ހެއްކާ ބެހޭ ގާނޫނުން ޝަރުއީ ދާއިރާއަށް އިންގިލާބީ ބަދަލުތަކެއް އަންނާނެ: ޕީޖީ

ހެއްކާ ބެހޭ ގާނޫނުން ޝަރުއީ ދާއިރާއަށް އިންގިލާބީ ބަދަލުތަކެއް އަންނާނެ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް މިއަދު ވިދާޅުވެއްޖެ އެވެ.

އެ އޮފީހާ ގުޅޭ މައުލޫމާތާއި ތަފާސްހިސާބު ލިބޭ ތިން ޕޯޓަލްއެއް ލޯންޗުކުރަން ބޭއްވި ރަސްމިއްޔާތުގައި ޝަމީމް ވިދާޅުވީ މިދިޔަ ޖުލައި މަހު ރައީސް އިބްރާހިމް މުހައްމަދު ސޯލިހު ތަސްދީގުކުރައްވައި، އަންނަ މަހު އަމަލުކުރަން ފަށާ ހެއްކާ ބެހޭ ގާނޫނަށް އަހުލުވެރިވުމުގެ މަސައްކަތް ކުރަމުން އަންނަ ކަމަށެވެ.

އެ ބަދަލަކީ، ޝަމީމް ވިދާޅުވި ގޮތުގައި، ޝަރުއީ ދާއިރާއަށް އަންނާނެ ބޮޑު ބަދަލެކެވެ.

"އަންނަ މަހު އަމަލުކުރަން ފަށާ ހެއްކާ ބެހޭ ގާނޫނަކީ ޝަރުއީ ދާއިރާއަށް އިންގިލާބީ ބަދަލެއް ގެންނާނެ ގާނޫނެއް. އަޅުގަނޑުމެން މި ދަނީ އެ ގާނޫނީ ބަދަލަށް ތައްޔާރުވަމުން. މި ހަފުތާ ނިމެންވާއިރަށް 80 ޕަސެންޓް ޕްރޮސެކިއުޓަރުން ތަމްރީނެއް އޮންނާނީ ހަދާފައި. އަޅުގަނޑުމެން މި ދަނީ އެހެން އިދާރާތަކަށް ބޭނުންވާ އެހީތެރިކަން ފޯރުކޮށްދެމުން." މީރުމާ ހޯލްގައި ބޭއްވި ރަސްމިއްޔާތުގައި ޕީޖީ ވިދާޅުވި އެވެ.

ހެއްކާ ބެހޭ ބިލަކީ ޝަރުއީ ދާއިރާއަށް ބޮޑު ބަދަލެއް އަންނާނެ އިސްލާހެއް ކަމަށް ޕީޖީ ވިދާޅުވިއިރު، އެ ގާނޫނުގެ ބައެއް ކަންކަމާ ނޫސްވެރިން ވަނީ ކަންބޮޑުވުން ފާޅުކޮށްފަ އެވެ. އެހެންވެ، މަޖިލިސް ހުޅުވުމުން އެ ބައި އިސްލާހުކުރަން ހުށަހަޅަން ވަނީ ނިންމައިފަ އެވެ.

އޭނާ ވިދާޅުވީ ޝަރުއީ ދާއިރާ އަދި ހާއްސަކޮށް ޕްރޮސެކިއުޝަންގެ ދާއިރާއަކީ އެތައް ބައެއްގެ ދިރިއުޅުމާ ގުޅުން ހުރި ނިންމުންތައް ނިންމަންޖެހޭ ދާއިރާއެއް ކަމަށެވެ. އެކަން ކުރާނެ ގާނޫނާއި ގަވައިދުތައް އެބަހުރި ކަމަށާއި ނަމަވެސް އެކަމުގެ ހޭލުންތެރިކަން ހުރީ އެންމެ ހިތްހަމަޖެހޭ މިންވަރަކަށް ނޫން ކަމަށް ޝަމީމް ވިދާޅުވި އެވެ.

ޕީޖީ ވިދާޅުވީ މީހުން މަގާމުތަކަށް އައްޔަންކޮށް އެ މީހުން ޖަވާބުދާރީކުރުވާ ވާހަކަ ދައްކާ ކަމަށެވެ. ނަމަވެސް، ޖަވާބުދާރީ ކުރުވޭނީ އެ ކަން ކުރެވޭނެ ވަރަށް މައުލޫމާތު ލިބިގެން ކަމަށާއި މައުލޫމާތު ސިއްރުކުރުމުގެ ސަގާފާތެއްގެ ތެރެއިން ޒިންމާދާރު ސަގާފަތެއް ނުކުރެވޭނެ ކަމަށް އޭނާ ވިދާޅުވި އެވެ.

އެ ރަސްމިއްޔާތުގައި ލޯންޗުކުރީ "އުންސުރު"، "އާމަހި"، އަދި "ލެތުން" އެވެ.

އާމަހި ޕޯޓަލް އަކީ ޕީޖީ އޮފީހުން ނިންމާ ނިންމުންތައް ވަގުތުން ފެންނާނެ އަދި އެ އޮފީހުގެ ވަކީލުންގެ ޕާފޯމަންސް ފެންނާނެ އެއްޗެކެވެ. ޝަމީމް ވިދާޅުވީ އެ އޮފީހުގެ އަމާޒަކީ މައުލޫމާތު ހޯދަން ޕީޖީ އޮފީހަށް ދާން ނުޖެހޭ ގޮތް ހެދުމެވެ.

ލެތުން ޑޭޓާ ބޭހަކީ ޖިނާއީ އަދުލުގައި ހުރި ހުރިހާ ގާނޫނެއް އެއް ތާކުން ފެންނާނެ ޕްލެޓްފޯމެކެވެ. ޝަމީމް ވިދާޅުވީ ކޯޓުތަކުގެ ނިންމުންތަކާއި އެ އިދާރާއާ ގުޅޭ ގޮތުން ލިޔެފައިވާ ފޮތް އަދި އިނގިރޭސި ބަހުން ލިޔެފައިވާ ހުރިހާ ގާނޫނެއް ފެންނާނެ އެވެ. އަދި ސުޕްރީމް ކޯޓު އުފެދުނީއްސުރެ މިހާތަނަށް ނިންމާފައިވާ ޖިނާއީ މައްސަލަތައް ފެންނާނެ ކަމަށް އޭނާ ވިދާޅުވި އެވެ.

އުންސުރަކީ ޕީޖީ އޮފީހުގެ ހަބަރުތައް ގެންނަ ވެބްސައިޓެވެ.

އެ ރަސްމިއްޔާތުގެ ޝަރަފުވެރި މެހެމާން، ސުޕްރީމް ކޯޓުގެ ފަނޑިޔާރު އައިޝާ ޝުޖޫން މުހައްމަދު ވިދާޅުވީ ޖިނާއީ އަދުލަކީ އާއްމުންގެ ރައްކާތެރިކަމާއި މުޖުތަމައުގެ ސުލްހަމަސަލަސްކަން ގުޅިފައިވާ ނިޒާމެއް ކަމަށެވެ.

އެ ނިޒާމު އުފެދިގެން އަންނަ ގޮތް މީހުންނަށް އެނގުމަކީ މުހިއްމު ކަމެއް ކަމަށް ފަނޑިޔާރު ވިދާޅުވި އެވެ. އަދި މީހުންގެ މައްޗަށް ދައުވާ ކުރުމާއި ހުކުމް ކުރުމުގައި ރިއާޔަތްކުރާ ކަންކަން އިނގޭ ގޮތަށް ދިރާސާކޮށް، އާއްމުވުމަކީ ނިޒާމުގައި ހުރި ހުސްކަން، ހިދުމަތް ފޯރުކޮށްދޭ މީހުންނަށް ލުއި ފަސޭހައަކަށްވުމުގެ އިތުރުން އާއްމުންނަށް ނިޒާމުގައި ހުރި ރަނގަޅު ކަންކަން ފާހަގަކުރުމަށް ހުޅުވޭ މަގެއް ކަމަށް އޭނާ ވިދާޅުވި އެވެ.

ޝުޖޫން ވިދާޅުވި ގޮތުގައި ކުށުގެ ތުހުމަތު ކުރެވޭ މީހާ ހައްޔަރުކުރުމުން ނުވަތަ ދޫކޮށްލުމުން ނުވަތަ މީހެއްގެ މައްޗަށް މައްޗަށް ކުށް ސާބިތުނުވުމާއި ބޮޑެތި ކުށްތަކުގައި ލުއި އަދަބު ދިނުމުން ހިތްހަމަނުޖެހުން އޮންނަ ކަމަށެވެ.

ނަމަވެސް، އެކަން ހިނގަނީ ޖިނާއީ އަދުލު ރޭވިފައިވާ ގޮތާއި އެ ނިޒާމުގައި ދައުވާ ކުރުމާއި ކުށް ސާބިތުބުކުރުމަށް ގާނޫނުން ލާޒިމްކުރާ ކަންކަން އާއްމުންނަށް ނޭނގޭތީ ކަމަށް އޭނާ ވިދާޅުވި އެވެ.

މައްސަލަ ރިޕޯޓުކުރާ ހިސާބުން ތަހުގީގުކުރުމާއި ދައުވާކުރުމާއި މައްސަލަ ބެލުމުގައި އެކި ޓެކްނިކަލް ކަންކަން ހުންނަކަމަށާއި ހިދުމަތް ފޯރުކޮށްދޭ ފަރާތުން އުފުލަންޖެހޭ ޒިންމާ ކުޑައެއް ނޫން ކަމަށް ވެސް ވިދާޅުވި އެވެ. ފަނޑިޔާރު ވިދާޅުވީ އެ ޒިންމާ އުފުލުމުގައި ގާނޫނަށް ގެންނަ ބަދަލުތަކަށް އަހުލުވެރިވެ، ޒިންމާ އަދާކުރުމުގައި ފަރުވާތެރިވާންޖެހޭ ކަމަށެވެ.