ތުރުކީގެ ބިންހެލުން އައި ސަރަހައްދަށް ބޯކޮށް ވާރޭވެހި، ފެންބޮޑުވެ 14 މީހުން މަރުވެއްޖެ

ޝަންލެފާ، ތުރުކީ (މާޗް 14) - ތުރުކީ އަށް މިދިޔަ މަހު ބާރުގަދަ ބިންހެލުން އައި ސަރަހަދަށް ބޯކޮށް ވާރޭ ވެހި، ފެންބޮޑުވެގެން 14 މީހަކު މަރުވެއްޖެ އެވެ.

އިތުރު ފަސް މީހަކު ގެއްލިފައިވާ ކަމަށް ރިޕޯޓްކޮށްފައި ވެ އެވެ. މިދިޔަ މަހުގެ 6 ގައި ތުރުކީ އާއި ސީރިއާ ބޯޑަރު ސަރަހައްދަށް އައި ބިންހެލުމުގައި އެންމެ ބޮޑެތި ގެއްލުންތަކެއް ލިބުނީ ވެސް ތުރުކީ އަށެވެ.

ބޯކޮށް ވާރޭ ވެހި، ފެންބޮޑުވެގެން އެންމެ ބޮޑު އަސަރެއް ކުރީ ބިންހެލުމުގައި ވެސް ގެއްލުންވި ޝަންލެފާ އަށެވެ. ފެންބޮޑުވުމުގައި އެ ސިޓީން 12 މީހުން މަރުވި އެވެ. ބިންހެލުމުގައި ހާލުގައި ޖެހުނު މީހުންނަށް ހަދައިފައިވާ ކޮންޓެއިނާ ގެތަކަށް ވެސް އަސަރު ކުރި އެވެ.

އެ ސިޓީއާ އިންވެގެން އޮތް އަދިޔާމަން އިން ދެ މީހުން މަރުވި އެވެ. އޭގެ ތެރޭގައި އުމުރުން އެއް އަހަރުގެ ކުޑަކުއްޖަކު ވެސް ހިމެނެ އެވެ. އަދިޔާމަންގައި ފެންގަނޑު ރަށުތެރެއަށް ފެތުރި، ކޮންޓެއިނަރު ގެތައް ހިމެނޭ ސަރަހައްދަށް ކުރި އަސަރުގައި ކޮންޓެއިނާ ގެތަކެއް ވެސް ދޫވެގެން ދިޔަ އެވެ. މަރުވި އަނެއް މީހާކީ ބިން ހެލުމުގައި ހާލުގައި ޖެހިގެން ކޮންޓެއިނަރު ގޭގައި އުޅުނު އަންހެންނެކެވެ.

އެ ސިޓީގެ ގަވަރުނަރު ނޫމާން ހަޓިޕޮލޫ ވިދާޅުވީ ހަތަރު މީހުން ގެއްލުނު ކަމަށެވެ.

ޝަންލެފާގެ ގަވަރުނަރު ސޯލިހް އައިހާން ވިދާޅުވީ މީހުން ހޯދުމުގެ މަސައްކަތް ކުރަމުން ދަނިކޮށް ރެފިއުޖީންގެ ގޮތުގައި ދިރިއުޅޭ ސީރިއާގެ ފަސް މީހުން އިމާރާތެއްގެ އަޑީގައި ކާރު ޕާކު ކުރާ ތަނުގައި މަރުވެފައި ތިއްބާ ފެނުނު ކަމަށެވެ. އިމާރާތްތަކުގެ އަންޑަގްރައުންޑްތަކުގައި ވެސް ވަނީ ފެންބޮޑުވެފަ އެވެ.

އެ ސިޓީން ގެއްލުނު މީހުންގެ ތެރޭގައި ދެ ފަޔާފައިޓަރުން ވެސް ހިމެނެ އެވެ.

މިދިޔަ މަހުގެ ބިންހެލުމުގައި ހާލުގައި ޖެހުނު މީހުންނަށް ދާއިމީ ބޯހިޔާވަހިކަން ގާއިމު ކުރުމުގެ މަސައްކަތް ތުރުކީގެ ސަރުކާރުން ވަނީ ވަށައިފަ އެވެ. ބިންހެލުމުގައި ސީރިއާ އާއި ތުރުކީން 48،000 އަށް ވުރެ ގިނަ މީހުން މަރުވި އެވެ.