ގޯތި ދޫކުރާއިރު ހާލަތު ބަލަން ގޭގެއަކަށް ނުދާނެ

މި ސަރުކާރުން މާލެއިން ދޫކުރަން ހަމަޖެހިފައިވާ 3000 ގޯތި ދޫކުރާއިރު ހާލަތު ބެލުމަށް ގޭގެއަށް ޒިޔާރާތް ނުކުރާނެ ކަމަށް ހައުސިން މިނިސްޓްރީން ބުނެފި އެވެ.

ގާތްގަނޑަކަށް 40 އަހަރު ފަހުން މާލެއިން ގޯތި ދޫކުރާއިރު މާލޭގައި އަމިއްލަ ބޯހިޔާވަހި ކަމެއް ނެތް އެތައް ބަޔަކު އުޅެމުން އެބަދެ އެވެ. ކުދިކުދި ތަންކޮޅުތަކުގައި ތިން ހަތަރު އާއިލާ ދިރިއުޅެން ޖެހިފައިވަނިކޮށް މި ސަރުކާރުން ގޯތި ދޫކުރަން ހުޅުވާލީ މިދިޔަ އާދިއްތަ ދުވަހު އެވެ.

ގޯއްޗަށް އެދި ހުށަހަޅާ މީހުންގެ ޝަރުތުތަކާއި މާކްސް ދޭނެ ގޮތުގެ އުސޫލު މިނިސްޓްރީން ވަނީ އާންމުކޮށްފަ އެވެ.

ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ގޯއްޗަށް އެދި ހުށަހަޅާ މީހުންގެ ހާލަތު ބެލުމަށް ގޭގެއަށް ވަކިވަކިން ޒިޔާރާތް ނުކުރާނެ ކަމަށެވެ. އެކަމަކު ހުރިހާ ފޯމުތަކަކާ އެކު ހުށަހަޅާ މައުލޫމާތު އެކަމަށް ހާއްސަ ކޮމިޓީއަކުން ވެރިފައި ކުރާނެ ކަމަށާއި ގޯހެއް ފާހަގަކުރެވިއްޖެ ނަމަ ގޭގެއަށް ވެސް ޒިޔާރާތްކުރާނެ ކަމަށް އަކްރަމް ވިދާޅުވި އެވެ.

"ހާލަތު ބަލަން ގޭގެއަކަށް ނުދާނެ. އެކަމަކު ކޮމިޓީން ވެރިފައި ކުރަންޖެހޭ ހާލަތްތަކުގައި ކަށަވަރުކުރުމަށް ގޭގެ އަށް ވެސް ދާނެ،" އޭނާ ވިދާޅުވި އެވެ.

ގޭގެ އަށް ޒިޔާރާތްކޮށް އެ މީހުންގެ ދިރިއުޅުމުގެ ހާލަތު ނުބަލައި މާލެއިން ބޮޑެތި ގޯތިތަކެއް ހިލޭ ދޫކުރުމަށް ނިންމާފައިވާއިރު ކުރީ ސަރުކާރުގައި ހިޔާ ފްލެޓްތަކަށް އެދި ހުށަހެޅި އެންމެންގެ ގޭގެ އަށް ޒިޔާރާތްކޮށް ހާލަތު ނުބެލި މައްސަލަ އޭރު މި ސަރުކާރު އިދިކޮޅުގައި އޮވެ ބޮޑުކޮށްލި އެވެ.

ހިޔާ ފްލެޓްތައް ހާލަތު ބަލާފައި ދޫކުރަން މިނިސްޓްރީން ނިންމި ނަމަވެސް ހާލަތު ބަލަން ދިޔައީ ބައެއް ގެތަކަށެވެ. އެންމެ ފަހުން މި ސަރުކާރުން ވަނީ ފްލެޓް ދިނީ އެންމެ ހައްގުވެރިންނަށް ނޫން ކަމަށް ބުނެ ފްލެޓް ކޮމިޓީއެއް އެކުލަވާލައި ހުރިހާ ގެއަކަށް ޒިޔާރާތްކޮށް ހާލަތު ބަލައި ފްލެޓް ލިބުނު މީހުންގެ އާ ލިސްޓެއް އެކުލަވާލައިފަ އެވެ.

މިފަހަރު ގޯތި ދޫކުރާއިރު އެންމެ ކުޑަވެގެން 1،225 އަކަފޫޓުގެ ގޯއްޗެއް ދޫކުރާނެ އެވެ. ޖޮއިންޓް އެޕްލިކޭޝަން ހުށަހަޅާ އެޕްލިކޭޝަނުން ހޮވޭ ފަރާތްތަކަށް އެކަކަށް ވުރެ އިތުރުވާ ކޮންމެ މީހަކަށް 400 އަކަފޫޓު އިތުރުކުރެވޭނެ އެވެ. އެންމެ ބޮޑުކޮށް ދޫކުރަނީ 4،000 އަކަފޫޓެވެ.

ގޯތި ލިބޭ މީހުންގެ ޝަރުތުތައް:

• އުމުރުން 18 އަހަރުވެފައިވާ މާލޭ މީހަކަށް ވުން. (އެއްވެސް އިރެއްގައި މާލެ ނޫން އެހެން ތަނެއްގައި ރަޖިސްޓްރީ ނުވާ މީހުން.

• މާލޭ ސަރަހައްދުގައި އަމިއްލަ ނަމުގައި 600 އަކަފޫޓުގެ ނުވަތަ ބޮޑު ބިމެއް ރަޖިސްޓްރީކޮށްފައި ނެތް މީހުން.

• މާލޭ ސަރަހައްދުގައި އަމިއްލަ ނަމުގައި 600 އަކަފޫޓަށް ވުރެ ކުޑަ ބަންޑާރަ ބިމެއް އަމިއްލަ ނަމުގައި ރަޖިސްޓްރީވެފައިވާ ނަމަ އެތަން އުސޫލާ އެއްގޮތަށް ދޫކޮށްލަން އެއްބަސްވާ މީހަކަށްވުން.

• ސަރުކާރުން ހިންގާފައިވާ ބޯހިޔާވަހިކަމުގެ ސްކީމަކުން މިހާތަނަށް ބޯހިޔާވަހިކަން ލިބިފައިވާ މީހަކަށް ނުވުން.

• މާލޭ ސަރަހައްދުން ބަންޑާރަ ގޯއްޗެއް ބަހައިގެން ލިބިފައިވާ މީހެއް ނަމަ އުސޫލާ އެއްގޮތަށް ދޫކޮށްލަން އެއްބަސްވުން.

• މާލޭ ސަރަހައްދުގައި އަމިއްލަ ނަމުގައި އޮތް ބަންޑާރަ ގޯއްޗެއް އެހެން ފަރާތަކަށްދީ ނުވަތަ ދޫކޮށްލާފައިވާ ނުވަތަ ވިއްކާލާފައިވާ މީހަކަށް ނުވުން.

ގޯތި ދޭއިރު އެ މީހުންގެ މާލޭ ސަރަހައްދުގެ ބޯހިޔާވަހިކަމާއި އާމްދަނީއާއި އާއިލާގެ ހާލަތަށް ވެސް ބަލާނެ އެވެ.