ޔޮޓް ޓުއާޒް އިން 22 މިލިއަން ޑޮލަރުގެ މައްސަލާގައި ސުޕްރީމް ކޯޓަށް

ޔޮޓް ޓުއާޒް މޯލްޑިވްސްއަށް 22 މިލިއަން ޑޮލަރު (339 މިލިއަން ރުފިޔާ) ދައްކަން އެލައިޑް އިންޝުއަރެންސްގެ މައްޗަށް ކުރި ހުކުމް ހައި ކޯޓުން ބާތިލްކުރި މައްސަލަ ޔޮޓް ޓުއާޒް އިން ސުޕްރީމް ކޯޓަށް ހުށަހަޅައިފި އެވެ.

ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ މަސްލަހަތު އޮންނަ ޔޮޓް ޓުއާޒް އިން ކުރިން ހިންގި ހއ. އަލިދޫ ރިސޯޓަށް 2014 ވަނަ އަހަރު މޫސުން ގޯސްވެ ލިބުނު ގެއްލުންތަކާ ގުޅިގެން އިންޝުއަރެންސްގެ ފައިސާ ދޭން ދެކޮޅު ހެދި މައްސަލަ އެ ކުންފުނިން ކޯޓުން ހުށަހެޅުމުން 22 މިލިއަން ޑޮލަރު ދައްކަން އެލައިޑްގެ މައްޗަށް ސިވިލް ކޯޓުން ހުކުމްކުރި އެވެ. އެ ހުކުމް ހައި ކޯޓުން ވަނީ ބާތިލްކޮށްފަ އެވެ.

އެ މައްސަލަ އިސްތިއުނާފް ކުރަން ޔޮޓް ޓުއާޒްގެ ފަރާތުން ސުޕްރީމް ކޯޓަށް ހުށަހެޅިޔަސް، އެ މައްސަލަ ބަލައިގަތުމާ މެދު އެ ކޯޓުން އަދި ގޮތެއް ނުނިންމަ އެވެ.

ހައި ކޯޓުން ނިންމީ މޫސުން ގޯސްވެގެން ލިބުނު ގެއްލުންތަކަކީ އިންޝުއަރެންސް ޕޮލިސީގެ ތެރޭގައި ބަޔާންކުރާ ފަދަ ގެއްލުމެއް ކަން ސާބިތުނުވާ ކަމަށެވެ. އަދި ގެއްލުން ލިބުމުން އިންޝުއަރެންސް އެއްބަސްވުމުގައި ބަޔާންކުރާ ކަންކަން އެ ކުންފުނިން ފުރިހަމަ ކޮށްފައިނުވާ ކަމަށް ހައި ކޯޓުން ނިންމި އެވެ.

ޔޮޓް ޓުއާޒް އަށް ފައިސާ ދޭން އެލައިޑްގެ މައްޗަށް ސިވިލް ކޯޓުން ހުކުމް ކުރިޔަސް، އެ ހުކުމަށް އަމަލުކުރުން ހައި ކޯޓުން އޮތީ ކުރިން ހުއްޓުވައިފަ އެވެ. ސިވިލް ކޯޓުގެ ހުކުމް ބާތިލްކުރީ މިދިޔަ އޭޕްރީލް މަހު އެވެ.