ސްމާޓް ޕާކިންއާ އެކު ހުޅުމާލެއަށް ޒަމާނީ ހައްލެއް ހޯދައިދެނީ

ޕާކިންގެ މައްސަލަ އިންތިހާއަށް ބޮޑުވެފައިވާ ހުޅުމާލޭގައި ސްމާޓް ޕާކިން ތައާރަފްކޮށް، އެ ހިދުމަތް ލުއި ފަސޭހަ ގޮތެއްގައި ހޯދޭނެ އިންތިޒާމު ހަމަޖެއްސުމަށް އެޕްލިކޭޝަނެއް ހެދުމުގެ މަސައްކަތްކުރަމުން އަންނަ ކަމަށް އެޗްޑީސީން ބުނެފި އެވެ.

އާބާދީ އިތުރުވެ ޕާކިންގެ އުނދަގޫ ބޮޑުވެފައިވާތީ އެޗްޑީސީން އަންނަނީ އެ މައްސަލައަށް ހައްލެއް ހޯދުމަށް އެކި މަސައްކަތްތައް ކުރަމުންނެވެ. މިފަހުން ވެސް ވަނީ ކާރާއި ބަރު އުޅަނދު ފަހަރަށް ހާއްސަކޮށްގެން ޕާކުކުރާނެ ޖާގަތަކެއް ހުޅުމާލޭގެ އެކި ސަރަހައްދުތަކުން ދޫކޮށްފަ އެވެ.

ޕާކިންގެ މައްސަލައަށް "ސްމާޓް ސޮލިއުޝަނެއް" ހޯދައިދިނުމުގެ ގޮތުން އެޗްޑީސީން މިވަގުތު އަންނަނީ ޕައިލެޓް ޕްރޮޖެކްޓެއްގެ ގޮތަށް ސްމާޓް ޕާކިން ސޮލިއުޝަން ޓެސްޓްކުރުމުގެ މަސައްކަތްކުރަމުންނެވެ. ރާއްޖޭގައި މުޅިން އަލަށް ޓެސްޓް ކުރަން ތައްޔާރުވަމުން އަންނަ ފުރަތަމަ ސްމާޓް ޕާކިން ޒޯނު ތަރައްގީކުރަމުން އަންނަނީ ހުޅުމާލޭގެ ފެރީ ޓާމިނަލް ސަރަހައްދުގައިވާ ފިތުރޯނު ޕާކިން ޒޯނުގަ އެވެ.

އެޗްޑީސީން ބުނީ ސްމާޓް ޕާކިންގައި ޕާކިން ޖާގަ ރިޒާވްކޮށްގެން ޕާކުކުރަން އަންނަ ކާރުތަކުގެ ނަމްބަރު ޕްލޭޓްތައް ކެމެރާއެއް މެދުވެރިކޮށް ރީޑްކޮށް، އޮޓޯ ބޫމް ގޭޓެއް ސްމާޓް ޕާކިން ޒޯނުގައި ހަރުކޮށްފައިވާނެ ކަމަށެވެ. އެތަނުގައި ޕާކުކުރާ އުޅަނދުތަކުގެ ރައްކާތެރިކަން ކަށަވަރުކުރުމަށް ކެމެރާ ވެސް ހަރުކޮށްފައިވާނެ ކަމަށް އެ ކުންފުނިން ބުންޏެވެ.

ޕާކިން ޒޯނު ތެރޭގައިވާ ޕާކިން ޖާގަތައް ފެންނަ ގޮތަށް ޑިޖިޓަލް ބޯޑެއް ވެސް ބޭރުގައި ހަރުކޮށްފައިވެ އެވެ.

މިވަގުތު ހަމައެކަނި ކާރު ޕާކިންނަށް ކަނޑައަޅާފައިވާ މި ސްމާޓް ޕާކިން ޒޯނުގައި ކުރު މުއްދަތަށާއި ދިގު މުއްދަތަށް ޕާކުކުރުމުގެ ފުރުސަތު އޮންނާނެ އެވެ. ހާއްސަ އެހީއަށް ބޭނުންވާ ފަރާތްތަކަށް ވެސް އެތަނުގައި ޖާގަތަކެއް ހާއްސަކޮށްފައި ހުންނާނެ އެވެ.

ޕާކިން މައްސަލައަށް މުޅިން ތަފާތު ހައްލެއް ހޯދައިދިނުމަށް އެޗްޑީސީން މަސައްކަތްކުރަމުން އަންނައިރު އެކަން ލުއި ގޮތެއްގައި ކުރެވޭނެ އިންތިޒާމު ހަމަޖެއްސުމަށް ޕާކިން އެޕްލިކޭޝަނެއް ވެސް ތައާރަފްކުރާނެ އެވެ.

މިއީ އެންޑްރޮއިޑް އަދި އައިއޯއެސް ޑިވައިސްތަކުގައި ވެސް ބޭނުންކުރެވޭ ގޮތަށް ހަދާ އެޕްލިކޭޝަނެކެވެ. އެ އެޕް މެދުވެރިކޮށް ޕާކިން ޒޯނުގައި ހުންނަ ހުސް ޖާގަތަކާއި ޕާކު ކުރެވޭނެ އަގުތަކުގެ އިތުރުން ޖާގަ ރިޒާވްކޮށް، ފައިސާ ވެސް ދެއްކޭނެ އެވެ. އަދި ޕާކިން ޖާގަ ހުސްވުމުން ނޮޓިފިކޭޝަންތަކާއި ޕާކިން ޖާގައާ ހަމައަށް ނެވިގޭޓްކޮށްދިނުމާއި ބޭނުންކުރާ ފަރާތުގެ ޕްރޮފައިލް ވެސް އެޕުން ފެންނާނެ އެވެ.