ސާފުކުރުމުގެ ބޮޑު ހަރަކާތް ރާއްޖޭގައި ވެސް ހޮނިހިރު ދުވަހު އޮންނާނެ

މުޅި ދުނިޔޭގައި ފާހަގަކުރާ ވޯލްޑް ކްލީންއަޕް ޑޭގެ ހަރަކާތްތައް މި އަހަރު ވެސް ރާއްޖޭގައި ބާއްވާނެ ކަމަށް އެ ހަރަކާތް ރާއްޖޭގައި އިންތިޒާމުކުރާ "ލެޓްސް ޑޫ އިޓް މޯލްޑިވްސް" އިން ބުނެފި އެވެ.

ދުނިޔެއަށް ކުރިމަތިވެފައިވާ ކުނީގެ މައްސަލައަށް ހޭލުންތެރިކޮށް ތިމާވެށި ސާފުކޮށް ބެލެހެއްޓުމަށް އަހުލުވެރި ކުރުވުމަށް ކުރިއަށް ގެންދާ އެ ހަރަކާތް 180 ގައުމެއްގައި ކުރިއަށް ގެންދާނެ އެވެ. ބައިނަލްއަގުވާ ޖައްމިއްޔާ، ލެޓްސް ޑޫ އިޓްގެ ރާއްޖޭގެ ގޮފިން ބާއްވާ ހަރަކާތް އޮންނާނީ އަންނަ ހޮނިހިރު ދުވަހު އެވެ.

އެ ޖައްމިއްޔާ އިން ބުނީ މި އަހަރު އެ ޖަމިއްޔާގެ ފަރާތުން ރަސްމީކޮށް އެ ހަރަކާތް ބޭއްވުމަށް ހަމަޖެހިފައި ވަނީ ކ. ހިންމަފުށީގައި ކަމަށެވެ. އަދި ރާއްޖޭގެ އެކި ރަށްރަށުގައި އެ ހަރަކާތް ހިންގަން ރާވާފައިވާ ކަމަށާއި، ރަށްރަށުގެ ކައުންސިލުން އެ ހަރަކާތް ބޭއްވުމުގެ އިންތިޒާމުތައް މިހާރު ހަމަޖައްސަމުން އަންނަވެސްް ފާހަގަ ކުރި އެވެ.

އެ ޖަމިއްޔާ އިން ބުނީ އެ ހަރަކާތުގައި މި ފަހަރު ވެސް މޫދާއި، ގޮނޑުދޮށްތަކާއި، ރަށުތެރެ ސާފުކުރަން ހަމަޖެހިފައިވާ ކަމަށާއި މިއީ މުޅި ދުނިޔޭގައި ހިންގާ މިފަދަ އެންމެ ބޮޑު ހަރަކާތް ކަމަށެވެ. މިއީ މުޅި ދުނިޔޭގައި އެއް ދުވަހެއްގައި ގިނަ ގައުމުތަކެއްގައި، ގިނަ ބަޔަކު އެއްފަހަރާ ނުކުމެ ތިމާވެށި ސާފު ކުރާ އިވެންޓެކެވެ.

ކުނި ރައްކާތެރިކޮށް ނައްތާލުމަކީ ރާއްޖެއަށް ދިމާވެފައިވާ މައްސަލައަކަށް ވާއިރު، އެ ދުވަހު ނަގާ ކުނި މެނޭޖުކުރުމުގެ އިންތިޒާމު ހަމަޖެއްސުމަށް ވެމްކޯ އާއި އެކި ފަރާތްތަކާ އެކު އަންނަނީ މަޝްވަރާކުރަމުންނެވެ. އަދި އެ ހަރަކާތަށް ސަރުކާރުގެ އެއްބާރުލުން ލިބޭ ކަމަށާއި، ސަރުކާރުގެ އެކި ވުޒާރާތަކުން އެ ހަރަކާތުގައި ބައިވެރިވުމަށް ރަޖިސްޓްރީ ކޮށްފައިވާ ކަމަށް ޖަމިއްޔާއިން ބުންޏެވެ.

އެ ޖަމިއްޔާއިން ބުނީ މިދިޔަ އަހަރު ވެސް ބޭއްވި "ވޯލްޑް ކްލީން އަޕް ޑޭ"ގެ ހަރަކާތަށް ބޮޑު ތަރުހީބެއް ލިބިފައިވާ ކަމަށާއި މިދިޔަ އަހަރު މުޅި ރާއްޖޭގެ އެކި ސަރަހައްދުތަކުން 18،000 އެއްހާ މީހުން އެ ހަރަކާތުގައި ބައިވެރިވި ކަމަށެވެ.