އަމީނިއްޔާ އަށް 78: ހިދުމަތްތެރި މުވައްޒަފުންގެ އަގުވަޒަންކޮށްފި

އަމީނިއްޔާ ސްކޫލަށް ގިނަ ދުވަހު ހިދުމަތްކުރި މުވައްޒަފުންގެ އަގުވަޒަންކޮށް، މިއަދު ސެޓްފިކެޓު ދީފި އެވެ.

އެ ސްކޫލުގެ 78 ވަނަ އަހަރީ ދުވަސް ފާހަގަކުރަން ބޭއްވި ހާއްސަ އެސެމްބްލީގައި، އެންމެ ގިނަ ދުވަހު ހިދުމަތްކުރި 10 މުވައްޒަފަކަށް ސެޓްފިކެޓު ހަވާލުކޮށްދެއްވީ އެޑިއުކޭޝަން މިނިސްޓަރު ޑރ. އާއިޝަތު އަލީ އެވެ.

އެ މުވައްޒަފުންގެ ތެރޭގައި 32 އަހަރާއި 31 އަހަރަށް ހިދުމަތްކުރި ޓީޗަރުންނާއި މަސައްކަތު މީހުން ހިމެނެ އެވެ.

އަމީނިއްޔާގެ ގޯތިތެރޭގައި ބޭއްވި އެސެމްބްލީގައި ވަނީ އެ ސްކޫލުގެ ޕްރިންސިޕަލްކަން ކުރެއްވި ބައެއް ބޭފުޅުން ވެސް ބައިވެރިވެވަޑައިގެންފަ އެވެ. އޭގެ ތެރޭގައި އެޑިއުކޭޝަން މިނިސްޓްރީގެ މިހާރުގެ ސްޓޭޓް މިނިސްޓަރު އާތިޔާ ނަސީރު އަދި ވަފާ ވަހީދު ހިމެނިވަޑައިގަންނަވަ އެވެ.

އަމީނިއްޔާގެ ޕްރިންސިޕަލް ނާޒްލީން ވާފިރު "މިހާރު" އަށް ވިދާޅުވީ އެ ސްކޫލަށް މި ވީ މުއްދަތުގައި ގިނަ ބަދަލުތަކެއް ގެނެސްފައިވާ ކަމަށެވެ. އޭގެ ތެރޭގައި އާ އިމާރާތެއްގައި ކިޔަވައިދޭން ފެށުމާއި ދަރިވަރުންގެ އަދަދު އެއް ދުވަހުން އަނެއް ދުވަހަށް އިތުރުވަމުން ދިއުން ފާހަގަކުރެއްވި އެވެ.

"ކިޔަވައިދިނުމުގައި ވެސް އެންމެ ފަހުގެ ވަސީލަތްތައް ގާއިމްކޮށް، އެ ވަސީލަތްތަކުގެ އެހީގައި ކިޔަވައިދެމުން މި އަންނަނީ މިހާރު،" ނާޒްލީން ވިދާޅުވި އެވެ.

ގްރޭޑު 1-10 އަށް 2،300 ދަރިވަރުން ކިޔަވަމުން އަންނަ ސްކޫލުގެ ޕްރިންސިޕަލް ވިދާޅުވިގޮތުގައި، ނުކުޅެދުންތެރިކަން ހުންނަ ކުދިންނަށް ކިޔަވައިދިނުމަކީ ވަރަށް ބޮޑު ގޮންޖެހުމެކެވެ. އެކަމަކު، އެ ކުދިންނަށް ކިޔަވައިދިނުން ވެސް ކާމިޔާބުކަމާއެކު ގެންދެވޭ ކަމަށް އޭނާ ވިދާޅުވި އެވެ.

ހާއްސަ އެހީއަށް ބޭނުންވާ 200 ކުއްޖަކު އަމީނިއްޔާގައި މިހާރު ކިޔަވަ އެވެ.

"މިހާ ގިނަ ކުދިންނަށް ކިޔަވައިދިނުމަކީ ފަސޭހަ ކަމެއް ނޫން. އެކަމަކު، އިންކްލޫސިވް އެޑިއުކޭޝަނެއް އެބަ ފޯރުކޮށްދެވޭ،" ނާޒްލީން ވިދާޅުވި އެވެ.

އަމީނިއްޔާގެ އަހަރީ ދުވަހާ ގުޅުވައިގެން މި ހަފުތާގައި ލޭ ހަދިޔާ ކުރުން އަދި މި ހުކުރު ދުވަހު ހިނގާލުމެއް ބާއްވަން ވަނީ ނިންމައިފަ އެވެ.