އަމީނީމަގު ސްޓެލްކޯ ކައިރިން ހުޅަނގަށް ދުއްވޭގޮތަށް ގާއަތުރައި ހުޅުވާލަނީ

ތާރު އަޅައި އަމީނީ މަގު މިހާރު ހުޅުވާލާފައި އޮތް ހިސާބުގައި ސްޓެލްކޯގެ އިމާރާތާ ޖެހިގެން ހުޅަނގަށް އޮންނަ މަގަށް ވެހިކަލަށް ވަދެވޭ ގޮތް ހެދުމަށްޓަކައި، ހަތަރު އަނގޮޅި ކަންމަތީގައި ވަގުތީ ގޮތުން މިއަދު ގާ އަތުރަން ފަށައިފި އެވެ.

އާރުޑީސީގެ އޮފިޝަލަކު "މިހާރު" އަށް ވިދާޅުވީ އަމީނީ މަގާއި ދޮންއަނދަރާދަ ހިނގުން ގުޅޭ ކަންމަތިން މިހާރު ވެހިކަލަށް ދަތުރު ނުކުރެވޭތީ، އެ ސަރަހައްދުގެ ޓްރެފިކަށް ވަރަށް ބާރުބޮޑުވެ ދަތިތަކާ ކުރިމަތިވާ ކަމަށެވެ. އެހެންވެ، އެކަމަށް ވަގުތީ ހައްލެއް ގެނެސްދިނުމުގެ ގޮތުން އެ ދެ މަގު ގުޅޭ ކަންމަތީގައި މިހާރު ގާ ޖަހަމުން އަންނަ ކަމަށެވެ.

"ތާރު އަޅަންވީމަ އެ ގާތަށް އެތަނުން ނަގާނެ،" އޭނާ ވިދާޅުވި އެވެ.

އަމީނީ މަގުގެ އެންމެ އިރުން ފަށައިގެން ސްޓެލްކޯ އިމާރާތާ ހިސާބަށް ތާރު އަޅައި އެ ސަރަހައްދު މިހާރު އޮތީ އާންމުންނަށް ހުޅުވާލައިފަ އެވެ.

އަމީނީ މަގު ހެދުމަށް އާރުޑީސީން މިހާރު އޮތީ ފުރުގާން މިސްކިތާ ހަމަށް އެ މަގު ބަންދުކޮށްފަ އެވެ.

ދައުލަތުގެ ބަޖެޓުން 84 މިލިއަން ރުފިޔާ ހަރަދުކޮށްގެން ހަދަމުން އަންނަ އަމީނީ މަގުގެ މަސައްކަތް އެއްކޮށް ނިންމާލެވޭނީ އަންނަ ސެޕްޓެމްބަރުގެ ނިޔަލަށް ކަމަށް ޕްލޭނިން މިނިސްޓްރީން ބުނެފައިވެ އެވެ.

އާރުޑީސީން ހަދަމުން އަންނަ އެ މަގުގައި ތާރު އެޅީ އެމްޓީސީސީއާ ހަވާލުކޮށްގެންނެވެ. އެމްޓީސީސީއާ އެ މަސައްކަތް ހަވާލުކުރީ އާރުޑީސީގެ ތާރު މެޝިން މާލޭގައި ބަހައްޓާނެ ބިމެއް ނުލިބިގެން، މަސައްކަތް އަވަސްކުރުމުގެ ގޮތުން ކަމަށް އެ ކުންފުނިން ކުރިން ބުނެފައިވެ އެވެ. އެ މަގުގެ މަސައްކަތް މާ ބޮޑަށް ލަސްވާތީ އާންމުންގެ ފާޑުކިޔުން އާރުޑީސީއަށް ވަރަށް ބޮޑަށް އަމާޒުވެ އެވެ.