ޕީޖީ އޮފީހުގެ "ލެތުން" ޑޭޓާބޭސް އިފްތިތާހުކޮށްފި

ޖިނާއީ އަދުލުގެ ނިޒާމާ ގުޅުންހުރި ގާނޫނުތަކާއި ގަވާއިދުތަކާއި އުސޫލުތައް އެއްތަނަކުން ފެންނަން ހުންނާނެ ގޮތަށް ޕްރޮސެކިއުޓާ ޖެނެރަލްގެ އޮފީހުން އެކުލަވާލި "ލެތުން" މިއަދު އިފްތިތާހު ކޮށްފި އެވެ.

ހ. މީރުމާގައި މިއަދު ބޭއްވި ރަސްމިއްޔާތެއްގައި މި ޑޭޓާބޭސް އިފްތިތާހުކޮށްދެއްވީ ސުޕްރީމް ކޯޓުގެ ފަނޑިޔާރު ހުސްނުއް ސުއޫދެވެ.

މި ރަސްމިއްޔާތުގައި ޕީޖީ އޮފީހާއި ޔޫއެންޑީޕީ ގުޅިގެން ތައްޔާރުކޮށްފައިވާ ހަ އޯޑިއޯ/ވީޑިއޯ ފޮތެއް ވެސް ވަނީ ނެރެފަ އެވެ. މި ފޮތްތަކަކީ ޖިނާއީ އަދުލުގެ ނިޒާމާ ގުޅިގެން އާއްމުން ހޭލުންތެރިކުރުވުމުގެ ގޮތުން ނެރުނު ހަ ފޮތެެވެ.

އެ ރަސްމިއްޔާތުގައި ހުސްނުއްސުއޫދު ވިދާޅުވީ މިއަދު ތައާރަފުކުރި މައުލޫމާތުތަކާއި ތަފާސްހިސާބުތަކަކީ ވަރަށް މުހިންމު އެއްޗެއް ކަމަށެވެ.

ޝަރީއަތުގެ މަޖިލީހުގައި ކުއްލިއަކަށް ވެސް މައުލޫމާތެއް ހޯދާލަން ޖެހިދާނެކަން ފާހަގަކުރައްވަމުން ވިދާޅުވީ މިހާރު ބައެއް ފަހަރަށް ހޯދަން އުޅޭ އެއްޗެއް ނުފެންނަ ފަހަރު ވެސް އަންނަ ކަމަށެވެ. ނަމަވެސް، މިއަދު މި އިފްތިތާހު ކުރި ޕްރޮޖެކްޓަކީ އެ ކަމަށް ހައްލެއް ކަމަށް ސުއޫދު ވިދާޅުވި އެވެ.

"އަޅުގަނޑުމެންގެ އަދުލުގެ ނިޒާމު ޓްރާންސްޕޭރެންޓުވެ މައްސަލަތައް ދެނެގަންނަން ބޭނުންވާނެ ވަސީލަތަކަށް މި ޕްރޮޖެކްޓް ވާނެ،" ސުއޫދު ވިދާޅުވި އެވެ.

އަދުލުގެ ނިޒާމުގައި ހުރި މައްސަލަތަކާއި ކޯޓުތަކުގެ މައްސަލަތައް ހައްލުކުރަން ވެސް ތަފާސް ހިސާބަކީ ވަރަށް މުހިންމު އެއްޗެއް ކަމަށް ހުސްނުއްސުއޫދު ފާހަގަ ކުރެއްވި އެވެ.

އެ ޑޭޓާބޭސް އިން ޖިނާއީ އަދުލުގެ ނިޒާމުގެ ކޮންމެ ގާނޫނެއް، ގަވާއިދެއް އަދި އުސޫލެއް ވެސް ސާޗު ކޮށްލައިގެން ބަލާލެވޭނެ އެވެ. އަދި ވަކި ބަހެއް ސާޗުކޮށްލަން ބޭނުންވި ނަމަވެސް މި ޑޭޓާ ބޭސް އިން ބަލާލެވޭނެ އެވެ.