ކެއާ ސޮސައިޓީގެ ހިދުމަތްތައް ފުޅާކުރަނީ

ނުކުޅެދުންތެރިކަން ހުންނަ ކުދިންނަކީ މުޖުތަމައުގައި އެހެން މީހުންނެކޭ އެއްފަދައިން ކަންކަމުގައި ބައިވެރިވެ އުޅޭ މުހިންމު ބައެއްގެ ގޮތުގައި ހެދުމަށް މަސައްކަތްކުރާ ކެއާ ސޮސައިޓީގެ ހިދުމަތްތައް އިތުރަށް ފުޅާކުރުމަށް މަސައްކަތް ކުރަމުން އަންނަ ކަމަށް އެ ޖަމިއްޔާގެ ބޯޑުގެ ރައީސް އިސްމާއިލް އަދުހަމް ވިދާޅުވެއްޖެ އެވެ.

ކެއާ ސޮސައިޓީގެ ހުސްވެފައިވާ މަގާމްތަކަށް މެންބަރުން ހޮވުމާއި އަސާސީ ގަވައިދަށް ބަދަލުތައް ގެނައި، 24 ވަނަ އަހަރީ އާންމު ޖަލްސާ އަދުހަމް އިއްޔެ ވިދާޅުވީ މި އަހަރު ހުޅުމާލެ ދެވަނަ ފިޔަވަހީގައި ކެއާ ސޮސައިޓީގެ ހިދުމަތް ފަށަން މަސައްކަތް ކުރަމުން އަންނަ ކަމަށެވެ. އެޗްޑީސީއާ އެކު މިހާރު ކޮށްފައިވާ މަޝްވަރާތަކުން، ހިދުމަތް ދޭނެ ތަނެއް ހަމަޖެހި، މި އަހަރު އޮގަސްޓު މަހު އެތަން ހުޅުވޭނެ ކަމަށް އުންމީދު ކުރެވޭ ކަމަށް އޭނާ ވިދާޅުވި އެވެ.

ކެއާ ސޮސައިޓީގެ ހިދުމަތްތައް އިތުރަށް ފުޅާ ކުރުމަށް ހދ. ކުޅުދުއްފުށީގައި ވެސް އެ ޖަމިއްޔާގެ ހިދުމަތް ދިނުމަށް މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

އަދުހަމް ވިދާޅުވީ އެ ހުރިހާ ހިދުމަތެއް އެއްފުރާޅެއްގެ ދަށުން ދިނުމަށް ހިންގާ ޑްރީމް ޕްރޮޖެކްޓްގެ މަސައްކަތްތަކެއް ވެސް ކުރަމުން އަންނަ ކަމަށެވެ.

އަދުހަމް ވިދާޅުވީ ޖަމިއްޔާގެ މަސައްކަތްތައް ތިން ދާއިރާއަކަށް ބަހާލާފައިވާ ކަމަށެވެ. އެއީ ޅަފަތުގައި އާލީ އައިޑެންޓިފިކޭޝަނާއި އިންޓަވެންޝަން ފޯރުކޮށްދިނުމާއި ސްކޫލް ނިންމާ ކުދިންނަށް އާމްދަނީ ހޯދަން ނުވަތަ ވަޒީފާއަށް ނެރުމަށް ޕްރޮގްރާމް ހިންގުން ކަމަށް އަދުހަމް ވިދާޅުވި އެވެ. އަދި ތެރަޕީ އާއި ރީހެބިލިޓޭޝަން ޕްރޮގްރާމްތައް ވެސް ހިންގަމުން އަންނަ ކަމަށް އޭނާ ވިދާޅުވި އެވެ.

އާންމު ޖަލްސާގައި ކެއާ ސޮސައިޓީން ވަނީ އެ ޖަމިއްޔާ އަށް އެހީތެރިވެދިން ފަރާތްތަކުގެ އަގު ވަޒަންކޮށް ހަނދާނީ ސެޓްފިކެޓް ދީފަ އެވެ.