ގްލޯބަލް ޝެފްސް ޗެލެންޖުގެ ސެމީ ފައިނަލުގެ ޖަޖަކަށް ދިވެހި ޝެފް މާހާ

މިދިޔަ އަހަރު މާސްޓާ ޗެފުގެ ލަގަބު ލިބުނު ދިވެހި ޝެފް މާހާ ނަސީރު ގްލޯބަލް ޝެފްސް ޗެލެންޖުގެ ސެމީ ފައިނަލުގައި ފަނޑިޔާރުކަން ކޮށްފި އެވެ.

އެ މުބާރާތުގައި މާހާ ފަނޑިޔާރުކަން ކުރީ ޔޫރަޕުގެ އެންމެ މަތީ ފަންތީގެ ޝެފުންނާ އެކު އެވެ. މާހާ ފަނޑިޔާރުކަން ކުރި މުބާރާތަކީ ޔޫރަޕުގެ 40 ޓީމެއްގެ ޝެފުން ވާދަ ކުރި މުބާރާތެކެވެ. އެ މުބާރަތް އޮތީ އިޓަލީގެ ރިމިނި ސިޓީގަ އެވެ.

މާހާ ފަނޑިޔާރުކަން ކުރި ސެމީ ފައިނަލް މި މަހުގެ 19 އިން 22 އަށް ކުރިއަށް ދިޔަ އެވެ.

އެ މުބާރާތުގެ ސެމީ ފައިނަލުގައި ވާދަކުރި ޝެފުންގެ ޓީމުތައް އަންނަ އަހަރުގެ އޮކްޓޯބަރުގައި ސިންގަޕޫރުގައި އޮންނަ ގްލޯބަލް ޝެފް ޗެލެންޖް ފައިނަލުގައި 4 ކެޓަގަރީއަކުން ވާދަ ކުރާނެއެވެ. އެ ކެޓަގަރީތަކަކީ ކެޓަގަރީތަކަކީ ދަ ގްލޯބަލް ޝެފްސް ޗެލެންޖް، ގްލޯބަލް ޕޭސްޓްރީ ޝެފްސް ޗެލެންޖް، ގްލޯބަލް ވީގަން ޝެފްސް ޗެލެންޖް، އަދި ގްލޯބަލް ޔަންގް ޝެފްސް ޗެލެންޖެވެ.

މާހާ އަކީ މާސްޓާ ޝެފް ސޮސައިޓީ އޮފް ދަ ވޯލްޑުން ދޭ މާސްޓާ ޝެފްގެ ލަގަބު ލިބުނު ފުރަތަމަ ދިވެހި ޝެފެވެ. އޭނާ ވަނީ ސިންގަޕޫރުގެ ކްރިއޭޓިވް ކަލިނަރީން ކަލިނަރީ އާޓްސް އެންޑް ކުޒީން އިން ޑިގްރީ ހާސިލް ކޮށްފަ އެވެ.

މާހާ އަކީ ޝެފްސް ގިލްޑް އޮފް މޯލްޑިވްސްގެ ސެކްރެޓަރީ ޖެނެރަލް އެވެ. އަދި އޭނާ އަކީ ވޯލްޑް ޝެފްސް އެޕްރޫވްޑް ޕޭސްޓްރީ ރޫކީ ޖަޖެކެވެ.