ޗައިނާގެ ގިނަ ބޭންކްތަކެއްގެ އެކައުންޓްތައް ފްރީޒްކޮށްފި

ޗައިނާގެ ސަރުކާރުން ހިންގާ ޑޮމެސްޓިކް ގިނަ ބޭންކްތަކަކުން, އާންމުން ޖަމާކޮށްފައިވާ ފައިސާ ނެގުން ހުއްޓުވައިފި އެވެ.

ޗައިނާގެ ސެންޓްރަލް ހެނާން ޕްރޮވިންސްގެ ގިނަ ބޭންކްތަކަކުން ވަނީ އާންމު ޑިޕޮސިޓް ކޮށްފައިވާ އެތައް މިލިއަން ޑޮލަރުގެ ފައިސާ ނެގުން ހުއްޓުވައި ފްރީޒްކޮށްފަ އެވެ. މިކަމާ ދެކޮޅަށް އާންމުން ނުކުތުމުން ސަރުކާރުން ވަނީ އެއްވުންތައް ހުއްޓުވައިފަ އެވެ.

ހެނާންގެ ވެރިރަށް ޖޮންޖައުގައި ހުންނަ ސެންޓްރަލް ބޭންކްގެ ބްރާންޗްގެ ކުރިމައްޗަށް ނުކުމެ އާންމުން ވަނީ ބޭންކްތަކުން ފައިސާ ނެގުން މަނާ ކުރުމުން އެ މީހުންގެ ދިރިއުޅުމަށް ބޮޑެތި އަސަރުތަކެއް ކުރާނެ ކަމަށް ބުނެ ނުރުހުން ފާޅުކޮށްފަ އެވެ. މި އެއްވުމުގައި ބޭންކްތަކުގައި ސޭވިން އެކައުންޓު ހުޅުވާފައިވާ 1،000 އަށް ވުރެ ގިނަ މީހުން މަގު މައްޗަށް ނުކުމެފައިވެ އެވެ. މި އެއްވުންތަކުގައި އެ ޕްރޮވިންސްގެ މަހުޖަނުންނާއި ވިޔަފާރިވެރިން ވެސް ބައިވެރިވެފައިވެ އެވެ. ފްރީޒް ކުރި ބައެއް އެކައުންޓުތަކުގައި މިލިއަނުން ފައިސާ ހުއްޓެވެ.

އެއްވުމުގައި ބައިވެރިވި، އެ ޕްރޮވިންސްގެ ފެކްޓްރީއެއް ހިންގާ ސުން ބުނީ ހުނާންގެ ބޭންކްގައި އޭނާގެ ހަތަރު މިލިއަން ޔުއާން (600،000 ޑޮލަރު) ހުރި ނަމަވެސް، އެ ފައިސާ ނުނެގޭތީ، ވިޔަފާރި ކުރިއަށް ގެންދަން ބޮޑު ގޮންޖެހުމެއް ކުރިމަތިވެފައިވާ ކަމަށެވެ. އޭނާ ބުނީ، ބޭންކް އެކައުންޓް ފްރީޒް ކުރުމުން މުވައްޒަފުންނަށް މުސާރަ ދެވޭނެ ގޮތެއް ވެސް ނެތް ކަމަށެވެ.

ބޭންކްތަކުން އެކައުންޓްތަކުން ފައިސާ ނެގުން ކޮންޓްރޯލް ކުރީ ކޮވިޑާ ގުޅިގެން ޗައިނާގެ ބޯޑަރު ބަންދުކޮށް އެޅި ހަރުކަށި ފިޔަވަޅުތަކާ ގުޅިގެން އިގްތިސާދަށް ކުރިމަތިވި އަޑިގަޑުންނެވެ.

މި އެއްވުމުގައި ކުޑަ ކުދިންނާއި އުމުރުން ދުވަސްވީ މީހުންވެސް ބައިވެރިވެފައިވެ އެވެ. މަގުތަކަށް އެއްވި މީހުން ވަނީ އެ މީހުން ބޭންކަށް ޖަމާކުރި ފައިސާ އެ މީހުންނަށް ދިނުމަށް އެދިފަ އެވެ. ހެނާން ޕްރޮވިންސްގެ ވެރިންނަށް ފާޑު ކިޔައި، ކޮރަޕްޝަން ހިންގުން ހުއްޓާލުމަށް ގޮވި އެވެ.