މުންޑޫގެ ވޯޓު ފޮއްޓަށް މާ ކުރިން ވޯޓު އެޅި ކަމުގެ ތުހުމަތުކޮށްފި

އެމްޑީޕީން މިއަދު ބާއްވާ ރިޔާސީ ޕްރައިމަރީގައި ލ. މުންޑޫގައި ވޯޓު ލާން ފަށާ ގަޑީގެ ކުރިން ފޮއްޓަށް ވޯޓު އެޅި ކަމަށް، ޕްރައިމަރީގައި ވާދަކުރައްވާ ކުރީގެ ރައީސް މުހަންމަދު ނަޝީދުގެ ކެމްޕޭން ޓީމުން ތުހުމަތުކޮށްފި އެވެ.

މިހާރު ކުރިއަށްދާ ވޯޓު ލުން ފަށާފައި ވަނީ ހެނދުނު ނުވައެއްޖެހިއިރު އެވެ. ވޯޓު ފޮށިތައް ބަންދުކުރާނީ ހަވީރު ފަހެއް ޖަހާއިރު އެވެ.

އެ މައްސަލަ ފެންމަތިކުރައްވައި، ނަޝީދުގެ އިންތިހާބީ އެޖެންޓް ހަސަން ލަތީފު ކުރެއްވި ޓްވީޓެއްގައި ވިދާޅުވީ މުންޑޫގައި ހެނދުނު ނުވައެއް ޖެހުމުގެ ކުރިން ނަޝީދުގެ މަންދޫބުން ނެތި ވޯޓު ލުން ފަށާފައިވާ ކަމަށެވެ.

ވޯޓުލުން ފަށަން އޮތީ ނުވައެއް ޖަހާއިރު ނަމަވެސް 8:35 ގައި އެ ފޮއްޓަށް ވޯޓު އަޅާފައިވާ ކަމަށް އޭނާ ތުހުމަތު ކުރެއްވި އެވެ. އަދި ވޯޓު ލައިފައިވާ މީހުންގެ ލިސްޓެއް ވެސް އޭނާ އާންމުކުރެއްވި އެވެ.

ކޮންމެ ވޯޓު ފޮއްޓެއްގައި ވެސް ދެ ކެންޑިޑޭޓުންގެ މަންދޫބުންނާއި އޮފިޝަލުންނަށް ތިބެވެ އެވެ. އޮފިޝަލުން ނެތަސް ކަނޑައަޅާފައިވާ ގަޑިއަށް މީގެ ކުރިން ވެސް އެހެން އިންތިހާބުތަކުގައި ވޯޓު ލުން ފަށާފައިވެ އެވެ.

އެމްޑީޕީގެ ކެމްޕެއިން ކުރިއަށް ދިޔައިރު ނަޝީދާއި، އިންތިހާބުގައި ވާދަކުރައްވާ އަނެއް ކެންޑިޑޭޓް ރައީސް އިބްރާހިމް މުހަންމަދު ސޯލިހުގެ ފެކްޝަނުން ވަނީ ޕްރައިމަރީ ގަޑުބަޑުކޮށް ވޯޓު އޮޅުވާލަން އުޅޭ ކަމަށް ތުހުމަތުކޮށްފަ އެވެ.

ވޯޓު ލުން ނިންމައި މިރޭ 10 ޖަހާއިރު ވަގުތީ ނަތީޖާ އިއުލާން ކުރާނެ ކަމަށް އެމްޑީޕީން ބުންޏެވެ. މި އިންތިހާބުގައި ޖުމްލަ 57،255 މީހުންނަށް ވޯޓު ލެވެ އެވެ.