ޕެލޯސީ ތައިވާނަށް ވަޑައިގަތުން ބޮޑު ބަހުސަކަށް

އެމެރިކާގެ ގާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްގެ ރައީސް ނެންސީ ޕެލޯސީ، ތައިވާނަށް ވަޑައިގަތުމަށް ނިންމެވުމާ ގުޅިގެން، އެމެރިކާގެ ސިޔާސީ ބޭފުޅުންގެ މެދުގައި ހޫނު ބަހުސެއް އުފެދި، ޗައިނާ އިން އެންމެ ފަހުން އެ ދަތުރާ ދެކޮޅަށް އިންޒާރުކޮށްފި އެވެ.

މި ދުވަސްވަރަކީ ޗައިނާ ސަރުކާރާއި ތައިވާން ސަރުކާރާ ދެމެދު، ވަރަށް ބޮޑަށް ނުތަނަވަސްކަން އުފެދިފައިވާ ދުވަސްވަރަކަށްވުމާއެކު، އެމެރިކާގެ ގައުމީ ސަލާމަތާ ބެހޭ އިދާރާތަކުގެ އޮފިޝަލުން މަސައްކަތް ކުރައްވަމުން ގެންދަވަނީ އެ ދަތުރު ކުރެއްވުމުގައި ހުރި ނުރައްކާތައް ނެންސީއަށް ވިސްނައިދެއްވުމަށެވެ.

ޕެލޯސީގެ މި ދަތުރުގެ މައުލޫމާތު އެނގޭ މަސްދަރުތަކުން ބުނާ ގޮތުގައި ޕެލޯސީ ތައިވާނަށް ވަޑައިގަންނަވާނީ، ކުރިއަށް އޮތް ދެ ހަފުތާގެ ތެރޭގައި އޭޝިޔާގެ ބައެއް ގައުމުތަކަށް އޭނާ ކުރައްވާ ދަތުރުގެ ތެރެއިންނެވެ. އަދި އެ ދަތުރުގައި ބައިވެރިވުމަށް، ހައުސްގައި ހިމެނޭ ޑިމޮކްރެޓިކް ޕާޓީގެ މެމްބަރުންނަށާއި ރިޕަބްލިކަން ޕާޓީގެ މެންބަރުންނަށް ވަނީ ދައުވަތު ދެއްވައިފަ އެވެ.

ތައިވާނަށް މިނިވަންކަން ދިނުމުގެ އަޑުތައް ގަދަވެފައިވާ މި ދުވަސްވަރު އެކަމާ ދެކޮޅަށް، ޗައިނާ އިން ގެންދަނީ ތައިވާންގެ ވައިގެ ދިފާއީ ސަރަހައްދަށް އަސްކަރީ މަތިންދާބޯޓުތައް ފޮނުވައި އެ ގައުމަށް އިންޒާރު ކުރަމުންނެވެ. އެހެންކަމުން މިފަދަ ދުވަސްވަރެއްގައި އެމެރިކާގެ އިސް ވެރިޔަކު ތައިވާނަށް ވަޑައިގަތުމަކީ، އެމެރިކާގެ ރައީސް ޖޯ ބައިޑެންގެ ސަރުކާރުން ވަރަށް ބޮޑަށް ކަންބޮޑުވާ ކަމެކެވެ.

ރައީސް ބައިޑެންގެ ސަރުކާރުން ދެކޭ ގޮތުގައި، މިފަދަ ހައްސާސް ދަނޑިވަޅެއްގައި އެމެރިކާގެ އިސް ވެރިޔަކު ތައިވާނަށް ވަޑައިގަތުމުން، ޗައިނާ ސަރުކާރުން މިހާރަށް ވުރެ ވެސް ހަރުކަށި ގޮތެއްގައި ތައިވާނާ ދިމާކުރުމުގެ ނުރައްކާ އެބަ އޮތެވެ. އެ ފަދަ ހާލަތެއް މެދުވެރިވެއްޖެ ނަމަ، ތައިވާންގެ މިނިވަންކަމަށް ތާއީދުކުރާ އެމެރިކާ އާއި ތައިވާންގެ ގުޅުން ހީނަރުވުމަކީ އެކަށީގެންވާ ކަމެކެވެ.

އޭގެ އިތުރުން، އެމެރިކާގެ ރައީސް ޖޯ ބައިޑެން އާއި ޗައިނާގެ ރައީސް ޝީ ޖިންގްޕިން، މާދަމާގެ ވަގުތެއްގައި ފޯނުގެ ޒަރީއާ އިން މަޝްވަރާތަކެއް ކުރުމަށް ހަމަޖެހިފައިވާ އިރު، ޕެލޯސީ ތައިވާނަށް ވަޑައިގަތުމަކީ، އެ މަޝްވަރާތަކަށް ހިޔަނި އެޅޭނެ ކަމެކެވެ.

މީގެ 72 އަހަރު ކުރިން، ތައިވާނަކީ ޗައިނާގެ ވެރިކަމުގެ ދަށުގައި އޮތް ވަކި ޖަޒީރާއެކެވެ. ނަމަވެސް 1949 ވަނަ އަހަރު ނިމުނު ޗައިނާގެ ދާހިލީ ހަނގުރާމައިގައި، އޭރުގެ ރިޕަބްލިކް އޮފް ޗައިނާގެ ސަރުކާރު ސިފައިންގެ މައްޗަށް ކުރި ހޯދީ، ޗައިނާގެ ކޮމިއުނިސްޓް ޕާޓީގެ ހަނގުރާމަވެރިންނެވެ. އެ ނާކާމިޔާބީއާ ގުޅިގެން، ރިޕަބްލިކް އޮފް ޗައިނާގެ މުޅި ސަރުކާރާއި ސަރުކާރަށް ތާއީދުކުރާ އެތައް މިލިއަން ބަޔަކު، ޗައިނާގެ މައި ބިން ދޫކޮށް، ރެފިއުޖީންގެ ގޮތުގައި ތައިވާން ޖަޒީރާ އަށް ހިޖްރަކޮށް، ތައިވާންގައި ރިޕަބްލިކް އޮފް ޗައިނާގެ ނަމުގައި އާ ސަރުކާރެއް ގާއިމުކުރި އެވެ.

އެއާއެކު ޗައިނާގެ މައި ބިމުގައި، ޕީޕަލްސް ރިޕަބްލިކް އޮފް ޗައިނާގެ ނަމުގައި، ކޮމިޔުނިސްޓް ޕާޓީގެ ފަރާތުން މުސްތަގިއްލު ދައުލަތެއް ގާއިމުކޮށް ވެރިކަން ކުރަން ފެށި އެވެ. ނަމަވެސް އދ.ގެ މެމްބަރު ގައުމެއްގެ ގޮތުގައި އޮތީ ރިޕަބްލިކް އޮފް ޗައިނާ (ތައިވާން) އެވެ. އަދި އެއީ ވީޓޯ ކުރުމުގެ ބާރާއެކު ސަލާމަތީ މަޖިލީހުގެ ދާއިމީ މެމްބަރެއްގެ ގޮތުގައި އޮތް ގައުމެކެވެ.

ޗައިނާ އަށް މިއައި ބޮޑު ބަދަލާ ގުޅިގެން، 1971 ވަނަ އަހަރުގެ އޮކްޓޫބަރު މަހުގެ 25 ވަނަ ދުވަހު، އދ.ގެ އާންމު މަޖިލީހުގައި ނެގި ވޯޓެއްގައި، ރިޕަބްލިކް އޮފް ޗައިނާ (ތައިވާން)، އދ. އިން ވަކިކުރި އެވެ. އޭގެ ބަދަލުގައި ޕީޕަލްސް ރިޕަބްލިކް އޮފް ޗައިނާ (މިހާރުގެ ޗައިނާ) އަށް، އދ.ގެ މެމްބަރުކަން ދިނެވެ.