ތައިވާނާ މެދު އޮތް ދެނެގަތުން ޗައިނާ ދޫކޮށްލައިފި

ތައިވާންގެ އެކި ކަންކަމުގައި އަމަލުކުރުމަށް އެމެރިކާ އާއި ޗައިނާއާ ދެމެދު އުފެދިފައި އޮތް އެތައް އަހަރެއްވީ ދެނެގަތުން، ޗައިނާ އިން އެއްފަރާތްކޮށް އަމިއްލަ ގޮތްތަކެއް ގެންގުޅެމުންދާ ކަމަށް އެމެރިކާ އިން ތުހުމަތުކޮށްފި އެވެ.

އެމެރިކާގެ ޚާރިޖީ ވަޒީރު އެންޓޮނީ ބްލިންކެން އިއްޔެ ވިދާޅުވި ގޮތުގައި ތައިވާންގެ ކަންކަމުގައި އެމެރިކާ އާއި ޗައިނާ އިން މިހާތަނަށް ވެސް އަމަލު ކުރަމުން އައީ ދެ ގައުމުގެ ދެމެދުގައި އެތައް އަހަރެއް ވަންދެން އަމަލުކުރަމުން އައި ވަކި ހަމަތަކެއްގެ މަތިންނެވެ. އެހެން ނަމަވެސް، ޗައިނާ އިން އެ ގޮތްތައް މުޅިން އެއްފަރާތްކޮށް ބާރުގެ ބޭނުންކުރުމަށް މިސްރާބު ހިފާފައިވާ ކަމަށް އޭނާ ވިދާޅުވި އެވެ.

ބްލިންކެން ވިދާޅުވީ ތައިވާންގެ މައްސަލައިގައި ޗައިނާ އިން ހާސިލުކުރަން ބޭނުންވާ ކަންކަން ހާސިލުކުރުމަށް ޗައިނާގެ ފަރާތުން ތައިވާނަށް އެކި ގޮތްގޮތުން ފިއްތުންތައް ވެސް ކުރިމަތިކުރަމުން އަންނަ ކަމަށެވެ. އަދި ބައެއް ހާލަތްތަކުގައި ބާރުގެ ބޭނުންކުރާނެ ކަމުގެ އިންޒާރު ވެސް ޗައިނާ އިން ތައިވާނަށް ދެމުންދާ ކަމަށް އޭނާ ތުހުމަތުކުރެއްވި އެވެ.

އޭނާ ވިދާޅުވި ގޮތުގައި ތައިވާންގެ މައްސަލައިގައި މުއާމަލާތު ކުރުމަށް ޗައިނާ އާއި އެމެރިކާއާ ދެމެދު ވަކި ދެނެގަތުމެއް ގާއިމުކުރެވިފައި އޮންނަތާ 40 އަހަރު ވެއްޖެ އެވެ. އެ ދެނެގަތުމާ އެއްގޮތަށް އެމެރިކާ އިން އަމަލުކުރަމުން އަންނަނީ އެއް ޗައިނާ ސިޔާސަތު އިސްކޮށްގެން ކަމަށާއި، އެމެރިކާ އިން ތައިވާނަށް ފޯރުކޮށްދެނީ ތައިވާންގެ އަމިއްލަ ދިފާއަށް ބޭނުންވާ ހަތިޔާރު ކަމަށް ވެސް އޭނާ ވިދާޅުވި އެވެ.

އެ ދެނެގަތުމުގެ އެންމެ މުހިންމު ކަމަކީ، ތައިވާންގެ މައްސަލައިގައި އެމެރިކާ އާއި ޗައިނާއާ ދެމެދު ކުރިމަތިލުމެއް ނުއުފެދުން ކަމަށް ވެސް ބްލިންކެން ވިދާޅުވި އެވެ. އެހެން ނަމަވެސް ޗައިނާ އިން މިހާރު އެ ދެނެގަތުން އެއްފަރާތްކޮށް، ތައިވާން ޗައިނާއާ އެއްކޮށްލުމުގެ މަސައްކަތް ހަލުވިކޮށްފައިވާ ކަމަށް ބްލިންކެން ތުހުމަތު ކުރެއްވި އެވެ.

ބްލިންކެން ވިދާޅުވި ގޮތުގައި ޗައިނާއާ އެކުގައި "ފިނި ހަނގުރާމައެއް" ފަށައި، ޗައިނާ ގައިދުކޮށް ހިފެހެއްޓުމަކީ އެމެރިކާ ބޭނުންވާ ކަމެއް ނޫނެވެ. އެހެން ނަމަވެސް އެމެރިކާގެ މަސްލަހަތުތައް ހިމާޔަތްކުރުމުގައި އެމެރިކާ ދެމިއޮންނާނެ ކަމަށް ވެސް އޭނާ ވިދާޅުވި އެވެ.

އެމެރިކާގެ ޚާރިޖީ ވަޒީރު މި މޭރުމުން ވާހަކަ ދެއްކެވި އިރު، ޗައިނާގެ ރައީސް ޝީ ޖިންޕިންގް ދާދި ފަހުން ވިދާޅުވެފައިވަނީ، ހޮންކޮންގްގެ މައްސަލަ ޗައިނާ ބޭނުންވާ ގޮތަށް ހައްލު ކުރެވި، އެ ސަރަހައްދު މިހާރު އޮތީ ޗައިނާގެ ފުރިހަމަ ކޮންޓްރޯލްގެ ދަށުގައި ކަމަށެވެ. އަދި ދެން ކުރަން އޮތް ކަމަކީ ތައިވާން ކޮންޓްރޯލް ކުރުން ކަމަށް ވެސް އޭނާ ވިދާޅުވި އެވެ.