އަންނަ އަހަރު އިތުރު ތިން ދުވަހު ސަރުކާރު ބަންދުކުރަން ނިންމައިފި

އަންނަ އަހަރުގެ ސަރުކާރު ބަންދު ދުވަސްތަކަށް، ރައީސް އިބްރާހިމް މުހައްމަދު ސޯލިހު ތިން ދުވަސް މިއަދު އިތުރުކުރައްވައިފި އެވެ.

އެކަން އިއުލާންކުރެއްވީ ރައީސް އޮފީހުގެ ޗީފް އޮފް ސްޓާފް، އަލީ ޒާހިރު ސޮއިކުރައްވާ މިއަދު ނެރުއްވި ހާއްސަ ދެންނެވުމެއްގަ އެވެ.

އެ ބަޔާނުގައިވާ ގޮތުން އަންނަ އަހަރުގެ ސަރުކާރުގެ ބަންދު ދުވަސްތަކަށް އިތުރުކުރި ދުވަސްތަކަކީ؛

• 25 ޖޫން (އާދިއްތަ)

• 26 ޖޫން (ހޯމަ)

• 28 ސެޕްޓެމްބަރު (ބުރާސްފަތި)

އަންނަ އަހަރުގެ ކަލަންޑަރުގައިވާ ގޮތުން ހައްޖު ދުވަސް ދިމާވަނީ ޖޫން 27 އަށެވެ. އެހެންކަމުން، ހައްޖު ދުވަހުގެ ކުރިއަށް އޮތް ދެ ދުވަސް ކަމަށްވާ ޖޫން 25 އާއި ޖޫން 26 އާއި ބޮޑު އީދު ދުވަސްތަކާ އެކު ހަފުތާއެއްގެ ޗުއްޓީ ލިބޭނެ އެވެ.

ބަންދު ދުވަހެއްގެ ގޮތުގައި ކަނޑައެޅި ސެޕްޓެމްބަރު 28 އަކީ ރަސޫލާގެ އީދުމީލާދެވެ.

މިހާރު ކޮންމެ އަހަރަކު ވެސް އާ އަހަރު ފެށުމުގެ ކުރިން ސަރުކާރުން ބަންދު ދުވަސް އިތުރުކޮށް، އެކަން ދުރާލައި އިއުލާންކުރެ އެވެ.