ހަތިޔާރު ކޮންޓްރޯލް ކުރާ ބިލް، ފުރަތަމަ ހުރަސް ގިރާކޮށްފި

އެމެރިކާގައި އާންމު ރައްޔިތުން ހަތިޔާރު ގެންގުޅުމަށް ހުއްދަ ދޭ މިންގަނޑު ހަރުކަށިކޮށް، ހަތިޔާރުގެ ބޭނުންހިފުން ކޮންޓްރޯލްކުރުމަށް ސަރުކާރުގެ ފަރާތުން، އެ ގައުމުގެ ގާނޫނު ހަދާ މަޖިލީހަށް ހުށަހެޅި ބިލް، އޭގެ ފުރަތަމަ ހުރަސް ގިރާކޮށްފި އެވެ.

އެ ގޮތުން އެމެރިކާގެ ގާނޫނު ހަދާ މަޖިލީހުގެ މަތިގެ އިން އިއްޔެ ވަނީ، ދެ ޕާޓީން ވެސް ތާއީދުކުރާ އަވަސް ބިލެއްގެ ގޮތުގައި ބަލައިގެނެ، ބިލްގެ ކަންތައް އަވަސްކުރުމަށް ފާސްކޮށްފަ އެވެ. އެހެންކަމުން، ގާނޫނު ހަދާ މަޖިލީހުގެ މަރުހަލާތައް ކަޑައްތުކޮށް، މިއަންނަ ހަފުތާގެ ތެރޭގައި އެމެރިކާގެ ރައީސް ޖޯ ބައިޑެން އެ ބިލް ތަސްދީގުކުރައްވައި ގާނޫނަކަށް ހެއްދެވުމުގެ ފުރުސަތު ބޮޑެވެ.

މިހާރު ހުށަހަޅާފައި އޮތް ބިލް ޑްރާފްޓް ކޮށްފައި އޮތީ، ހަތިޔާރު ކޮންޓްރޯލް ކުރުމަށް ގޮވައިލާ މަދަނީ ޖަމިއްޔާތަކުންނާއި، ވެރިކަން ކުރާ ޑިމޮކްރެޓިކް ޕާޓީން ބޭނުންވާ ހުރިހާ ފިޔަވަޅުތަކެއް ނުހިމަނައި ކަމަށް ވިޔަސް، އެ ބިލް މިހާރު އޮތް ގޮތަށް ފާސްކުރުން މުހިންމު ކަމަށް، ޑިމޮކްރެޓިކް ޕާޓީން ވެސް ދެކެ އެވެ.

މި ބިލްގައި ހިމަނާފައިވާ ކަންކަމުގެ ތެރޭގައި، ހަތިޔާރު ގަންނަ މީހަކީ އުމުރުން 21 އަހަރުން ދަށުގެ މީހެއް ނަމަ، ހަތިޔާރު ވިއްކުމުގެ ހުއްދަ ދިނުމުގެ ކުރިން، އެމީހެއްގެ މާޒީގެ ކަންތައް ރަނގަޅަށް ވަޒަންކުރަންޖެހޭނެ އެވެ. އޭގެ އިތުރުން ހަތިޔާރުގެ ނާޖާއިޒު ބޭނުން ހިފުން ހުއްޓުވުމުގެ ގޮތުން ވެސް އިތުރު ފިޔަވަޅުތަކެއް އެޅުމަށް އެ ބިލްގައި ހިމަނާފައިވެ އެވެ.

އޭގެ ތެރޭގައި، ހަތިޔާރު ގެންގުޅޭ މީހުންނަށް ނަފްސާނީ ދުޅަހެޔޮކަމުގެ ޕްރޮގްރާމްތައް ހިންގުމަށާއި، ސްކޫލްތަކުގެ ސަލާމަތީ ކަންތައް ހަރުދަނާ ކުރުމުގެ ގޮތުން، ބަޖެޓްގައި 12 ބިލިއަން ޑޮލަރު ހިމެނުމަށް ހުށަހަޅާފައިވެ އެވެ. އޭގެ އިތުރުން، ހަތިޔާރު ގެންގުޅުމުގެ ހުއްދަ އަށް އެދޭ މީހާ އަކީ، އޭނާގެ ލޯބިވެރިޔާ އަށް ގޯނާ ކުރުމުގެ އަމަލެއް ސާބިތުވެފައިވާ މީހެއް ނަމަ، އެމީހަކަށް ހަތިޔާރު ނުވިއްކުން ހިމެނެ އެވެ.

އާންމުންނަށް ހަތިޔާރު ވިއްކުމާއި ހަތިޔާރު ގެންގުޅުން ކޮންޓްރޯލް ކުރުމަށް މީގެ ކުރިން ވެސް އެމެރިކާގެ ގާނޫނު ހަދާ މަޖިލީހަށް އެކި ފަހަރު މަތިން ބިލްތައް ހުށަހަޅާފައިވެ އެވެ. ނަމަވެސް، މިހާރު ހުށަހަޅާފައިވާ ބިލަށް ތާއީދުކުރި ވަރަށް، މީގެ ކުރީގެ އެއްވެސް ބިލަކަށް ރިޕަބްލިކަން ޕާޓީން ވެސް އަދި ޑިމޮކްރެޓިކް ޕާޓީން ވެސް ތާއީދު ކޮށްފައެއް ނެތެވެ.

ސެނެޓްގައި ރިޕަބްލިކަން ޕާޓީ ތަމްސީލުކުރައްވާ އިސް މެމްބަރެއް ކަމަށްވާ ކްރިސް މާފީ ވިދާޅުވި ގޮތުގައި މި ބިލަކީ، ހަތިޔާރު ކޮންޓްރޯލްކުރުމާ ގުޅޭ ގޮތުން މިދިޔަ 30 އަހަރުގެ ތެރޭގައި އެމެރިކާގެ ގާނޫނު ހަދާ މަޖިލީހުން ފާސްކުރި އެންމެ ވަރުގަދަ ބިލަށް ވެގެންދާނެ އެވެ.

ސެނެޓްގެ ޑިމޮކްރެޓިކް ޕާޓީގެ ލީޑަރު ޗަކް ޝޫމާ ވިދާޅުވީ މި ބިލް މަޖިލީހުން ފާސްވުމަކީ، ހަތިޔާރު ކޮންޓްރޯލް ކުރުމުގެ މަސައްކަތަށް ލިބޭނެ ވަރަށް ބޮޑު ކުރިއެރުމެއް ކަމަށާއި އަދި މި ބިލްގެ ސަބަބުން ފުރާނަތަކެއް ސަލާމަތް ކުރެވޭނެ ކަމަށެވެ. ބޭނުންވާ ހުރިހާ ކަމެއް މި ބިލްގައި ހިމެނިފައި ނެތަސް، މިވަގުތަށް މިއީ ވަރަށް މުހިންމު ބިލެއް ކަމަށް ވެސް އޭނާ ވިދާޅުވި އެވެ.