ޖުމްހޫރީ ޕާޓީގެ ކޮންގްރެސް ޑިސެމްބަރުގައި ބާއްވަނީ

ޖުމްހޫރީ ޕާޓީގެ ކޮންގްރެސް އަންނަ ޑިސެމްބަރު މަހު ބާއްވަން އެ ޕާޓީން ތައްޔާރުވާން ފަށައިފި އެވެ.

ތަރުޖަމާން އަދި އެންވަޔަރުމެންޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު "މިހާރު" އަށް މިއަދު ވިދާޅުވީ، ޖޭޕީގެ ކޮންގްރެސް ޑިސެމްބަރުގައި ބޭއްވުމަށް ވާން ޖެހޭ މުހިންމު ތައްޔާރީތައް އެ ޕާޓީގެ ސެކްރެޓޭރިއޭޓުން މިހާރު ފަށާފައިވާ ކަމަށެވެ.

‎އަލީ ސޯލިހު ވިދާޅުވީ ޖޭޕީގެ 146 ވަނަ ކައުންސިލް ބައްދަލުވުމުގައި، ކޮންގްރެސް އަށް ތައްޔާރުވުމުގެ ގޮތުން ކުރަންޖެހޭ އެންމެ މުހިންމު އެއް މަސައްކަތް ކަމަށްވާ، ޕާޓީގެ ރަށު ގޮފިތައް އަސާސީ ގަވާއިދާ އެއްގޮތަށް އެކުލަވާލައި، ފުރިހަމަ ކުރުމަށް ހަތް މެންބަރުންގެ ވަގުތީ ކޮމެޓީއެއް އުފައްދާފައިވާ ކަމަށެވެ. އެ ކޮމެޓީގެ މަސައްކަތް މިހާރު ފަށާފައިވާ ކަމަށް އޭނާ ވިދާޅުވި އެވެ.

"‎ގޮފިތައް ހެދުމަށް ޕާޓީ އަށް ހެޔޮއެދޭ މީހުންނަށް ފުރުސަތު ވަނީ ހުޅުވާލައިފައި. މިކަމަށް އެއްވެސް ފަރާތަކުން މައުލޫމާތެއް ބޭނުންފުޅުވާ ނަމަ ޕާޓީ ރަޖިސްޓްރާގެ އޮފީހުންނާއި ޕާޓީގެ އިދާރާއިން އެ މައުލޫމާތެއް ލިބެން ހުންނާނެ،" އޭނާ ވިދާޅުވި އެވެ.

‎އެ މަސައްކަތް ކުރުމަށް ރަށްރަށަށް ދަތުރުކުރުމާއި ޕާޓީ ޕްރޮމޯޓްކުރުމާއި މީހުން ބާރުވެރިކުރުމަށް މަސައްކަތް ކުރުމަށް އެ ޕާޓީގެ ހުރިހާ މެމްބަރުންނަށް ވެސް ފުރުސަތު އޮންނާނެ ކަމަށް ވިދާޅުވި އެވެ.

ސިޔާސީ ގޮތުން ޖޭޕީން ނިންމާ މުހިންމު ނިންމުންތަކަށް ކޮށާލެވޭ މަގަކަށް އެ ކޮންގްރެސް ވާނެ ކަމަށް އެންމެ ފަހުން އެ ޕާޓީން، މ. ކުނޫޒުގައި ބޭއްވި "ތައްޔާރު" ޖަލްސާގައި ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް ވަނީ ވިދާޅުވެފަ އެވެ.

އެ ޖަލްސާގައި ގާސިމް ވަނީ އަންނަ އަހަރު ބާއްވާ ރިޔާސީ އިންތިހާބަށް ޖޭޕީގެ ފަރާތުން ކެންޑިޑޭޓަކު ނެރޭނެ ކަމަށް ވެސް ވިދާޅުވެފަ އެވެ.

ސިޔާސީ ހަރަކާތްތައް ހުއްޓާލައިގެން ގިނަ ދުވަސްތަކެއް ވަންދެން ތިބުމަށް ފަހު ޖޭޕީން ބޭއްވި އެ ޖަލްސާގައި ގާސިމް ވިދާޅުވީ އެ ޕާޓީ އާ ނުލައި އެއްވެސް ބަޔަކަށް ވެރިކަމަށް މިހާތަނަށް އާދެވިފައި ނުވާ ކަމަށާއި އެކަނި އެއްވެސް ޕާޓީއަކަށް ރިޔާސީ އިންތިހާބު ކާމިޔާބު ނުކުރެވޭނެ ކަމަށް ރައީސް އިބްރާހިމް މުހައްމަދު ސޯލިހު ވެސް ވިދާޅުވެފައިވާ ކަމަށެވެ.

މިދިޔަ އަހަރުގެ ރިޔާސީ އިންތިހާބު ފިޔަވައި އެހެން ހުރިހާ އިންތިހާބެއްގައި ޖޭޕީގެ ފަރާތުން ނެރޭ ރިޔާސީ ކެންޑިޑޭޓަކީ ގާސިމް އެވެ. އެ ޕާޓީގެ އަސަސީ ގަވައިދުގައި އޮންނަ ގޮތުން ރިޔާސީ ކެންޑިޑޭޓަކީ އޭރަކު ޕާޓީގެ ލީޑަރެވެ.

ޖޭޕީން އެހެން ޕާޓީތަކާ އެކު ކޯލިޝަން ހެދުމާ ގުޅޭ ގޮތުން ވެސް ގޮތެއް ނިންމާނީ ކޮންގްރެސް އިން ކަމަށް ގާސިމް ވިދާޅުވި އެވެ.