މާލެ-ވިލިމާލެ އިން ކުނި ނެގުން ހަރުދަނާ ކުރަން ހާއްސަ އޮފީހެއް

މާލެ އާއި ވިލިމާލޭގެ އާންމު ސަރަހައްދުތަކުން ކުނި ނެގުމުގެ މަސައްކަތް ހަރުދަނާ ކުރުމަށްޓަކައި މާލެ ސިޓީ ކައުންސިލްގެ ވޭސްޓް މެނޭޖްމެންޓް އޮފީހެއް މިއަދު ހުޅުވައިފި އެވެ.

ކައުންސިލުން ބުނީ، އެ އޮފީސް ހެދީ މާލެތެރޭގެ ކުނިކަހައި، ކުނި ނަގައި ސާފުކުރުމުގެ މަސައްކަތާ އެ ކައުންސިލުން ހަވާލުވިއިރު، އެ މަސައްކަތާ ގުޅޭ އިދާރީ ކަންކަމަށް ޖާގަ ނެތުމުން އެ ޖާގަ ހަމަޖެއްސުމަށް ކަމަށެވެ.

އެ އޮފީސް ހުޅުވުމަށް ބޭއްވި ރަސްމިއްޔާތުގައި މޭޔަރު ޑރ. މުހައްމަދު މުއިއްޒު ވިދާޅުވީ، އެއީ ކައުންސިލަރުންގެ ބެލުމުގެ ދަށުން މާލެތެރެ ސާފުތާހިރުކޮށް، ބެލެހެއްޓުމުގެ މަސައްކަތް ހަރުދަނާ ގޮތެއްގައި ގެންދިއުމަށް އެޅި ވަރަށްބޮޑު ފިޔަވަޅެއް ކަމަށެވެ.

އޭނާ ވިދާޅުވިގޮތުގައި، އެ ތަނުގައި މިހާރު މަސައްކަތްކުރާ އިދާރީ، މެނޭޖީރިއަލް ލެވެލްގެ ހުރިހާ މުވައްޒަފުންނަށް ރަނގަޅަށް މަސައްކަތް ކުރެވޭ ވަރުގެ ޖާގަ ލިބޭނެ އެވެ.

މޭޔަރު ވިދާޅުވީ، ވޭސްޓް މެނޭޖްމެންޓް އޮފީހާއެކު، މާލެތެރެ ރީތިކޮށް، ސާފުކޮށް ބޭއްވުމުގެ މަސައްކަތް އިތުރަށް ހަރުދަނާ ކުރެވޭނެ ކަމަށެވެ. ކުރިއަށް އޮތް ދެތިން ހަފުތާގައި އިތުރު ފިޔަވަޅުތައް އަޅައި، މާލެތެރެ ސާފުކުރުން ހަރުދަނާ ކުރާނެ ކަމަށް ވެސް ވިދާޅުވި އެވެ.

މުއިއްޒު ވިދާޅުވިގޮތުގައި ވޭސްޓް މެނޭޖަމަންޓް ސެކްޝަންގައި މަސައްކަތް ކުރާނީ 225 މުވައްޒަފުންނެވެ. އެ އެންމެންނަކީ އިދާރީ، އޮޕަރޭޝަނަލް އަދި މެނޭޖީރިއަލްގެ ހުރިހާ ކަމެއް ކުރާނެ ބައެއް ކަމަށް ވިދާޅުވި އެވެ.

"އޮފީހުގެ މަސައްކަތް ކޮށްފައި ވާނީ ވަރަށް ބޮޑަށް ހަރަދު ކުޑަކުރަން. އެގޮތުން ކޮންޓްރެކްޓަރެއް ނުހޯދައި އަމަލީ މަސައްކަތް ކުރީ ކައުންސިލްގެ މުވައްޒަފުން. މޭޒު ފަދަ ފަރުނީޗަރު ވެސް ފިލާ ގަނެގެން އަމިއްލަ އަށް ހެދީ. ހިޔާ ކުރީ، ކުރިން ބޭނުން ކޮށްފައި ހުރި ބާ ދަގަނޑު ހޮޅި އާއި ޓިނުން،" މުއިއްޒު ވިދާޅުވި އެވެ.

އޭނާ ވިދާޅުވީ، ހަމައެކަނި ހަރަދު ހިނގީ ތަކެތި ގަންނަން ކަމަށާއި އެ ކަމަށް ކަނޑައެޅީ ގިނަ ވެގެން ތިން ލައްކަ ރުފިޔާގެ ބަޖެޓެއް ކަމަށެވެ.

"...އެ ސެކްޝަންގައި މަސައްކަތް ކުރާ އިދާރީ ސްޓާފުންނާއި މެނޭޖަރުން މަސައްކަތް ކުރާނެ އެއްވެސް ޖާގައެއް ނެތި މިދިޔަ ދޮޅުމަސް ދިޔައީ. އެހެންވެ، ކައުންސިލުން ފާސްކޮށްގެން މި ގޮތަށް އަސާސީ ލެވެވެލެެއްގެ އޮފީހަކަށް ޖާގަ އިތުރު ކުރީ،" މޭޔަރު ވިދާޅުވި އެވެ.

މާލޭގެ މަގުތަކާއި ޕާކްތަކާއި މައިޒާންތަކުގެ ކުނި ނަގައި ސާފުކުރަން ވެމްކޯއާ އެކު ހެދި އެއްބަސްވުން އާ ނުކުރަން ސިޓީ ކައުންސިލުން ނިންމައި، އަދި އެއްބަސްވުމުގެ މުއްދަތު މިދިޔަ އަހަރުގެ ޑިސެމްބަރު 26 ގައި ހަމަވެފައިވާތީ މަގުތަކުން ކުނި ނެގުން ވެމްކޯ އިން ވަނީ ހުއްޓާލައިފަ އެވެ. ސިޓީ ކައުންސިލުން އެ އެއްބަސްވުން އާ ނުކުރީ، ވެމްކޯ އިން އެ ކަން ރަނގަޅަށް ނުކުރާތީ ކަމަށް ބުނެ އެވެ.

ކައުންސިލުން ކުނި ނަގަން ފެށި ނަމަވެސް މާލެ މަގުމަތީގައި އެކި ފަރާތްތަކުން ކުނި ބަހައްޓާ މައްސަލަ ވަނީ ބޮޑުވެފަ އެވެ. އެ މައްސަލައިގައި ކައުންސިލުން ވަނީ އާންމުކޮށް ކުނި ބަހައްޓާ ތަންތަން ފާހަގަކޮށް، އެ މީހުންނަށް ފިޔަވަޅު އަޅަން ފަށައިފަ އެވެ.