ޝަމްހާ ދުވީ ރެކޯޑް ޓައިމިން އަށް ވުރެ އަވަހަށް، އެކަމަކު ރެކޯޑަކަށް ނުވި!

އިއްޔެ ޖަރުމަން ވިލާތުގައި އޮތް މަޝްހޫރު ބާލިން މެރެތަންގައި ވާދަކޮށް، ރާއްޖޭގެ ޝަމްހާ އަހުމަދު މެރަތަން އާއި ހާފް މެރަތަންގެ ރެކޯޑަށް ވުރެ އަވަހަށް ރޭސް ނިންމައިފި އެވެ.

އެކަމަކު ގައުމީ ރެކޯޑެއްގެ ގޮތުގައި އޭނާގެ ރެކޯޑް ލިސްޓްގައި ނުޖަހަ އެވެ. އެއީ ރޭސް ފަށަން ޖަހާ ބަޑީގެ އަޑަށް ވުރެ ގާތްގަނޑަކަށް ތިން މިނެޓް ލަހުން އޭނާ އަށް ރޭސް ފެށޭ ގޮތްވުމުންނެވެ. ބާލިން މެރެތަގައި 80،000 ވުރެ ގިނަ ދުވުންތެރިން ވާދަކުރި އެވެ.

މެރަތަން އާއި ހާފް މެރެތަންގެ ދެ އިވެންޓްގެ ރެކޯޑް ވެސް އޮންނަނީ ޝަމްހާ އަތުގަ އެވެ.

ޝަމްހާގެ ކުރިން އެ ރެކޯޑް އޮތީ މަރްޔަމް އަބްދުލް ކަރީމް (މަރީ) އަތުގަ އެވެ. އޭނާ އެ ރެކޯޑް ހެދީ 2019 ގެ ސައުތު އޭޝިއަން ގޭމްސްގަ އެވެ. ކުރީގެ ސްޕްރިންޓް ދުވުންތެރިޔާ ޝަމްހާ، ދިގު ދުވުންތަކުގެ ރެކޯޑް ހަދަން ފެށީ 2022 އިން ފެށިގެންނެވެ. އެ އަހަރު މެރަތަން ރެކޯޑް ވެސް އޭނާ ހެދީ ބާލިން މެރެތަންގައި ވާދަކޮށެވެ.

އޭރުގެ ރެކޯޑަށް ވުރެ ގާތްގަނޑަކަށް އެއް މިނެޓް އަވަސް މިނެއްގައި ޝަމްހާ އިއްޔެ ރޭސް ނިންމި އެވެ. އިއްޔެ އޭނާގެ ޓައިމަކީ 3 ގަޑިއިރާއި 1 މިނެޓް 56 ސިކުންތެވެ.

ބާލިންގެ އެ ރާސްތާގައި 2022 ގައި ފުރަތަމަ ފަހަރަށް މެރަތަންގެ ރެކޯޑް ޝަމްހާ ހެދީ 3 ގަޑިއިރާއި 2 މިނެޓް 41 ސިކުންތުންނެވެ.

ބާލިންގެ އެ ރޭހުގައި އިއްޔެ ޝަމްހާ ވަނީ ހާފް މެރެތަންގެ ރާސްތާ ވެސް، މިހާރު އޭނާ އަތުގައި އޮތް އެ އިވެންޓްގެ ގައުމީ ރެކޯޑަށް ވުރެ އަވަހަށް ކަޑަތުކޮށްފަ އެވެ.

މިދިޔަ އަހަރު ޖެނުއަރީ މަހު ބަންގްލަދޭޝްގައި ބޭއްވި ބަންގުބަންދު މެރެތަންގައި 1 ގަޑިއިރާއި 26 މިނެޓާއި 41 ސިކުތުންން ނިންމައިގެން ހެދި ރެކޯޑަށް ވުރެ އަވަހަށް ބާލިންގައި އިއްޔެ ޝަމްހާ ދުވީ 1 ގަޑިއިރާއި 26 މިނެޓް 28 ސިކުންތުންނެވެ.

ޝަމްހާގެ ކޯޗު ނަސްރުﷲ އަހްމަދު ބުނީ އިއްޔެގެ މެރެތަންގައި އެހެން އިވެންޓްތަކުގެ ރާސްތާ ވެސް ރާއްޖޭގައި މިހާރު އޮތް ރެކޯޑަށް ވުރެ އަވަހަށް ނިންމި ކަމަށެވެ.

ގަން ޓައިމް އަށް ދުވަން ނުފެށުނީ ކީއްވެ؟

ނަސްރު ބުނީ ޝަމްހާގެ ޓައިމް ރެކޯޑަކަށް ނުވީ ރޭސް ފަށަން ޖަހާ ބަޑީގެ އަޑަށް ވުރެ ލަހުން ނައްޓާލެވުމުން ކަމަށެވެ. އޭނާ ބުނީ މިފަހަރު ރޭހުގައި ޝަމްހާ އަށް ފަށަން ޖެހުނީ ވަރަށް ފަހަތުގައި ހުރެގެން ކަމަށެވެ. އެހެންވެ ގަން ޓައިމަށް ނައްޓާލެވޭ ގޮތް ނުވި ކަމަށް އޭނާ ބުންޏެވެ.

ނަސްރު ބުނީ ގަން ޓައިމް އަށް ނައްޓާލެވޭ ވަރަށް ކުރީ ސަފުން ޖާގަ ހޯދޭނީ އެތުލެޓިކްސް އެސޯސިއޭޝަނުން ފޮނުވާ ލިސްޓްގައި ހިމެނިގެން ކަމަށެވެ. އެ ލިސްޓުން ޝަމްހާ އަށް ޖާގަ ލިބިފައިނުވާކަމަށް ރާއްޖޭގެ އެންމެ ގިނަ މެރަތަންގައި ވާދަކުރި ނަސްރު ބުންޏެވެ.

އެކަމަކު އެތުލެޓިކްސް އެސޯސިއޭޝަންގެ ޖެނަރަލް ސެކްރެޓަރީ އަހްމަދު މުންތަގިމް ވިދާޅުވި ގޮތުގައި ބާލިން މެރަތަން އިންތިޒާމު ކުރާ ކުންފުނިން ރާއްޖޭގެ އެސޯސިއޭޝަނަށް ދޭ ޖާގައިގައި ހިމެނިގެން ދުވާ ދުންތެރިންނަށް ވެސް ގަން ޓައިމް އަށް ނައްޓާލެވޭހާ ކުރީ ސަފުން ޖާގަ ނުލިބޭ ކަމަށެވެ. ސަބަބަކީ އެ ރޭހުގައި 80،000 އަށް ވުރެ ގިނަ ދުވުންތެރިން ދުވާއިރު، އޭގެ ތެރޭގައި ދުނިޔޭގެ ފެންވަރުގެ އެތައް ދުވުންތެރިން ހިމެނޭތީވެ އެވެ.

ގައުމީ ރެކޯޑް ގަބޫލުކުރުމުގައި ވޯލްޑް އެތުލެޓިކްސްއިން ކަނޑައަޅާފައިވާ އުސޫލަކީ ގަން ޓައިމް އަށް ރޭސް ފަށައިގެން ގޮސް ނިންމުން ކަމަށް އެތުލެޓިކްސްގެ ޓެކްނިކަލް އޮފިޝަލްކަން ކުރައްވާ މުންތަގިމް ވިދާޅުވި އެވެ.