އަރުޝަދު ދޫކޮށްލުމުގައި ގޯހެއް ނެތް، އުސޫލު މިހާރު ބަދަލުކޮށްފިން: ޕޮލިސް

މަސްތުވާތަކެތީގެ ބޮޑު މައްސަލައެއްގައި ތުހުމަތު ކުރެވޭ އަރުޝަދު ހާލިދު ފުލުހުން އަމިއްލަ އަށް ބަންދުން ދޫކޮށްލީ މިހާތަނަށް ވެސް އަމަލުކުރާ އުސޫލުން ކަމަށާއި އެކަމަކު މިއަދުން ފެށިގެން އެ އުސޫލުތަކަށް ބަދަލު ގެނެސްފައިވާ ކަމަށް ފުލުހުން ބުނެފި އެވެ.

ސްރީ ލަންކާގައި ގިނަ ދުވަސްތަކެއް ވަންދެން އުޅުމަށް ފަހު ރާއްޖެ އައި އަރުޝަދަކީ ނުވަ ކިލޯގެ ޑްރަގް މައްސަލައެއްގައި ދައުލަތުން ދައުވާކޮށް، ކުށް ސާބިތުނުވުމުން ހައި ކޯޓުގައި މައްސަލަ އޮތް މީހެކެވެ. އޭނާ ބަންދު ކޮށްގެން ހައި ކޯޓަށް ގެންނަން އަމުރު ނެރެފައި އޮއްވައި ފުލުހުން ރޭ ވަނީ އޭނާ ދޫކޮށްލައިފަ އެވެ.

އެ މައްސަލަ ހޫނުވެ، ޕްރޮސެކިއުޓާ ޖެނެރަލްގެ އޮފީހުން ވަނީ އަރުޝަދު ދޫކޮށްލަން ނިންމި ފުލުހުންގެ މައްސަލަ ނޭޝަނަލް އިންޓަގްރިޓީ ކޮމިޝަން (އެންއައިސީ) އާއި ޕޮލިސް ބޯޑަށް ފޮނުވައިފަ އެވެ. ޕީޖީ އޮފީހުން މިއަދު ބުނިގޮތުގައި އަރުޝަދު ދޫކޮށްލީ ތަހުގީގުކުރާ ޑިޕާޓްމެންޓާއި ޕީޖީގެ މަޝްވަރާއެއް ވެސް ނެތި އެވެ.

އެކަމަކު ފުލުހުންގެ މީޑިއާ އޮފިޝަލް ވިދާޅުވީ އަރުޝަދުގެ ދޫކޮށްލުމުގައި ވެސް އަމަލުކުރީ އެފަދަ އެހެން މައްސަލަތަކުގައި އަމަލުކުރާ އުސޫލުން ކަމަށާއި މި ފަހަރު ވެސް ތަފާތު ގޮތަކަށް އަމަލު ނުކުރާ ކަމަށެވެ. ނަމަވެސް އަރުޝަދުގެ މައްސަލަ ފެންމަތިވުމުން އެ އުސޫލު މިއަދުން ފެށިގެން ބަދަލުކޮށްފައިވާ ކަމަށް އޮފިޝަލް ވިދާޅުވި އެވެ.

"މި މައްސަލާގައި ތަފާތު ގޮތަކަށް އަމަލުކޮށްފައިވާ ކަން މިހާތަނަށް ފާހަގަވެފައެއް ނުވޭ،" އޮފިޝަލް ވިދާޅުވި އެވެ.

ފުލުހުން އަމިއްލައަށް އަރުޝަދު ދޫކޮށްލާފައިވާތީ ހައި ކޯޓުން ވެސް ނިންމީ އިތުރަށް އޭނާ ބަންދު ނުކުރުމަށެވެ. އެކަމަކު އޭނާ ފުރުން މަނާކުރުމުގެ އަމުރެއް ރޭ ވަނީ ނެރެފަ އެވެ.

އަރުޝަދުގެ ގާނޫނީ ވަކީލުން ވިދާޅުވެފައި ވަނީ އަރުޝަދު ހޯދަން މިހާތަނަށް ފުލުހުން މަސައްކަތް ކުރާ ކަން އެނގިފައި ނުވާ ކަމަށެވެ. އަދި އަރުޝަދު އުޅުނީ ފިލައިގެން ނޫޅޭ ކަމަށް ވަކީލު ވިދާޅުވެފައި ވެ އެވެ.