އެފްޓީއޭ އާ އެކު ޗައިނާއިން އެއް ބިލިއަން ޑޮލަރުގެ ވިޔަފާރި ކުރެވޭނެ: ހީނާ

ދިވެހި ސަރުކާރާއި ޗައިނާގެ މަރުކަޒީ ބޭންކް އާ ދެމެދު ކަރަންޓް އެކައުންޓް މުޢާމަލާތްތައް ދެ ގައުމުގެ ފައިސާއިން ކުރެވޭ އެއްބަސްވުމުގެ މައްޗަށް، ދެ ގައުމުގެ ދެމެދު ސޮއިކޮށްފައިވާ ފްރީ ޓްރޭޑް އެގްރީމެންޓަށް އަމަލުކުރަން ފެށުމާ އެކު، ޗައިނާ އާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެއް ބިލިއަން ޑޮލަރަށް އިތުރު ކުރެވޭނެ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެ އެވެ.

ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ހީނާ ވިދާޅުވި ގޮތުގައި މިމަހުގެ 13 ގައި ދިވެހި ސަރުކާރާއި ޗައިނާގެ މަރުކަޒީ ބޭންކް، ޕީޕަލްސް ބޭންކް އޮފް ޗައިނާ އާ އެކު ހަދާފައިވާ އެމްއޯޔޫގެ ސަބަބުން ރާއްޖެއަށް ގިނަ ފައިދާތަކެއް ކުރާނެ އެވެ.

"ރާއްޖެއާއި ޗައިނާއާ އެކީގައި 700 މިލިއަން އެމެރިކާ ޑޮލަރުގެ ވިޔަފާރި ކުރެވެމުން އެބަދޭ. އެހެންނަމަވެސް ރާއްޖެއާއި ޗައިނާއާ އެކު މިހާރު ހަދާފައިވާ އެފްޓީއޭގެ ދަށުންނާއި މި އެފްޓީއޭއަަށް އަމަލުކުރަން ފެށުމުން 1 ބިލިއަން ޑޮލަރަށް މި ވިޔަފާރީގެ އަދަދު މަތިވެގެން އެބަދޭ،" އޭނާ ވިދާޅުވި އެވެ.

ދެ ގައުމުގެ ދެމެދުގައި ދިވެހި ފައިސާ އިން މުއާމަލާތް ކުރެވޭ ގޮތަށް ހަދާފައިވާ މި އެއްބަސްވުމުގެ ސަބަބުން ވިޔަފާރިވެރިންނާއި ޗައިނާއަށް ދަތުރުކުރާ ދިވެހިންނަށް ވެސް ވަރަށް ބޮޑަށް ލުއިވެގެންދާނެ ކަމަށް ވެސް ހީނާ ވިދާޅުވި އެވެ.

"މި އެއްބަސްވުމާ އެކު ޑޮލަރުން ފައިސާ ނުދައްކާ، ރުފިޔާ އިން ވަރަށް ގިނަ ކަންތައް ކުރެވިގެންދާނެ. ދިވެހިންނަށް ދަތުރުފަތުރުކުރުމުގެ ލުއިތައް. ދިވެހިންނަށް ދިވެހި ފައިސާ އިން ފައިސާ ދެއްކޭނެ ގޮތް މެދުވެރިވުން. މުދާ ގަތުމުގައި ޑޮލަރަށް ބަރޯސާވާ މިންވަރު ދަށްވާނެ."

އެ އެމްއޯޔޫގައި ސޮއިކޮށް އިކޮނޮމިކް މިނިސްޓްރީން ނެރުނު ބަޔާނުގައިވާ ގޮތުގައި އެ އެއްބަސްވުމުގެ ދަށުން، ރާއްޖެ އާއި ޗައިނާއާ ދެމެދު ކަރަންޓް އެކައުންޓް މުއާމަލާތްތަކާއި ސީދާ އިންވެސްޓްމަންޓްތައް ދެ ގައުމުގެ ފައިސާ އިން ހިންގުމަށް މަގުފަހިކޮށްދޭ އޮނިގަނޑެއް ގާއިމުކޮށް، ދެ ގައުމުގެ މެދުގައި ވިޔަފާރި އާއި އިންވެސްޓްމަންޓްތަކުގެ ގުޅުންތައް އިތުރަށް ހަރުދަނާ ވާނެ އެވެ.

ރާއްޖެ އާއި ޗައިނާގެ މިނިވަން ވިޔަފާރީގެ އެއްބަސްވުމުގައި އެ ގައުމުން ސޮއިކުރީ ކުރީގެ ރައީސް ޔާމީން ޗައިނާ އަށް ކުރެއްވި ދަތުރުފުޅުގައި ޑިސެމްބަރު 18، 2014 ގަ އެވެ. އެ އެއްބަސްވުން ކުރިއަށް ގެންދަން މަޖިލީހުން ފާސްކުރީ ޕީޕީއެމް/އެމްޑީއޭ ކޯލިޝަންގެ އަޣުލަބިއްޔަތު އޮތް މަޖިލިހުން ނޮވެމްބަރު 29، 2017 ގަ އެވެ. އެކަމަކު އޭގެ ފަހުން ސަރުކާރުން ބަދަލުވެ، އެ އެއްބަސްވުން މުރާޖައާ ކުރަމުންދާ ކަމަށް ބުނެ، ކުރީގެ ސަރުކާރުގައި އެ އެއްބަސްވުމަށް އަމަލުކުރަން ފަށާފައެއް ނުވެ އެވެ.

އެ އެއްބަސްވުމަށް މި ހިނގާ ސެޕްޓެމްބަރު މަސް ނިމުމުގެ ކުރިން އަމަލުކުރަން ފެށޭނެ ކަމަށް ރައީސް ޑރ. މުހައްމަދު މުއިއްޒު މިދިޔަ ޖުލައި މަހު ވަނީ ވިދާޅުވެފަ އެވެ. އެކަމާ ގުޅޭގޮތުން ނޫސްވެރިންގެ ބައްދަލުވުމުގައި ސުވާލުކުރުމުން، ހީނާ މިއަދު ވިދާޅުވީ އެ މަސައްކަތް ކުރެވެމުންދާ ކަމަށެވެ.