ކުނޫޒްގައި ބޭއްވި ޖަލްސާއަށް އަމާޒުކޮށް، ބޮމެއް ގޮއްވާލަން ރޭވި: ދައުލަތް

އޭޕްރީލް، 2017 ގައި ޖުމްހޫރީ ޕާޓީގެ މައިޖަގަހަ ކަމަށްވާ މ. ކުނޫޒުގައި ބޮމެއް ގޮއްވާލަން ރޭވި ކަމަށް ދައުލަތުން ކްރިމިނަލް ކޯޓުގައި މިއަދު ބުނެފި އެވެ.

އައިއީޑީއެއް ތައްޔާރުކޮށްގެން ގޮއްވާލަން ރޭވި ކަމަށް ބުނެ 2017 ވަނަ އަހަރު ހައްޔަރުކޮށް، ދައުލަތުން ޓެރަރިޒަމްގެ ދައުވާކުރަނީ ހަތަރު މީހެއްގެ މައްޗަށެވެ.

އެއީ ގދ. މަޑަވެލީ ގަމަރީ އިއުތިސާމް މުހައްމަދު ސައީދާއި ހއ. ހޯރަފުށީ އަލަނާސިގޭ މުހައްމަދު ތަސްލީމާއި އެރަށު ވިދުވަރުގޭ ނާސިއު މުހައްމަދުގެ އިތުރުން ހދ. ނާވައިދޫ ރިވެލި، ޝިމާން ޝަރީފްގެ މައްޗަށެވެ.

އެ މައްސަލާގެ އަޑުއެހުންތައް ސިއްރުކޮށްގެން ގެންދިއުމަށްފަހު އާންމުކޮށް ހުޅުވާލީ މިއަދެވެ. މިއަދުގެ އަޑުއެހުމުގައި ދައުލަތުން ބުނިގޮތުގައި އެ މީހުން ރޭވީ ކުނޫޒުގައި ޖަލްސާއެއް ބާއްވަމުން ދަނިކޮށް އެތަނުގައި އެއްޗެއް ގޮއްވާލަން ކަމަށެވެ.

އެ ހަތަރު މީހުންގެ ތެރެއިން ނާސިއު ފިޔަވައި ދެން ތިބި މީހުން ވަނީ ދައުވާއަށް އިންކާރުކޮށްފަ އެވެ. ނާސިއުގެ ބައި މިއަދު ކުރިއަކަށް ނުގެންދެ އެވެ.

އެ މީހުން ދައުވާއަށް އިންކާރު ކުރުމުން އެ މީހުންނާ ދެކޮޅަށް ހުރި ހެކިތަކެއް ދައުލަތުން ހާމަކުރި އެވެ. އަދި މަދަނީ މިންގަނޑުން ހެކިތަކަށް ބަލާއިރު އެ ދައުވާ ކުރިއަށް ގެންދެވޭނެ ކަމަށް އެ މައްސަލަ ބައްލަވާ ގާޒީ އަލީ ނަދީމް ނިންމެވި އެވެ.

އޭޕްރީލް، 2017 ގައި ކުނޫޒުގައި އެއްޗެއް ގޮއްވާލަން ރޭވި ކަމަށް ދައުލަތުން ބުނާއިރު އެދުވަސްވަރަކީ އެމްޑީޕީ އާއި ޖުމްހޫރީ ޕާޓީ އާއި އަދާލަތު ޕާޓީ އާއި ކުރީގެ ރައީސް މައުމޫން އަބްދުލްގައްޔޫމް ގުޅިވަޑައިގެން އިދިކޮޅު ކޯލިޝަންގެ ޖަލްސާތައް އޭރު ކުނޫޒުގައި ބާއްވަމުން ދިޔަ ދުވަސްވަރެވެ.