އެމްޑީޕީގެ އަސާސީ ގަވާއިދަށް ހުށަހެޅި އިސްލާހު އެއްގޮތް ކުރަން ކޮމިޓީއެއް

އެމްޑީޕީގެ އަސާސީ ގަވާއިދަށް ހުށަހެޅި އިސްލާހުތައް އެއްގޮތް ކުރަން އެ ޕާޓީގެ ގައުމީ މަޖިލީހުން ރޭ ކޮމިޓީއެއް އެކުލަވާލައިފި އެވެ.

އަންނަ މަހު 16ގައި ބާއްވަން ހަމަޖައްސާފައިވާ ޕާޓީގެ ކޮންގްރެސްއާ ދިމާކޮށް އަސާސީ ގަވާއިދަށް ގިނަ އިސްލާހުތަކެއް ވަނީ ހުށަހަޅައިފަ އެވެ. އެ ޕާޓީން ރޭ ބޭއްވި ގައުމީ މަޖިލީހުގައި އެ އިސްލާހުތަކާ މެދު ގޮތެއް ނުނިންމައި ކޮމިޓީއެއް އެކުލަވާލީ އިސްލާހުތައް އެއްގޮތް ކުރުމަށް ފަހު އަލުން ގައުމީ މަޖިލީހަށް ހުށަހެޅުމަށެވެ.

ގައުމީ މަޖިލީހުގެ މެމްބަރު އަދި މަތި އުތުރު ޕްރޮވިންސްގެ ރައީސް އިބްރާހިމް ވަހީދު (އިބްރޭ) ވިދާޅުވީ އަސާސީ ގަވާއިދަށް ހުށަހެޅި އިސްލާހުތައް އެއްގޮތް ކުރުމަށާއި މިހާރު ގަވާއިދުގައި ހުރި ފުށުއެރުންތައް ހޯދައި ބެލުމަށް ކޮމިޓީއެއް ނަގައި ދެން އޮންނަ ގައުމީ މަޖިލީހުގެ ބައްދަލުވުމަކަށް އިސްލާހުތައް ހުށަހަޅަން ނިންމާފައިވާ ކަމަށެވެ.

"އިސްލާހުތަކާ މެދު ގޮތެއް ނިންމާނީ ދެން އޮންނަ ބައްދަލުވުމެއްގައި ކަމަށް ރޭ ނިންމީ،" އޭނާ ވިދާޅުވި އެވެ.

އަސާސީ ގަވާއިދަށް ހުށަހަޅާފައި ވަނީ ކޮން އިސްލާހުތަކެއް ކަމެއް ޕާޓީން އަދި އާއްމެއް ނުކުރެ އެވެ. އެ އިސްލާހުތައް އެއްގޮތް ކުރަން ނެގި ކޮމިޓީގައި ނުވަ މެމްބަރަކު ހިމެނިވަޑައިގަންނަވަ އެވެ.

ކޮމިޓީގެ މެމްބަރުން

- ޕާލަމެންޓްރީ ގްރޫޕްގެ ލީޑަރު، މުހައްމަދު އަސްލަމް

- ތުޅާދޫ ދާއިރާގެ މެމްބަރު ހިސާން ހުސެއިން

- މީދޫ ދާއިރާގެ މެމްބަރު އަދި އަންހެނުންގެ ހިތްވަރުގެ ރައީސް ރޮޒައިނާ އާދަމް

- މަތި އުތުރު ޕްރޮވިންސްގެ ރައީސް އިބްރާހިމް ވަހީދު

- އެމްޑީޕީގެ ފަނޑިޔާރުންގެ ކޮމިޓީގެ މެމްބަރު އަހްމަދު މައުރޫފް

- ޔޫތު ވިންގުގެ ރައީސް ރިފްގާ ޝިހާމް

އެމްޑީޕީގެ އަސާސީ ގަވާއިދަށް އެންމެ ފަހުން މައިގަނޑު އިސްލާހެއް ގެނައީ 2018 ގައި 700 މެމްބަރުންނާ އެކު އއ. އުކުޅަހުގައި ބޭއްވި ކޮންގްރެސްގަ އެވެ. އެއީ ރާއްޖޭގެ ސިޔާސީ ހާލަތު އޭރު އޮތް ގޮތުން، ޕާޓީގެ ރިޔާސީ ކެންޑިޑޭޓާ ގުޅޭ ނިންމުމެވެ.

ކުރީގެ ރައީސް އަބްދުالله ޔާމީންގެ ވެރިކަމުގައި އެމްޑީޕީގެ ރައީސް މުހައްމަދު ނަޝީދަށް އިއްވި ޓެރަރިޒަމްގެ ހުކުމާ ހެދި ރިޔާސީ އިންތިހާބުގައި ވާދަކުރެއްވުމުގެ ގާނޫނީ ފުރުސަތު ބަންދުވުމުން ގައުމީ މަޖިލީހުން ނިންމީ ޕާޓީގެ ރިޔާސީ ކެންޑިޑޭޓުގެ ގޮތުގައި ރައީސް އިބްރާހިމް މުހައްމަދު ސޯލިހް އިންތިހާބުގައި ވާދަކުރެއްވުމަށެވެ.

އެމްޑީޕީގެ ކޮންގްރެސްގައި މުހިއްމު އެއް ނިންމުމަކަށް މިފަހަރު ވެސް އޮންނާނީ ރިޔާސީ ޕްރައިމަރީއާ މެދު ގޮތެއް ނިންމުމެވެ. ޕާޓީގައި ރައީސް އިބްރާހިމް މުހައްމަދު ސޯލިހްގެ ފެކްޝަނަކާއި ނަޝީދުގެ ފެކްޝަނެއް އޮތް އިރު ޕްރައިމަރީއެއް ބޭއްވުމެއް ނެތި ރިޔާސީ ކެންޑިޑޭޓަކު ކަނޑައެޅުމުގެ ބިރު އޮތް ކަމަށް ނަޝީދުގެ ފެކްޝަނުން ދަނީ ކަންބޮޑުވުންފާޅުކުރަމުންނެވެ.

އެކަމަކު ޕާޓީން އަމަލުކުރަން އޮންނަ ގަވައިދުތަކާއި އުސޫލްތަކުން ބޭރުން ކަމެއް ނުކުރައްވާނެ ކަމުގެ ޔަގީންކަން ޕާޓީގެ ޗެއާޕާސަން ފައްޔާޒް އިސްމާއިލް ވަނީ އާއްމު މެމްބަރުންނަށް ދެއްވައިފަ އެވެ. އޭނާ ވިދާޅުވެފައިވާ ގޮތުގައި، އަމާޒަކީ އެމްޑީޕީއަށް ވެރިކަމުގެ ދެ ވަނަ ދައުރެއް ކަށަވަރު ކޮށްދެއްވުމެވެ.