ދަރިވަރުންގެ އިނގިރޭސި ބަސް ރަނގަޅުކުރަން ފޮތް ހޯދަނީ

ދަރިވަރުން އިނގިރޭސި ބަހަށް ޝައުގުވެރިކަން އިތުރުކޮށް އެ ކުދިންގެ ފެންވަރު ރަނގަޅުކުރުމަށް އިނގިރޭސި ބަހުން ލިޔެފައިވާ އެކި ކަހަލަ ފޮތްތައް ހޯދުމަށް އެޑިއުކޭޝަން މިނިސްޓްރީން އިއުލާންކޮށްފި އެވެ.

މިނިސްޓްރީން ކުރި އިއުލާނުގައި ބުނީ މޯލްޑިވްސް ލާނިން އެޑްވާންސްމަންޓް އެންޑް މެޝަމެންޓް ޕްރޮޖެކްޓަށް ޝައުގުވެރިވާ ފަރާތްތަކަށް އަންނަ އޮގަސްޓް މަހުގެ 22 ގެ ނިޔަލަށް ބީލަން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. ބިޑް ސެކިއުރިޓީގެ ގޮތުގައި 16،100ރ. (1044 ޑޮލަރު) ހުށަހަޅަން ޖެހެ އެވެ.

މިނިސްޓްރީން ބުނީ ބީލަން ހުޅުވުން އޮންނަނީ 22 އޮގަސްޓްވާ ހޯމަ ދުވަހުގެ 10:00 ގައި ވެލާނާގެ ނުވަ ވަނަ ފްލޯގައި ކަމަށެވެ. އެއްބަސްވުމުގައި ސޮއިކުރާ ތާރިހުން ފެށިގެން 45 ދުވަހާއި 60 ދުވަހުގެ ތެރޭގައި އެ ފޮތްތައް ފޯރުކޮށްދޭން ޖެހޭ ކަމަށް މިނިސްޓްރީން ބުންޏެެވެ.

އެ ފޮތްތައް ފޯރުކޮށްދޭނެ ފަރާތެއް ހޮވުމުގައި އަމަލުކުރާނީ ވޯލްޑް ބޭންކުގެ އުސޫލުގެ ޕްރޮކިއުމަންޓް ރެގިއުލޭޝަންސްއާ އެއްގޮތުގެ މަތިންކަމަށް އިއުލާނުގައިވެ އެވެ..

އިނގިރޭސި ބަހަށް ދަރިވަރުންގެ ފެންވަރު ރަނގަޅުކުރުމަށް ފޮތް ހޯދުމަށް މިނިސްޓްރީން އިއުލާނުކުރިއިރު އިއްޔެ ވަނީ ދިވެހި ބަހަށް ކުދިންގެ ޝައުގުވެރިކަން ހޯދުމަށް ދިވެހިން ލިޔެފައިވާ ފޮތްތައް ހޯދުމަށް ވެސް އިއުލާންކޮށްފަ އެވެ.