ޕުޓިންގެ ނިއުކްލިއާ ވާހަކަތައް ނޭޓޯއިން ކުށްވެރިކޮށްފި

ރަޝިޔާގެ ނިއުކްލިއާ ހަތިޔާރުތައް، އަވައްޓެރި ބެލަރޫސްގައި ގާއިމުކުރުމަށް ނިންމާފައިވާ ކަމަށް، ރަޝިޔާގެ ރައީސް ލަޑިމިއާ ޕުޓިން މިދިޔަ ހޮނިހިރު ދުވަހު ވިދާޅުވުމާ ގުޅިގެން، ނޭޓޯ އިން އިއްޔެ އެ ވާހަކަތަކަށް ވަރަށް ބޮޑަށް ފާޑުކިޔައި އެކަން ކުށްވެރިކޮށްފި އެވެ.

ރައީސް ޕުޓިން ވިދާޅުވި ގޮތުގައި އެ ގައުމުގެ ނިއުކްލިއާ ހަތިޔާރުތައް ބެލަރޫސްގައި ބެހެއްޓުމަކީ، އެމެރިކާގެ ނިއުކްލިއާ ހަތިޔާރުތައް އެ ގައުމުގެ ރަހްމަތްތެރި ގައުމުތަކުގައި ބަހައްޓާފައި ހުރުމާ އެއްފަދަ ކަމެކެވެ. އަދި އެފަދަ ހަތިޔާރުތައް ބެލަރޫސްގައި ބަހައްޓާނީ، "އަހަރެމެން ބައިވެރިވެފައިވާ، ނިއުކްލިއާ ހަތިޔާރު ފެތުރުން މަނާކުރާ މުއާހަދާގެ ދަށުން އަހަރެމެންގެ މައްޗަށް ލާޒިމުކުރާ ކަންކަމާ ޚިލާފު ނުވާނެ ގޮތަށް" ކަމަށް ވެސް ޕުޓިން ވިދާޅުވި އެވެ.

އެމެރިކާއާ އެކުގައި ގާތް އަސްކަރީ ގުޅުމެއް ގާއިމުކޮށްފައިވާ ގައުމުތައް ކަމަށްވާ، ބެލްޖިއަމް، ޖަރުމަނު ވިލާތް، އިޓަލީ ވިލާތް، ނެދަލޭންޑްސް އަދި ތުރުކީ ވިލާތުގައި ހުންނަ އެމެރިކާގެ އަސްކަރީ މަރުކަޒުތަކުގައި ވެސް، އެމެރިކާގެ ނިއުކްލިއާ ހަތިޔާރުތައް ގުދަންކޮށްފައި ހުރެ އެވެ.

ރަޝިޔާގެ ނިއުކްލިއާ ހަތިޔާރުތައް ބެލަރޫސްގައި ބަހައްޓަން ރަޝިޔާ އިން ނިންމި ނިންމުން، ޔޫކްރޭނުން ސިފަކުރީ ނިއުކްލިއާ ބްލެކްމެއިލް ކުރުމެއްގެ ގޮތުގަ އެވެ. އަދި އެ މައްސަލައިގައި އދ.ގެ ސަލާމަތީ މަޖިލީހުގެ ކުއްލި ބައްދަލުވުމެއް ބާއްވައިދިނުމަށް، ޔޫކްރޭނުން މިހާރު އަންނަނީ އެމެރިކާ އާއި ނޭޓޯގެ ގައުމުތަކުގައި އެދެމުންނެވެ.

މި މައްސަލައިގައި ނޭޓޯގެ ތަރުޖަމާނު އޯނާ ލުންގެސްކޫ ވިދާޅުވީ ބެލަރޫސްގައި ރަޝިޔާގެ ނިއުކްލިއާ ހަތިޔާރުތައް ގާއިމުކޮށްފައި ބަހައްޓަން ނިންމި ނިންމުމަކީ، ވަރަށް ނުރައްކާތެރި އަދި ޒިންމާދާރުކަން ވަރަށް ކުޑަ ނިންމުމެއް ކަމަށެވެ. އެހެން ނަމަވެސް، ނޭޓޯގެ އަސްކަރީ ސްޓްރެޓީޖީ އަށް ބަދަލެއް ގެންނަން ޖެހޭ ފަދަ އެއްވެސް ބަދަލެއް، ރަޝިޔާގެ ނިއުކްލިއާ ސްޓްރެޓީޖީގެ ތެރެއިން މިހާތަނަށް ނުފެންނަ ކަމަށް ވެސް އޭނާ ވިދާޅުވި އެވެ.

ރަޝިޔާގެ ނިއުކްލިއާ ހަތިޔާރުތައް ބެލަރޫސްގައި ބަހައްޓަން ނިންމެވިކަން ރައީސް ޕުޓިން އިއުލާން ކުރެއްވީ، އިނގިރޭސި ވިލާތުން ޔޫކްރޭނަށް މިފަހަރު ފޮނުވާ ޓޭންކުތަކާ އެކު، އެ ޓޭންކުތަކުގައި ބޭނުންކުރުމަށް އުފައްދާފައި ހުންނަ، ބާރު ދަށްކޮށްފައިވާ ޔޫރޭނިއަމް އަޅާފައި ހުންނަ އުންޑަތައް ވެސް ފޮނުވަން އިނގިރޭސި ވިލާތުން ނިންމާފައިވަނިކޮށެވެ.

ބެލަރޫސް އަށް ނިއުކްލިއާ ހަތިޔާރުތަކެއް ގެންދާ އިރު، އެ ހަތިޔާރުތައް ބަހައްޓާނެ ތަން ތައްޔާރު ކުރުމުގެ މަސައްކަތް މިހާރު ދަނީ ކުރަމުންނެވެ. އަދި ޖުލައި މަހުގެ ފުރަތަމަ ދުވަހަށް އެ ތަން ނިންމައިލެވޭނެ ކަމަށް ޕުޓިން ވިދާޅުވި އެވެ.

ޕުޓިން ވިދާޅުވި ގޮތުގައި ބެލަރޫސްގައި ނިއުކްލިއާ ހަތިޔާރުތައް ގާއިމުކުރިޔަސް، އެ ހަތިޔާރުގެ ފުރިހަމަ ކޮންޓްރޯލް އޮންނާނީ ރަޝިޔާގަ އެވެ. އަދި އެ ހަތިޔާރު ބެލެހެއްޓުމާއި ބޭނުންކުރުމުގެ އެއްވެސް ކަމެއްގައި ބެލަރޫސް ސިފައިން ބައިވެރިއެއް ނުކުރާނެ އެވެ. އެ ހަތިޔާރުތަކާ އެކު ބެލަރޫސްގައި ގާއިމުވެ ތިބޭނެ ސިފައިން ތަމްރީން ކުރުމުގެ މަސައްކަތް އެޕްރީލް މަހުގެ 3 ވަނަ ދުވަހު ފަށާނެ ކަމަށް ވެސް ޕުޓިން ވިދާޅުވި އެވެ.

ނިއުކްލިއާ ހަތިޔާރު އުފުލުމުގެ ގާބިލުކަން ލިބިގެންވާ، ރަޝިޔާގެ އަސްކަރީ 10 މަތިންދާބޯޓެއް މިހާރު ވަނީ ބެލަރޫސް އަށް ފޮނުވައިފަ އެވެ. އަދި ނިއުކްލިއާ ވޯހެޑް ހިފައިގެން ދަތުރު ކުރުމުގެ ގާބިލުކަން ލިބިފައިވާ އިސްކަންދަރު މަރުކާގެ މިސައިލް ނިޒާމުތަކެއް ވެސް ވަނީ ބެލަރޫސް އަށް ފޮނުވައިފަ އެވެ.

ބެލަރޫސްގެ އިރުމަތީ ސަރަހައްދު، ރަޝިޔާއާ އިންވެގެން އޮންނަ އިރު، ބެލަރޫސްގެ ހުޅަނގު ފަރާތުން އިންވެގެން އޮންނަނީ ނޭޓޯގެ މެމްބަރު ގައުމެއް ކަމަށްވާ ޕޮލެންޑެވެ. އަދި ދެކުނުން އޮންނަނީ ޔޫކްރޭނެވެ.