ޖޭޕީގައި އަލީ ސޯލިހްގެ މަގާމު މަތިކޮށް، ކައުންސިލަށް

ޖުމްހޫރީ ޕާޓީގެ ސްޕޯކްސް ޕާސަންގެ މަގާމުގައި މިހާތަނަށް ހުންނެވި އަލީ ސޯލިހް، އެ ޕާޓީގެ ޗީފް ސްޕޯކްސް ޕާސަންގެ މަގާމަށް ބަދަލުކޮށްފި އެވެ. މި ބަދަލާ އެކު އޭނާ އެއްވެސް އިންތިޚާބަކާ ނުލައި ޖޭޕީގެ ކައުންސިލްގައި ހިމެނިވަޑައިގަންނަވާނެ އެވެ.

ޖުމްހޫރީ ޕާޓީގެ އާ އަސާސީގެ ގަވައިދުގައިވާ ގޮތުގެ މަތިން، އަލަށް އުފެއްދި ޗީފް ސްޕޯކްސް ޕާސަންގެ މަގާމުގެ އިތުރުން، ޕާޓީގެ ރަޖިސްޓްރާ އާއި ސެކްރެޓަރީ ޖެނެރަލްގެ މަގާމުގައި ހުންނަވާ ބޭފުޅަކު ވެސް އިންތިޚާބަކާ ނުލައި ކައުންސިލްގައި ހިމެނިވަޑައިގަންނަވާނެ އެވެ.

ޖޭޕީގެ މިހާރުގެ ސެކްރެޓަރީ ޖެނެރަލަކީ ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަހުމަދު ސަމީރެވެ. ރަޖިސްޓްރާ އަކީ މުހައްމަދު އިލްހާމެވެ.

ކުރިން ޑީއާރުޕީގެ ކައުންސިލް މެމްބަރު ކަމާއި ތަރުޖަމާނުކަން ވެސް ކުރެއްވި އަލީ ސޯލިހު، ޖޭޕީއާ ގުޅިވަޑައިގަތީ 2013 ވަނަ އަހަރުގެ ރިޔާސީ އިންތިޚާބަށް ފަހު އެވެ. އަދި ރައީސް މުހައްމަދު ވަހީދުގެ ސަރުކާރުގައި ފިޝަރީޒް މިނިސްޓްރީގެ ސްޓޭޓް މިނިސްޓަރުކަން ވެސް އޭނާ ކުރެއްވި އެވެ.

ޖޭޕީގެ އިސް މަގާމުތަކަށް ކުރިމަތިލުމުގެ ފުރުސަތު މިހާރު ވަނީ ހަމަވެފަ އެވެ. އެ މަގާމުތަކަށް ބޭފުޅުން އައްޔަން ކުރާނީ މި ހަފުތާ ބަންދުގައި ޕެރެޑައިސް އައިލެންޑް ރިސޯޓުގައި ބާއްވާ އެ ޕާޓީގެ ކޮންގްރެސްގަ އެވެ.