ކޫއްޑޫގައި ޓިނު ބަދަލުކުރަން އުޅުނު ބިދޭސީއަކު ވެއްޓި ވެންޓިލޭޓަރުގައި

ގއ. ކޫއްޑޫގައި ހުންނަ މިފްކޯގެ އިމާރާތެއްގެ ޓިނު ބަދަލުކުރުމުގެ މަސައްކަތުގައި އުޅެނިކޮށް، ބިދޭސީއަކު މިއަދު ވެއްޓި ހާލު ސީރިއަސްވެއްޖެ އެވެ.

މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ ހެނދުނު އެ ހާދިސާ ހިނގުމުން ފަރުވާ ދިނުމަށް ވަގުތުން އެ އަތޮޅު ވިލިނގިއްޔަށް ގެންދިޔަ ކަމަށެވެ.

ވިލިނގިލީ ހޮސްޕިޓަލްގެ އޮފިޝަލަކު ވިދާޅުވީ ބޮލަށް ސީރިއަސް ޒަހަމްތަކެއް ލިބިގެން އުމުރުން 41 އަހަރުގެ ބިދޭސީއަކަށް 8:30 އިން ފެށިގެން ވެންޓިލޭޓަރުގައި ފަރުވާ ދެމުން އަންނަ ކަމަށެވެ.

އޮފިޝަލް ވިދާޅުވީ އަނިޔާވި މީހާ ފަރުވާއަށް މާލެ ގެނައުމުގެ މަސައްކަތް ކުރަމުން އަންނަ ކަމަށެވެ.

މަސައްކަތުގައި އުޅެނިކޮށް މީގެ ކުރިން ވެސް އެތައް ބިދޭސީންނަކަށް ބޮޑެތި އަނިޔާތައް ވެފައި އެބަހުއްޓެވެ.