ރެއާލްގެ ކޮންޓްރެކްޓް ހަމަވުމުން ބޭލް އެމެރިކާ ލީގަށް ބަދަލުވަނީ

ކާޑިފް (ޖޫން 26) - ވޭލްސްގެ ގައުމީ ޓީމުގެ ކެޕްޓަން ގަރެތު ބޭލް، ސްޕެއިންގެ ރެއާލް މެޑްރިޑާއެކު ހަދާފައިވާ އެއްބަސްވުން ހަމަވުމުން ހިލޭ ޓްރާންސްފާގައި އެމެރިކާގެ މޭޖާ ލީގް ސޮކާގެ ލޮސް އެންޖެލެސް އެފްސީ އަށް ބަދަލުވާން އެއްބަސް ވެއްޖެ އެވެ.

ޔޫއެފާ ޗެމްޕިއަންސް ލީގު ފަސް ފަހަރު ކާމިޔާބުކޮށް، ރެއާލް މެޑްރިޑްގެ ލެޖެންޑުންގެ ލިސްޓުން ޖާގަ ހޯދާފައިވާ އުމުރުން 32 އަހަރުގެ ކުޅުންތެރިޔާގެ ކޮންޓްރެކްޓް މި ހަފުތާގައި ހަމަވާނެ އެވެ. އޭނާ ރެއާލަށް ބަދަލުވީ 2013 ވަނަ އަހަރު އޭރުގެ ރެކޯޑް ފީއެއް ކަމަށްވާ 85 މިިއަން ޕައުންޑަށެވެ.

ގަތަރު ވޯލްޑް ކަޕްގެ ކުރިން އޭނާގެ ކުރީގެ ކްލަބް ޓޮޓެންހަމް ހޮޓްސްޕާ ނުވަތަ އުފަން ރަށަށް ނިސްބަތްވާ ކާޑިފް ސިޓީ އަށް ބަދަލުވާނެ ކަމަށް ހީވިޔަސް ބޭލް ވަނީ އޭނާގެ އޮފިޝަލް ޓްވިޓާ އެކައުންޓުގައި ލޮސް އެންޖެލެސް އެފްސީގެ ޖޯޒީގައި ވީޑިއޯ ކްލިޕެއް އާއްމު ކޮށްފަ އެވެ. ބޭލްގެ ޓްްވީޓު ލޮސް އެންޖެލަސް އެފްސީން ރީޓްވީޓް ކުރި ނަމަވެސް ރަސްމީކޮށް އެ ކްލަބުން އެއްވެސް ބަހެއް އަދި ނުބުނެ އެވެ.

ރެއާލް މެޑްރިޑްގައި ހަަފުތާއަކު 600،000 ޕައުންޑުގެ މުސާރައެއް ލިބުނު ބޭލް ވަނީ އިނގިރޭސި ދެވަނަ ޑިވިޝަނުގައި ކުޅޭ ކާޑިފް ސިޓީގެ ޕްރީސީޒަން ފަރިތަކުރުންތަކުގައި މިދިޔަ ހަފުތާގައި ބައިވެރި ވެފަ އެވެ. އަދި ކާޑިފް ސިޓީއާއެކު އޭނާގެ އެޖެންޓުން ވެސް މަޝްވަރާ ކުރިއަަށް ގެންދިޔަ ކަމަށް މީޑިއާ އިން ރިޕޯޓް ކޮށްފައި ވެ އެވެ.

ވޯލްޑް ކަޕަށް ވޭލްސް ކޮލިފައި ނުވި ނަމަ ބޭލް ހުރީ ކޮލިފައިން މެޗުތަކަށް ފަހު ގައުމީ ޓީމުން ރިޓަޔާ ކުރަން ތައްޔާތަށެވެ. އެކަމަކު ކޮލިފައި ވުމުން، މުބާރާތުގެ ކުރިން ކްލަބް ލެވެލްގައި ގިނަ މެޗުތަކެއް ކުޅެން ފުރުސަަތު ހޯދުމުގެ އަމާޒުގައި ބޭލް ނިންމީ އެމެރިކާ ލީގަށް ބަދަލުވާށެވެ. ބެލެވޭ ގޮތުގައި ލޮސް އެންޖެލަސް އަށް ބޭލް ސޮއިކުރާނީ އެއް އަހަރުގެ އެއްބަސްވުމެއްގެ ދަށުންނެވެ.

އިޓަލީގެ ކުރީގެ ގައުމީ ޓީމުގެ ކެޕްޓަން ޖޯޖިއޯ ކިއެލީނީ ވެސް ވަނީ ލޮސް އެންޖެލަސް އަށް ބަދަލުވާން އެއްބަސް ވެފަ އެވެ. އަދި ކިއެލީނީ ވެސް ވަނީ އޭނާ ލޮސް އެންޖެލަސް އަށް ބަދަލުވާކަން ހާމަކުރަން، ބޭލް ހިއްސާކުރި ފަދަ ވީޑިއޯ ކްލިޕެއް އޭނާގެ ޓްވިޓާގައި ވެސް އާއްމު ކޮށްފަ އެވެ. ނަމަވެސް އެ ޓީމަށް ދެ ކުޅުންތެރިންގެ ޓްރާންސްފާ ފައިނަލް ކުރެވެން އަންނަނީ އަންނަ މަހުގެ ހަތްވަނަ ދުވަހު ހުޅުވާ ޓްރާންސްފާ ބާޒާރުގަ އެވެ. އެމެރިކާ ލީގު ކުރިއަށް ގެންދާނީ ފެބްރުއަރީ އިން ފެށިގެން އޮކްޓޫބަރުމަހާ ހަމައަށެވެ.

އެމެރިކާގެ ގައުމީ ޓީމުގެ ކުރީގެ ކުޅުންތެރިޔާ ސްޓީވް ޗެރަންޑޯލޯގެ އިރުޝާާދުގެ ދަށުން ކުޅޭ ލޮސް އެންޖެލަސް އޮތީ މޭޖާ ލީގް ސޮކާ (އެމްއެލްއެސް)ގެ ހުޅަނގު ކޮންފަރެންސްގެ އެއްވަނައިގަ އެވެ. ރެގިއުލާ ސީޒަންގެ މެޗުތަކަށް ފަހު ޕްލޭއޮފާއި އެމްއެސްއެލް ކަޕް ވެސް އޮންނާނެ އެވެ. ކަޕް ފައިނަލާ އެކު ސީޒަން ނިންމާލަން ޝެޑިއުލް ކޮށްފައި ވަނީ ވޯލްޑް ކަޕް ފެށުމުގެ ކުރިން، ނޮވެމްބަަރު ފަހަކަށެވެ.