އޮސްލޯ މެރަތަންގައި ޝަމްހާ އަށް އިތުރު ރެކޯޑްތަކެއް

މިދިޔަ ހޮނިހިރު ދުވަހު ނޯވޭގެ ހޮސްލޯ މެރަތަންގެ ހާފް މެރަތަން ކެޓަގަރީގައި ވާދަކޮށް، ރާއްޖޭގެ ކުރީގެ އެއްވަނަ އަންހެން ދުވުންތެރިޔާ ޝަމްހާ އަހުމަދު ގައުމީ އިތުރު ރެކޯޑްތަކެއް މުގުރާލައިފި އެވެ.

ހޮނިހިރު ދުވަހު ހާފް މެރަތަންގައި ވާދަކޮށް، ޝަމްހާ ވަނީ ކުރިން މަރްޔަމް އަބްދުލް ކަރީމް (މަރީ) ހަދައިފައިވާ ހާފް މެރަތަންގެ ރެކޯޑްގެ އިތުރުން ތިން ރެކޯޑް މުގުރައިލައިފަ އެވެ. އެއީ 20 ކިލޯމީޓަރު، 15 ކިލޯމީޓަރު އަދި 10 ކިލޯމީޓަރެވެ. އެ ހުރިހާ ރެކޯޑްތަކެއް ވެސް މިދިޔަ ހޮނިހިރު ދުވަހާ ހަމައަށް އޮތީ ތަޖުރިބާކާރު ފިޓްނަސް ޓްރޭނަރު މަރީ އަތުގަ އެވެ.

މަރީ އެ ރެކޯޑްތައް ހެދީ ޖެނުއަރީ މަހު ޔުނައިޓެޑް އެރަބް އެމިރޭޓްސްގެ ދުބާއީގައި ބޭއްވި ރަކް އަލް ހައިމާ މެރަތަންގެ ހާފް މެރަތަން ކެޓަގަރީގަ އެވެ.

ހާފް މެރަތަންގެ ރޭސް ޝަމްހާ ނިންމީ 1:27:51 (1 ގަޑި 27 މިނެޓާއި 51 ސިކުންތު) އިންނެވެ. ރަކް އަލް ހައިމާގައި މަރީ ރޭސް ނިންމީ 1:30:46 އިންނެވެ. ހޮނިހިރު ދުވަހު އެތުލެޓިކްސް އެސޯސިއޭޝަނުން އެންމެ ފުރަތަމަ އިއުލާން ކުރީ ޝަމްހާގެ ހާފް މެރަތަންގެ ރެކޯޑް އެކަންޏެވެ. އެކަމަކު އެ އެސޯސިއޭޝަނުން ވަނީ އަނެއް ތިން ރެކޯޑް ވެސް ގައުމީ ރެކޯޑްގެ ގޮތުގައި ލިސްޓް ކޮށްފައިވާކަން އިއްޔެ ހާމަ ކޮށްފަ އެވެ.

އަންހެންުންގެ 20 ކިލޯމީޓަރުގެ ގައުމީ ރެކޯޑް ޝަމްހާ ހެދީ މަރީގެ ޓައިމް އަށް ވުރެ ގާތްގަނޑަކަށް ހަ މިނެޓް އަވަހަށެވެ. ޝަމްހާ 20 ކިލޯމީޓަރުގެ ރޭސް ނިންމީ 1:22:40 އިންނެވެ. ކުރިން މަރީ އަތުގައި އެ އިވެންޓްގެ ރެކޯޑް އޮންނަނީ ރަކު އަލް ހައިމާގައި 1:28:11 އިން ނިންމައިގެންނެވެ.

ޝަމްހާ 15 ކިލޯމީޓަރުގެ ގައުމީ ރެކޯޑް ހެދީ ވެސް މަރީ ޖެނުއަރީ މަހު ނިންމި ވަގުތަށް ވުރެ ގާތްގަޑަކަށް ފަސް މިނެޓް އަވަހަށެވެ. ރަކު އަލް ހައިމާގައި މަރީ އެ ރެކޯޑް ހެދީ 1:05:23 ންނެވެ. ޝަމްހާ އެ ރެކޯޑް މުގުރާލީ 1:01:18 އިންނެވެ. އަންހެނުންގެ 10 ކިލޯމީޓަރުގެ ރޭސް މަރީ ނިންމީ 43 މިނެޓުންނެވެ. ޝަމްހާ ރެކޯޑް މުގުރާލީ 40:39 (40 މިނެޓް 39 ސިކުންތު) އިން ނެވެ.

މިދިޔަ މަހުގެ ނިޔަލަށް އަންހެނުންގެ 100 މީޓަރުގެ ގައުމީ ރެކޯޑް 19 އަހަރު ވަންދެން ދެމެހެއްޓި، ޝަމްހާ ތައްޔާރު ވަމުން ދަނީ އާދިއްތަ ދުވަހު ބާލިން މެރަތަންގައި ވާދަ ކުރުމަށެވެ. ޖަރުމަންގައި ދިރިއުޅެމުން ޝަމްހާ ދަނީ ތަޖުރިބާކާރު މެރަތަން ދުވުންތެރިޔާ ނަސްރުﷲ އަހުމަދު (ނަސްރު) ދީފައިވާ ޕްރޮގްރާމާ އެއްގޮތަށް ތަމްރީން ހަދަމުންނެވެ.

ނަސްރު ބުނީ ރަނގަޅަށް ރިކަވަރީ ހެދިއްޖެނަމަ ޝަމްހާގެ އަމާޒަކީ ބާލިންގައި ރާއްޖޭގެ މެރަތަން ރެކޯޑް ވެސް މުގުރާލުން ކަމަށެވެ.

އޮސްލޯ މެރަތަންގެ ހާފް މެރަތަން ކެޓަގަރީގައި ނަސްރުގެ ކޯޗު ކަމުގެ ދަށުން ޓްރޭނިން ހަދަމުން އަންނަ އަނެއް ދެ ދުވުންތެރިން ކަމަށްވާ އައިޝަތު ރިޝްމީ އާއި އަހުމަދު ނަސީރު ވެސް ވާދަ ކުރި އެވެ. ރިޝްމީ ރޭސް ނިންމީ 1:33:58 އިންނެވެ.

އޮސްލޯ މެރަތަންގެ ފުލު މެރަތަންގައި ވާދަކޮށް ނަސްރު ވަނީ އޭނާގެ 83 ވަނަ މެރަތަން ފުރިހަމަ ކޮށްފަ އެވެ. އޭނާ ރޭސް ނިންމީ 3:30:58 އިންނެވެ. އާދިއްތަ ދުވަހު ބާލިން މެރަތަންގައި ވެސް އަދި އަންނަ މަހު ދެ ވަނަ ދުވަހު ޖަރުމަންގެ އެހެން ސިޓީއެއް ކަމަށްވާ ކްލޯންގައި ބާއްވާ މެރަތަންގައި ވެސް ފުލު މެރަތަންގައި ނަސްރު ވާދަ ކުރާނެ އެވެ. އޭނާ ބުނީ ޓާގެޓަކީ އެ ދެ މެރަތަން ވެސް ހަތަރު ގަޑިއިރަށް ވުރެ އަވަހަށް ނިންމުން ކަމަށެވެ.