ނައިފަރުގެ މިސްކިތެއްގައި ދެ ކުދިން އިމާމުވެ ތަރާވީސް ނަމާދުކުރަނީ

ޅ. ނައިފަރުގެ މިސްކިތެއްގައި ދެ ކުދިން އިމާމުވެ، ތަރާވީސް ނަމާދު ކުރަން ފަށައިފި އެވެ.

ނައިފަރު ކައުންސިލުން އިއްޔެ ބުނީ މި ރޯދަ މަހު އެ ރަށު މަސްޖިދުއްތަގުވާގައި ހިފްޒުކޮށް، ތަރާވީސް ނަމާދު ކުރާނީ ގްރޭޑް 8 ގައި ކިޔަވަމުން އަންނަ ދެ ދަރިވަރުން ކަމަށްވާ، އަބްދުﷲ ހަޔާން ހަމީޒް އާއި އާސިރު އާރިފް ޔޫނުސް ކަމަށެވެ.

އެ ދެ ކުދިން ވަނީ މިދިޔަ އަހަރު ނައިފަރުގެ މިސްކިތްތަކުގައި އިމާމުވެ، ދަމުނަމާދު ވެސް ކޮށްދީފަ އެވެ. މިއީ ނައިފަރުގައި އަމިއްލަ ފަރާތަކުން ހިންގަމުން އަންނަ ހިފްޒު ކުލާހެއްގައި ކިޔަވަމުން އަންނަ ކުދިންނެވެ.

ކައުންސިލުން ކުރިން ބުނި ގޮތުގައި، އެ ކުދިންނަށް މި ފުރުސަތު ދިނީ ރަށުގެ ކުޑަކުދިންގެ ހިތުގައި ދީނީ ކަންކަމަށް ލޯބި ޖެއްސުމުގެ ނިޔަތުގަ އެވެ.

ކުދިންނަށް މި ފުރުސަތު ދިނީ ރަށުގައި ތިބި ޝައިހުންނާ މަޝްވަރާކުރައްވައި، އެ ކުދިންގެ ކިބައިގައި އިމާމުވެ ނަމާދުކުރުމުގެ ގާބިލުކަން ހުރިތޯ ޔަގީންކޮށްފަ އެވެ. އަދި އެކަމުގައި މިސްކިތްތަކުގެ އިމާމުންގެ ބޮޑު އެއްބާރުލުމެއް ލިބޭ އެވެ. އެ ކުދިން އިމާމުވެ، ގުރުއާން ކިޔަވަމުން އަންނަ ވަގުތުގައި އެ އިމާމުންގެ އެހީތެރިކަން ވެސް ލިބޭނެ އެވެ.