ކުޑަކުދިންނަށް ދޭ ދެ ބޭހެއްގައި ނުރައްކާތެރި މާއްދާތަކެއް ހިމެނޭތީ ސަމާލުވާން އަންގައިފި

ކުޑަކުދިންނަށް ދޭ ދިޔާ ބޭސްތަކެއްގައި ނުރައްކާތެރި މާއްދާތަކެއް ހިމެނޭތީ އެކަމަށް ސަމާލުވާން ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އިލްތިމާސްކޮށްފި އެވެ.

އެމްއެފްޑީއޭއިން ނެރުނު އިއުލާނެއްގައިވާ ގޮތުން ތަޣައްޔަރުވެފައިވާ އަދި ސިއްހަތަށް ނުރައްކާތެރި މާއްދާތަކެއް ހިމެނޭތީ ޑަބްލިއުއެޗްއޯއިން ހެލްތު އެލާޓެއް ނެރެފައިވަނީ އިންޑިއާގެ ކުންފުންޏަކުން އުފައްދާ އެމްބޮރޮނޮލް ކަފް ސިރަޕާއި ޑޮކް-1 މެކްސް ކިޔާ ދިޔާ ބޭހަކަށެވެ.

އެމްއެފްޑީއޭ އިން ބުނީ އެއީ ރާއްޖެ އެތެރެކުރުމުގެ ހުއްދަ އޮންނަ ބޭސްތަކެއް ނޫން ކަމަށް ވިޔަސް، ބޭސް ސިޓީ ލިޔެދީގެން އެ ބޭސް އެތެރެވުމުގެ ފުރުސަތު އޮވެދާނެ ކަމަށެވެ. އެހެންވެ، އެކަމަށް ސަމާލުވާން އެދޭ ކަމަށް އެމްއެފްޑީއޭއިން ބުންޏެވެ.

ބޭސް ސިޓީއަށް ބޭސް އެތެރެކުރާއިރު، ރާއްޖޭގެ ޕޯޓްތަކުން ހާއްސަ ސަމާލުކަމެއް ދީގެން އިތުރަށް ބަލަމުންދާނެ ކަމަށް ވެސް އެމްއެފްޑީއޭއިން ބުންޏެވެ.

އެ ދެ ބޭހާ ގުޅިގެން ޑަބްލިއުއެޗްއޯއިން އެލާޓް ނެރުނީ އެ ދެ ބޭސް ބޭނުންކުރި އުޒްބެކިސްތާނުގެ ކުޑަކުދިންތަކެއް މަރުވުމުންނެވެ. އެކަމަކު އެލާޓް ނެރުނީ އެ ދެ ބޭހުގައި ވެސް ވަކި މުއްދަތެއްގައި ތައްޔާރުކުރި ބެޗްތަކަކަށް އެކަންޏެވެ.