އުމުރުން 29 އަހަރު، 78 ފަހަރަށް ހައްޔަރު!

އެކި މައްސަލަތަކުގައި 78 ފަހަރު ހައްޔަރުކޮށްފައިވާ އުމުރުން 29 އަހަރުގެ މީހަކު އަނެއްކާވެސް ހައްޔަރުކޮށްފި އެވެ.

ފުލުހުން އިއްޔެ ހައްޔަރުކޮށް، ކްރިމިނަލް ކޯޓުން ބަންދު މުއްދަތު އިތުރުކުރި 29 އަހަރުގެ ޒުވާނާ އަކީ އެކި މައްސަލަތަކުގައި ކުރިން 78 ފަހަރު ހައްޔަރު ކޮށްފައިވާ މީހެއް ކަމަށް ކްރިމިނަލް ކޯޓުގެ އަމުރުގައިވެ އެވެ. އޭނާ މިފަހަރު ހައްޔަރުކުރީ ފޭރުމުގެ މައްސަލައެއްގަ އެވެ.

ކޯޓުން އިއްޔެ ވަނީ 15 ދުވަހަށް އޭނާ ބަންދުކުރަން އަމުރުކޮށްފަ އެވެ.

އޭނާއަކީ ކުށުގެ ވެށީގައި އުޅޭ މީހެއް ކަން ކޯޓު އަމުރުގައި ފާހަގަކޮށްފައިވެ އެވެ.

އެ މީހާގެ އިތުރުން އެކި މައްސަލަތަކުގައި 59 ފަހަރު ހައްޔަރުކޮށްފައިވާ 41 އަހަރުގެ މީހެއްގެ ބަންދު މުއްދަތު ވެސް ކޯޓުން އިއްޔެ އިތުރުކުރި އެވެ. އެ މީހާ ހައްޔަރުކުރީ މަސްތުވާތަކެތީގެ މައްސަލައެއްގެ ތުހުމަތުގަ އެވެ.