބި

ކުނި ނެގުމަށް ފަހު ފީގެ ގޮތުގައި 42 މިލިއަނަށް ވުރެ ގިނަ ރުފިޔާ ނުލިބި އެބަހުރި ކަމަށް ވެމްކޯއިން މިއަދު ބުނެފި އެވެ.

އަންނަ މަހުން ފެށިގެން ކުނި ވަކި ކޮށްގެން އުކާލަން ނިންމުމާ ގުޅިގެން، އެކަމުގެ މައުލޫމާތު ދިނުމަށް ބޭއްވި ނިއުސް ކޮންފަރެންސްގައި ވެމްކޯގެ ޑެޕިއުޓީ މެނޭޖިން ޑިރެކްޓަރު ޔޫސުފް ސިރާޖު ވިދާޅުވީ ބިލްތަކަށް ފައިސާ ނުދައްކާ މައްސަލަ އަށް ދާއިމީ ހައްލެއް ގެނައުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ.

ކަމާ ގުޅޭ ހުރިހާ އިދާރާއަކުން ވެސް އެއްބަސްވަނީ، ސިރާޖު ވިދާޅުވި ގޮތުގައި، ފީ ނުދައްކާ މައްސަލައަށް ގާނޫނީ ހައްލެއް ހޯދާށެވެ.

އޭނާ ވިދާޅުވީ ކުނި އުކާލައިގެން ވެމްކޯ އަށް 42 މިލިއަނަށް ވުރެ ގިނަ ރުފިޔާ ލިބެންޖެހޭ ކަމަށެވެ. އެހެންވެ، އެ ގޮތަށް ހުރި ބިލްތައް ސަސްޕެންޑުކޮށް ރަނގަޅު ޑާޓާ އެއްކުރުމުގެ މަސައްކަތް ކުރަމުން އަންނަކަމަށް ވެސް ސިރާޖު ވިދާޅުވި އެވެ.

"މިކަން ފަށައިގެން އައި އިރު ރެޖިސްޓްރޭޝަން ޕްރޮސެސްގެ ކަންތައްތައް ދިޔައީ އެންމެ ރަނގަޅަކަށް ނޫން. އެންމެ އެކަށީގެންވާ ގޮތަކަށް އެކަން ނުކުރެވޭ، އަޅުގަނޑުމެންގެ ރިކޯޑުން އެބަ ދައްކާ އެ ކަންތައްތައް. އަޅުގަނޑުމެން މެނޭޖްމަންޓުން ވެސް އެކަން ގަބޫލުކުރަން. އެ ޑާޓާތައް ކްލިއަކުރުމުގެ މަސައްކަތް ވަރަށް ބާރަށް އެބަ ކުރިއަށް ގެންދެވޭ،" ސިރާޖު ވިދާޅުވި އެވެ.

"އެއާއެކު، އަޅުގަނޑު އުއްމީދުކުރަނީ އެ އަދަދު ވެސް ކުޑަވެގެން ދާނެ ކަމަށް."

ކުނި އުކާލައިގެން އެތައް މިލިއަން ރުފިޔާއެއް ނުލިބި ހުއްޓަސް، ގިނަ ބަޔަކު ފީ ދައްކަމުން އަންނަ ކަން ވެސް އޭނާ ފާހަގަކުރެއްވި އެވެ.

ސިރާޖު ވިދާޅުވީ އެ ކުންފުނީގައި ރަޖިސްޓްރީވެފައިވާ މާލޭގެ ގޭބިސީތަކުގެ 80-90 ޕަސެންޓް ގޭބިސީން މިހާރު ބަރާބަރަށް ފީ ދައްކާ ކަމަށެވެ.

އެންވަޔަރްމަންޓް މިނިސްޓަރު އާމިނަތު ޝައުނާ ވިދާޅުވީ ޔުޓިލިޓީ ބިލްތަކާއެކު ކުނީގެ ބިލް ވެސް ހިމެނުމަށް ރައްޔިތުންގެ މަޖިލީހަށް ހުށަހަޅާފައިވާ ވޭސްޓް މެނޭޖްމަންޓް ބިލުގައި ހިމަނާފައިވާނެ ކަމަށެވެ.

އޭރުން މައްސަލައަށް ހައްލެއް ލިބޭނެ ކަމަށް އެ ބޭފުޅުން އުއްމީދުކުރައްވަ އެވެ.